1 Kolini 6 - Ata New Testament

Mosinge ta'olu ikotixa'a ngato'o uasi

¹ Ioxe, loxo vile noxinge Mosinge ta'olu oponu tu'umaxuou vile noxingela, la mamu so ngalai no lakoti. Xo axone la ane'i tamitemaou Mosinge u'isalili itilo­vosinge uasi ane, ane'i tamitema so isivoxomo ane. Ai, laixe so ngamama'u no anu anene.

² Xo ngalavu uasi? Ili'i la nenge tamitemaou Mosinge u'isalili tatilovosi'a tatemanu lialia mukalusi. Ili'i tatilovo axone, laso axova so ngamomomo so ngatilo­vosou mi se no taingengi ne uasi?

³ Xe no anu ane so ili'i nenge tatilovosi'a ta'angelo kalumo ngalavusou uasi? Anu manina, laso loxo mimi se so xoluxolu noxinge no lialia 'o la ngamomomo ane.

⁴ Ngingi ngamomomo, laso loxo mi se so xoluxolu noxinge uxali la ngaiavenixu noxi'a tamitema so isivoxo so itilovosou xo ma'ia? Ngalaixu noxi'a tamitema ane tatemanu pita noxou Tatananenge itaxane'i uasi mamu.

⁵ Ai tavivilo, mi ano'o so ngamaila no anu. Xo axova, itema vile so lavulavu uxolu no taingengi uasi? Vile noxinge umomomo so utilovosou mi se loxo uxali no taitaingengi uasi?

⁶ Xo vaimomo 'o la se'i noxinge ino'a tavimovimo'a no anu lopala mo itulusi'a no lakoti. La ikotixa'a no laxune'i tamitema ane ilopala noxou Tatananenge uasi.

⁷ Ilixo ane so ngingi Mosinge ta'olu ngakotingenge ngato'o ne la ngapungengi no anu. Anu uxalixu mamulo no taingengi ne. Loxo vivine vile ususunixine mo vote'i so nalovonixu uasi, la napilixinusi. O loxo naxamulinu lexe vivine vile ukalavoineni no anu lamoli o mi vile la naxolusi. Loxo vote'i uasi, la navikala no oponeni lexe, “Uasi, anene mi vitanisi.”

⁸ Ia ngingi ngalavusou nga'oxo axone to uasi! Ngingi tavivingesi ane, ia ngingi menge ngasusunixinge mo kala­voingengi ngato'o.

⁹ Xo ngalavu uasi? Ane'i tamitema ane nuni'a no iou Mosinge la ane'i ixolu uasi no voxo so anu molu u'uli laxune'i tamitemaou. Ngaka­lavoingengi uasi. Tamitema ne opone'i ututuluou ilixo aloxo 'o. Ane'i ane i'oxonu ilixo nuni'u xe i'itinu mosi'a kalavoi xe ixolaxola'u taula'i xe tamulu i'oxonu ilixo nuni'u ngato'o.

¹⁰ Xe ane'i ane opone'i ututulu no anu pakali xe isuisu xe isipaki utotomu xe isu'asu'anu anaxa'a xe ane'i ane i'oxo loloxa'a tamitema no anu lamoli. Tamitema anene ixolu uasi manina no voxo so Mosinge molu u'uli laxune'i tamitemaou.

¹¹ Ai, tatei ngingi mose'i xoluxolungenge axone kalumo. Ia Mosinge molu mu'ulosinge mo mukalipalangengi lexe ngingi tamitemaou mu'isalili. Ulenu Mosinge muxaxaisinge mo ngingi a ngatavulenu ualasou Tata­nanenge Iesua. Laso maixene Mosinge umoxo'inge lexe ngingi tamalemalenga no iou.

Vasime'a Mosinge ta'olu ne anu tasou Ulenu Laixe

¹² Ioxe, masi Mosinge ta'olu se'i ivikala lexe, “Mi vile so tavu no anula uasi. Mi ma'ia so a'oxonu la a'oxonusi.” Vaikala anene loxo manina ia mi se'i la laixe so ta'oxonu uasi xo usu'uli no anu xoluxolunenge uasi. Mo loxo eni Polu la opoleli aloxo 'o, mi vile loxo tavu noxilo uasi, ia mamu so mi vile axone u'uli laxuleli.

¹³ Xe ngingi se'i masi ngavikala aloxo 'o, “Loxo tasolinenge la ta'anisi, mo loxo vasimenge ulapunenge no anu mi olele la ta'oxonusi.” Kalavoi ane. Manina, Mosinge mu'oxonu ani'ani so oponenge mo oponenge so ani'ani. Ia loxo vasimenge, la anu so susu olele uasi, anu noxou Tatananengesi. Xe Tatananenge, la anu molu usaxila'u vasimenge. Ia ili'i la Mosinge umamulonu mimi so xoluxolu no anu vasimenge ne.

¹⁴ Umamulonu ia no anu xavi tatila noxou la utulusou vasime­ngela a loxo mutulusou mu'umenu Tatananenge no anu soli.

¹⁵ Xo ngalavu uasi? Vasimenge ne anu pa'upa'usou no anu vasimolu Kalaisiti ane. Laso axova? Anu laixe so eni ano'u Kalaisiti vasimolu pa'usou 'o mo apitanu no anu vasimele sema so ilixo nuni'u? Uasi manina, mi ne masua no iou Mosinge.

¹⁶ Xo itema upitanu vasimolu noxie sema axone la ane'i ixali vasime'a vilesisi. Anene ngalamana no anu uasi? Xo no anu Mosinge vaikalaou uvikala lexe tamei ipita axone la ane'i ixali vilesisi ane.

¹⁷ Ia loxo itema vile uxolu noxou Tatananenge la Ulenu upitane'i itema ne ilou Tatananenge mo so ane'i vilesisi.

¹⁸ Nga'umolu mo nga'umesou ilixo nuni'u ne avile. Xo susu mi ma'ia itema u'oxonu la anu loxo noale no vasimolusi. Ia loxo itema u'oxonu ilixo nuni'u olele la anu molu ususunoxu vasimolu ane.

¹⁹ Ai, ngalavu uasi? Vasimenge ne anu tasou Ulenu Laixe. Xo Mosinge mupilixinu Ulenu mo a uxolu noxinge. Vasimenge ne mi na'a ngingimo uasi.

²⁰ Xo anu mulotongengi no anu lape mutia­tila e mutiatila musuku. Laso no anu vasimenge xe ulengengi ne la nga'oxonu mi ane so u'itinu ualasousi, xo anu noxoumo.