1 Kolini 3 - Ata New Testament

Pelototosou so xaixai noxi'a tami­tema so ilanu Mosinge vaikalaou

¹ Ioxe tavivilo, tatei eni vote'i uasi so apilixinu vaikala noxinge loxo a'oxonu noxi'a tamitema ane Ulenusi upamuxane'i. Eni evikala­ngengi a loxo tamitema ane vasime'asi upamuxane'i. Ngingi tanoxou Kalaisiti ia no anu xolu­xolu la ngingi loxo takeakeasio.

² Eni loxo asusungengisio. Alo­singe ani pakia'u uasi xo ngingi ngamomomo no anu uasi. Mo vaimomo'o ngamomomo no anu uao to!

³ Xo aloxo 'o. No anu xoluxolungenge la ngingi vasime­ngesi upamuxangengisio. Xo isu'isu ilou tu'utu'umaxu a uxolu no taingengi to ne, laso talavu lexe ma'ia upamuxangengi ne? Anu vasimengesi ane. Xe no anu muamua'ingenge ne la loxo tamitema so lialia 'osi.

⁴ Xo se'i ivikala lexe, “Eni noxou Polu a.” xe se'i lexe, “Eni noxou Apolosi.” Loxo nga'oxo axone la ngingi ngamulinu ilixo noxi'a tamitema so lialia 'osi.

⁵ Xo ngaxavutala laixe. Apolosi ne ena'ei? Xe eni Polu ena'ei 'o? Nexi noxou tamitema so xaixai vitanisi. Xo voxo se'i loxo Tata­nanenge mulosilo vote'i la elanu vaikalaou noxinge. Xe voxo se'i la anu Apolosi axone kalumo. Noxou texaxai axone laso maixene ngingi ngelopala.

⁶ Eni loxo etapu'u ngiaxu e Mosinge vaikalaou. Xe Apolosi a loxo munixi'u lexasou so uxalo uasi. Nexi texaxai axone, ia Mosinge molu muxalixu lemexu.

⁷ Laso ane. Itema ane loxo utapu'u o itema ane unixi'u lexasou la mamu so ta'itinu ualasi'a, ane'i tamitema so xaixai vitanisi. Nenge ta'itinu Mosinge ualasousi xo anu molu uxalixu lemexu vaikalaou.

⁸ Ioxe, no anu xaixai noxou anu ane so utapu'u xe anu ane so unixi'u lexasou la anu iou vilesisi. Vile noxi'a utila noxou vile uasi. Ia Mosinge molu ulosi'a lakolisou umomomo no anu xaixai noxi'a vilevilesi.

⁹ Xo nexi noxi'a Mosinge tava'isuxu xaixai noxou. Xe xaixu Mosinge loxo taxaxai no anu ne a ngingisi. Xe no anu vile kalumo, la ngingi tasou Mosinge.

Tamitema so ilanu vaikala ane'i loxo takapenita

¹⁰ Ioxe, atilovo aloxo 'o. No anu iaiama noxou Mosinge la mulosilo lavulavu so aloxo kapenita laixe. La eni elovonixu tani tanixu ka eta'olunu lavolavo'o so tani tava'u. Ia vaimomo 'o la se'ila a ixaxai so isivitanoxu tani e esoko'u ne. Laso avikala aloxo 'o. Tamitema ta'ei ixaxai no tani e esoko'u tava'u ne, la ilaxa'i laixe.

¹¹ Xo aloxo 'o. Iesua Kalaisitisi anu tava'u tasou Mosinge ne. La mamu so itema vile utovonu so utulusou tani ne no anu tava'u vilemo.

¹² Xe tamitema se'i loxo isolonu tani ne la masi ino'u mimi se'i aloxo 'o. Se'i ino'u lavo'o koli xe se'i siliva xe se'i lavolavo'o ane lailaixe manina. Ia se'i la ino'u mi loxo ovuovu xe se'i lele'i xe se'i mi loxo iu 'o. Ane'i ino'u no anu masaxa noxi'a axone laso itulusou no anu tava'u olele.

¹³ Itulusou ia ili'i xaixai noxi'a vilevilesi upala'a no voxo loxo Tatananenge utilovo­sou. Utilo­vosou aloxo 'o. No voxo anene la anu uvaxanu navu no anu xaixai noxinge vilevilesi mukalusi so loxo navu u'ou aneva. Mo so no vote'i so navu ne la utilovosou lexe xaixai noxinge aneva manina o kalavoi.

¹⁴ Xe loxo itema vile utulusou tani no tava'u olele xe xaixai u'ela uasi, la Tatananenge ulosou lakolisou laixe.

¹⁵ Xe loxo itema vile uxaxai no tani ne ia loxo xaixai noxou u'ela la anu ulavu lexe mupuninusi ane. Manina, Mosinge upamaulinu itema ne ia xaixai noxou tasiauxu vitanisi.

Tasou Mosinge ne a nenge ta'olusi

¹⁶ Xo axova, ngalamana no anu mi anene uao? Ngalavu laixe, tasou Mosinge a ngingi ne. Xo Ulenu Mosinge a uxoxolu noxinge.

¹⁷ Mo ngingi tasou ne, anu molu mukalipalanu lexe tanoxou mu'i­salili. Laso loxo itema vile umamulonu tasou ne la Mosinge umamulonu itema ne kalumo.

Mamu so ta'itinu ualaualasi'a tamitema

¹⁸ Ioxe, ngingi menge ngaka­lavoingengi uasi. Loxo itema vile no taingengi lavulavuou so lialia 'o la anu ulu'enusi. Ulu'enu mo uxali loxo kaulongusi mo so loxo no anu masaxa noxou Mosinge la ulosou itema ne lavulavu noxou e u'asi'asi.

¹⁹ Xo lavulavu laixe so lialia 'o ne anu loxo mi xovulaulau no iou Mosinge. Xo no anu vaikalou mulemolu mi ne aloxo 'o, “Takeleva itovonu so ipamuxane'i tamenexi'a no anu vaikalai'a e ivilasinu. Ia Mosinge molu uuauoixa'a no anu vaikalai'a ne.”

²⁰ Xe no anu vile la muvikala lexe, “Tatananenge mula­vusou xavuxa­vutalai'a takeleva lexe upolo axova mukalu. Mulavusou lexe ipune'isi ane.”

²¹ Laso ane. Ngingi masi nga'i­talonu ilixo so nga'itinu ualasi'a tamitema. Mosinge mupilixinu mimi mukalusi noxinge so su'uli no anu xoluxolu noxinge.

²² Xo eni Polu xe Apolosi xe Pita xe mimi no lialia mukalusi xe mauli ilou soli xe mimi ane uxolu vaimomo 'o xe uxali ili'i, mimi ne so usu'uli­ngengisi.

²³ Xe ngingi ne noxou Kalaisiti xe Kalaisiti la anu noxou Mosinge.