1 Kolini 16 - Ata New Testament

Polu muvikalasou lamoli ane so ikalanu ulai ne Ielusalemo

¹ Ioxe, eni amasaxau avikalange­ngixu lamoli ane so ngapitanu so ulai noxi'a tamitemaou Mosinge ne Ielusalemo. Eni epamuxane'i tate­manu pitapita ne Xalesia polovinisi no anu mi anene. Laso ngingi kalumo ngamulinu axone.

² Aloxo 'o. No anu voxo tei utotomu la ngingi vilevilesi ngaxexenu lamoli sevile no anu ane ngaxalisou. Loxo ngaxalisou tatila la ngaxexenu tatila, xe loxo kitua se la ngaxexenu sevilesi. Ngaxexenu la ngamulaxu va'axu mo so loxo eni ane'e la nga'au'au no anula uasi, xo ngepitanu mukalu.

³ Mo ngasoso­vosi'a se'i noxinge so loxo eni axali noxinge la apalusi'a isaxanu lapasi se'i xe su'uli noxinge ne so ulai noxi'a Taielusalemo.

⁴ Ia loxo axamulinu lexe anu laixe so eni kalumo, la noxi'a takei talai.

Polu muvikalane'i lamana so muamua'i noxou

⁵ Ioxe, eni loxo ane'e noxinge la apolo ne Masetonia polovinisi xo eni alai ne tei.

⁶ Apolo xo xe axali noxinge la masi nenge'a taxolu maxuveni sevile. Alavu uasi, masi nenge taxolu sivo lelemesou taunu avile. Taxolu xo xe alutu so alai no tuala ne'ei la ngapilixileli laixe.

⁷ Eni amasaxau so axolu voxo tata'eisi uasi. Loxo no anu masaxa noxou Tatananenge la nenge'a taxolu maxuveni sevile.

⁸ Ia ane'e noxinge uao xo axolu ne Epesusi xo xe voxo so Penikosi ukalui laso alutu alai noxinge.

⁹ Axolu se 'o xo Mosinge mu'oxonu vote'i so a'oxonu xaixai tatila no taine'i Ta'epesusi. Ia tamitema so xilili tavu'alo to!

¹⁰ Ia aloxo 'o. Loxo Timoti ulai uxali noxinge la ngavalaxu laixe mo so oponu uai se'isisi no anu xaixai noxou. Xo anu u'oxonu xaixai noxou Tatananenge a loxo eni 'osi.

¹¹ Mamu so se'i ipixeti noxou, ngataxanu vaikalaou. Ngoli'a ngaxolu laixe xo xe so ulutui la ngapilixinu laixe so opongengi laixe noxinge ngato'o. Eni axolu axomaiou xo mo oli'a tavivinge ixali.

¹² Xe noxou vivinge Apolosi la avikalanu alaxu tavu'alo lexe laixe so oli'a tavivinge ilai noxinge. Ia anu umasaxau vaimomo 'o uasi. Mu'oxo lexe ili'i loxo uxamulinu voxo laixe, laso ane, ulai noxinge.

Vaikalaou Polu kaluxusou

¹³ Ngingi ngalaxa'i laixe. Ngatulu pumungenge no anu lopala noxinge. Xoluxolungenge loxo tamitema ane tane'i mukalu, nga'ume uasi.

¹⁴ Xe mi ma'ia nga'oxonu la nga'oxonu no anu sexelasi.

¹⁵ Tavivilo eni apelototo pakia'u noxinge aloxo 'o. Ngingi ngalavusi'a laili noxou Sitevanasi lexe ane'i tei noxinge no anu lopala ne Akaia polovinisi. Mo ngalavu lexe ane'i opone'i ututulu so isu'uline'i tamitemaou Mosinge u'isalili.

¹⁶ Ngalavusou ilixo noxi'a axone laso ngalu'engengi no laxa'a. Xe tamitema ta'ei so xaixai noxou Tatananenge axone la ngalomuxa'asi.

¹⁷ Ane'i Sitevanasi xe Votunatasi xe Akaikusi mine'e noxilo la e'osasi'a manina. Ngingi mukalusi vote'i so ngane'e uasi ia ane'i loxo misosovosinge.

¹⁸ Ane'i tamitema so i'oxonu oponenge nenge'a u'osasi. Laso ngalomuxa'a tamitema kaini aloxo ne.

¹⁹ Ane'i tatemanu pitapita ne Esia polovinisi mivikala aso noxinge. Xe Akuila olie Pilisila mo Mosinge ta'olu mukalusi ane ipita no tasi'a mivikala aso laixe noxinge no anu ualasou Tata­nanenge.

²⁰ Tavivinge lai 'o mukalusi ivikala aso noxinge. Laso ngamaxa'u sexela noxinge ngato'o no anu vote'isinge Mosinge ta'olu.

²¹ Eni Polu a akaukavunu pa'usou se 'o mo avikala aso noxinge.

²² Loxo itema aneva umatapianu Tatananenge la itema ne uma­mulosi. Ia nenge ane tasexelaxu la oponenge utatama lexe, “Tatana­nexi, nane'ela.”

²³ Iaiama noxou Tatananenge Iesua a uxoxolu noxinge.

²⁴ Eni asexelangengi mo apilixingengi noxou Kalaisiti Iesuasi. Vaikala ano'o maninasi. Anu anesi.