1 Kolini 4 - Ata New Testament

Tatananenge molu utilovosi'a tamitema so xaixai noxou

¹ Ioxe, ngingi masi ngaxavuta­lanexi no anu vote'i aloxo 'o. Nexi tamitema so xaixai noxou Kalaisiti. Anu mupilixinu vaikalasou pileni noxou Mosinge ane mutalume tatei noxixe so tavu'ulinu.

² Xe Tatana­nenge mulopalanexi so tavu'ulinu vaikalaou axone laso anu mi mutiatila so ta'oxonu no anu masaxa noxou. Mamu so ta'oxo papanu.

³ Xo loxo ngingi ngati­lovosou xaixai noxilo mo nga'oxo lexe laixe o masua la anene mi vitanisi. Mo loxo tamitema itilovosilo no lakoti la eni auali no anu uasi. Mo eni kalumo, opoleli ututulu so atilovosou xaixai noxilo uasi.

⁴ Eni axamuli lexe apolo va'axu no anu mi vile uasi. No opoleli examuli lexe a'oxonu xaixai laixe, ia eni melo alemelo axone uasi. Xo anene mi noxou Tatananenge so molu utilovosilo.

⁵ Molu utilovosilo ia voxosou uao. Laso mamu so ngingi ngatilotilovo kolokolo. Ngaxolu ngaxomaiou voxo so Tatananenge une'e. Une'e la uno'u mimi a utatalume no isivoxo mukalusi ka umulaxu no lamana. Xe no anu masamasaxa no oponenge tamitema la anu upala'anixusi. Laso ane, no voxo anene Mosinge molu uvikala laixe so xaixai noxinge aneva u'osasou.

Ane'i Takolini mose'i me'a mi'itine'i

⁶ Ioxe tavivilo. Eni etovola'i sevile noxixe noxou Apolosi aloxo ne so apela'inge. Xo ngingi ne ngakali­totongengi mo nga'itingengi noxixe aloxo 'o. Se'i i'oxo lexe ane'i tanoxilo xe se'i lexe tanoxou. Mukalu la ngaxililiengi ngato'o. Eni amasaxau lexe ngingi ngalo­muxu Mosinge vaikalaou mule­molu lexe ilixo anene laixe uasi.

⁷ Xo axova? Ena'ei mutulusinge so ngingi nga'uli'uli? Xo mimi so xoluxolu noxinge mukalusi ne ngingi menge ngexalixu? Uasi to! Mosinge molu muitimengi ane. Laso axova so nga'itingengi no anu?

⁸ O axovae? Ngingi masi ngeno'u mimi lailaixe mo ngekalusou masaxa avile, ne? Ngingi ngaxolu no latanu mimi mukalu, ne? Ngingi ngexali loxo takingi manina, ia nexi to uasi, ne? O axone laixe manina, xo nenge nenge'a masi taxolu no tanixu kingi ane.

⁹ Ia uasi. Axamulinu lexe no taine'i tamitema mukalusi la Mosinge mumulanexi nexi ta'aposeli lexe xoluxolu noxixe masuasi. Aloxo 'o. No anu lakoti la isosovosi'a takalavusu se'i lumamo lexe isoli. La xoluxolu noxixe axonesi. Laso ta'angelo oli'a tamitema loxo ixoxolu iutitiou xoluxolu masua noxixe 'o.

¹⁰ No ie'i ne ngingi ngexali loxo tami­tema so lavulavu no anu vaikalasou Kalaisiti ia nexi 'o la loxo taxo­vulaulausi. Ngingi loxo xavingengi ia nexi pelesixesi. Ngingi loxo tamitema ane uala tatila ia nexi la tamitema itaxanexi uasi.

¹¹ Mo tateimo mune'e muxali vaimomo 'o nexi taxolu tasolinexe so la'ilali ilou lexa. Mo mimimexi ne muxa­sixasisi. Mo tamitema isavasa­valixe. Mo taxolu tasixe uasi, talili vitanisi.

¹² Mo nexi sasaiexi so taxalixu mimi no avoxe. Xe ilixo noxixe aloxo 'o. Loxo tamitema ixililiiexi la nexi talingau su'ulisi'a noxou Mosinge. Mo loxo ilosixe tu'umaxu la nexi takolinu uasi, tatavulenusi.

¹³ Mo loxo ito'omexe no anu vaikala ialuxu la nexi takolinu no anu lelemesou. No ie'i tamitema no lialia 'o la nexi texali loxo mosomososi. Texali loxo lapipia ane isialonusi. Mi ne musoko'u tatei mo a uxoxolu vaimomo 'o.

Polu muvikalane'i Takolini lexe ilixo noxou, la imulinu axone kalumo

¹⁴ Ia ngalavu laixe lexe ekauka­vunu vaikala 'o so apamailangengi uasi. Eni ekaukavunu so alovoni­xinge ngingi ta'alixeli ane asexe­langengi.

¹⁵ Manina, ngingi ngaxolu noxou Kalaisiti vaimomo 'o la ane'i tamitema tavu'alo tavu'alo imomomo so ipelototosinge no anu xoluxolungenge ne. Ia ane'i anene tamaminge no anu xolu­xolungenge noxou Kalaisiti Iesua uasi. Eni enisisi, xo eni melo ene'enu vaika­lasou laixe noxinge.

¹⁶ Eni ama­minge laso atama pakia'u noxinge aloxo 'o. Ilixoleli axova la ngamu­lileli no anu.

¹⁷ Masaxa noxilo so singe axone. Laso maixene epalusou Timoti mune'e noxinge ne. Anu kalumo loxo alixeli no anu xoluxoluxu noxou Tatananenge. Eni asexelaxu mo xaixai ma'ia alopalanu so u'oxonu la utotomu u'oxonusi. Mune'e noxinge so ulivunoxu xavutalemengi no anu ilixoleli so xoluxoluxo noxou Kalaisiti. Anene u'isalili no anu vaikalaxeli loxo alavusou alanu no anu pitapita no tuatuala.

¹⁸ Ane'i mose'i no taingengi i'oxo pai. Masi i'oxo lexe ane'e noxinge uasi.

¹⁹ Ia uasi, loxo Tatananenge umasaxau, la eni apalea so ane'e noxinge. Mo loxo ane'e la eni alomuxu vaikalai'a tamosou pai ne uasi. Eni ane'e so atilovosou xavi noxi'a lexe ipuninu anaxa'asi o vaikali'a temanu.

²⁰ Xo Mosinge molu u'uli laxune'i tamitemaou, ia mi ne so vaikalasi uasi. Anu mi so xavi tatila to.

²¹ Laso atali'isinge aloxo 'o. Loxo ane'e noxinge la loxo atavulenu kulue so alovo­ningenge no anu? O ngalu'engengi lumamo so loxo ane'e noxinge la no anu sexela mo opoleli lexa noxinge? Ngingi menge ngailounu vote'i­singe lexe axova.