1 Kolini 15 - Ata New Testament

Iesua musoli ka mutulu mumaulila

¹ Ioxe tavivilo, alivunoxu xavuta­lamengi no anu vaikala laixe e evo­tongengixu mala'o. Evotonge­ngixu xe ngelomuxu la ngatulu pakia'u no anu anenesio.

² Elanu vaikala laixe ne xe loxo opongengi mukasou lexe manina, la anenesi vote'isinge so pamauli noxou Mosinge. O axova, ngelopala vita­nisi?

³ Ioxe, vaikala mutiatila manina ne mose'i mia'aloxeli tei mukalu laso eni epilixinu noxinge. Vaikala ne aloxo 'o. Kalasiti musoli so muka­lusou tina'unenge so susu aloxo Mosinge vaikalaou ulemolu.

⁴ Mu­soli xe mimulaxu vasimolu no lulu xe voxo tatalu mupoloe la Mosinge mutulusou mupamaulinula. Mi ne muxali loxo Mosinge vaikalaou ulemolu kalumo.

⁵ Xe ili'i la anu mupala'a noxou Pita xe mukalu la mupala'a noxi'a ta'aposeliou.

⁶ Xe ili'ila la mupala'a noxi'a tavivinge talopala ane navasi'a teitexi no anu 500. Tavivinge se'i ne misoisoli ia ane'i tavu'alo noxi'a a ixoxolusio.

⁷ Xe mune'ela la anu mupala'a noxou Tiemisi xe mukalu la mupala'a noxi'a ta'aposeliou muka­lusi.

⁸ Ioxe, mune'e mune'e xo xe ili'i la eni kaluxusi'a so mupala'a noxilo. Eni eili'i manina axone la aloxo kekea ane lavulo'o noxou ialuxu manina.

⁹ La ane'i ta'aposeli latala iua'ulixo mo eni amitema alaixe so atavulenu uala aposeli aloxo 'o uasi. Xo tei la elosi'a tatemanu pita noxou Mosinge tu'utu'umaxu.

¹⁰ Ia vaimomo 'o xoluxoluxo aloxo 'o xo no anu iaiama noxou Mosingesi. Muiaiama noxilo la ulapau vitanisi uasi. Muxalixu nene'axu xo no anu xaixai noxilo la aua'ulixa'a ta'aposeli mukalusi. Ia eni melo uasi, iaiama noxou Mosinge a uxoxolu noxilo so ulosilo xavi no anu xaixai anene.

¹¹ Ia mi vile uasi, xo loxo eni o ane'i, la tavotovotosou mi vilesisi. Mi vilesisi e elemolu se mukalu 'o lexe Iesua musoli ka mumaulila. Tevotovoto axone laso ngelopala lexe maninasi.

Ili'i la tamitema ta'ei misoisoli la imualila

¹² Ioxe, nexi tevotovoto axone lexe Kalaisiti musoli ka Mosinge mutulusou mupamaulinula. Laso axova? Tevotovoto axone ia ngingi se'i ngavikala lexe tamitema loxo isoisoli la imaulila uasi.

¹³ Xo loxo manina lexe tamitema imaulila uasi la anu Kalaisiti kalumo umauli uasi, uai avile no anu solisi.

¹⁴ Mo loxo Kalaisiti umauli axone uasi, la votovoto noxixe ne temanu uasi. Mo axone la ngingi ngelopala noxou Kalaisiti vitanisi, nene'axu uasi.

¹⁵ Xe aloxo 'ola. Nexi ta'aposeli tevikala lamana lexe Mosinge mutulusou mupamaulinu Kalaisiti ka nexi temaisou no iexi. Ia loxo vaika­lamengi lexe tamitema ane misoisoli imaulila uasi ne manina, la nexi tekalavoisi ane. Nexi tamitema so takalavoisou Mosinge xo axone la anu upamaulinu Kalaisiti uasi ane.

¹⁶ Manina, loxo Mosinge umomomo so upamau­line'i tamitema ane misoisoli uasi la anu umomomo so upamaulinu Kalaisiti uasi kalumo.

¹⁷ Mo loxo upamaulinu Kalaisiti uasi la lopala noxinge ne lapipia vitanisi mo susu ukasingesio.

¹⁸ Mo loxo tamitema ane milopala noxou Kalaisiti xe misoli la ane'i imamulo avile ane.

¹⁹ Loxo nenge talopala noxou Kalaisiti so taxalisou xoluxolu laixe no anu lialia 'osi la anu mi vitanisi. Xo axone xe tasoli la taxalisou nene'axu laixe uasisi. Loxo lopala noxinge so lialia axo­nesi la laixe so tamitema tane'i­nenge xo tapunenge avile ane.

²⁰ Ia uasi, axone uasi. Xo Kalaisiti mutulu mo mumaulila ne, mo ili'i la nenge axone kalumo. Laso anu aili'isinge xo anu tei manina noxinge no anu ane so tasoli xe tamaulila.

²¹ Xo tava'u so tasoli, la noxou itema vile. Mo tava'u so tamaulila, la noxou itema vile kalumo.

²² Nenge mukalusi tasoi­soli xo tava'inge e Atamu. Mo axone kalumo la nenge ta'ei taxolu noxou Kalaisiti la tamauli ane.

²³ Nenge noxou Kalaisiti tamau­lila axone ia no anu vote'isou u'isalili. Aloxo 'o. Kalaisiti mu'uli noxinge xo mutulu mukalu. Xe ili'i no voxo loxo anu une'e la nenge tamulinu axone so tatulu kalumo.

²⁴ Xe mukalui la anene telexusi. Xo Kalaisiti ukalusou xavi noxi'a tatiatila xe ane'i ane i'uli'uli xe tami ane xavine'i musuku. Ukalusou xavi noxi'a ukalu la anu upilixinu mimi mukalusi noxou Mosinge anu Maminge so molu u'uli laxunu avile.

²⁵ Xo Kalaisiti uxoxolu u'uli'uli xo mo umaloxo'a mo umamulone'i tauluaou avile.

²⁶ Umamulone'i tauluaou axone la ukalusou soli kalumo xo nenge tasolila uasi.

²⁷ La no anu ane Mosinge vaikalaou ulemolu lexe “Anu umulaxu mimi mukalusi so Kalaisiti umaloxo'u.” la talavu aloxo 'o. Mimi mukalusi uxolu no laxu Kalaisiti axone ia Mosingesi uasi.

²⁸ Ioxe, Mosinge umulaxu mimi mukalusi no laxu Kalaisiti so umaloxo'u ukalui laso anu Kalaisiti ulu'enu so uxolu no laxu Mosinge. Mo so axone la anu mimi mukalusi uxolu noxou Mosingesi so anu u'uli laxunu.

²⁹ Ioxe, vaikala ane lexe tamaulila ne mose'i no taingengi masi milavu no opone'i lexe manina. Xo loxo opone'i pakia'u lexe tamitema ane misoisoli imomomo so imaulila uasi, laso axova so ino'u tanixa'a no anu ilixo so kelele?

³⁰ Mo nexi kalumo. Loxo ili'i tamaulila uasi, laso axova so nexi tatetelisou xaixai ano'o e utotomu tamitema imolo mamulosixexu 'o?

³¹ Tavi­vilo, xoluxolungenge ne noxou Kalaisiti Iesua anu Tatananenge anu nene'a­xu xaixai noxilo. Mi ne a'osasou mo alemolu lamana mo so ngingi ngalomuxu pelototo noxilo 'o. Eni la loxo soli so xaixai noxilo 'o a utotomu uxolu no ielisi.

³² Mo loxo ne Epesusi la tamitema mikasilo e mikasilo manina, la eni loxo itema ane u'oto noxi'a tamisoposi tamosou la'ia. La axova, tava'u xoluxoluxo axo'o xo no anu masaxa noxilomo? Eni axalisou nene'axu laixe no anu xoluxolu so vasimelo 'o? E uasi. Laso loxo tamitema imauli no anu soli uasi la eni apilixinu xaixai ialuxu 'oe. Apilixinu mo so nenge'a ta'ani mo taie xo ili'i la tasoli tasiaunenge avile.

³³ Laso ngakalavoingengi uasi. Loxo ngavaitami noxi'a tamitema so xavutala masua la ane'i i'unanu tane'i noxinge la uvila'isou xavu­tala laixe noxinge ne.

³⁴ Ngapi­lixinu xavutala so xovulaulau axone mo ngamulinu vote'i laixesi. Mamu so ngapilixingengi no anu susu. Xo se'i noxinge ilavusou Mosinge uao. Mi ano'o alemolu so ngapamailamulinu mo so ngano'u lavulavu.

Loxo tasoli xe tamaulila la vasimenge uxiu uxali alavua

³⁵ Ioxe, masi se'i itali'i lexe, “Uo, tamitema isoisoli la itulu axovao? Mo loxo itulu la vasime'a kaini axovao?”

³⁶ Ai, ngingi ta'ei ngavikala axone la ngaxovulaulau ane. Latilovo so tasoli mo tamauli aloxo 'o. Loxo ngalavu, mi ane tatounu la anu umulaxu xolanu vitanisi uasi. Anu usoli mo u'uio. Ukalu laso anu lemexu uxali.

³⁷ O loxo tatapu'u uiti o mi ngiaxu axone, la tatounu ai'ainu ilou volovoloxu uasi. Tano'u ngiangiaxu vitanisi so tatapu'u.

³⁸ Tatapu'u ia loxo aiainu xe volovoxu xe temanu la anu uxali mo umulinu iou u'isalili no anu masaxa noxou Mosingesi.

³⁹ Ioxe, tatemanu lialia mukalusi vasivasime'a umulinu ie'iie'i u'isalili. Xo nenge tamitema la vasimenge iou vile xe tamisoposi la vasime'a iou vile xe tangiala vasime'a iou vile xe tasinana kalumo vasime'a iou vile.

⁴⁰ Xe mimi no loxotolo la anu iou vile xe mimi so lialia la anu iou vile. Xo loxo tasixisou anene no loxotolo la anu lailaixe mo mimi so lialia anu laixe kalumo, ia iou vilemo.

⁴¹ Xo aso xe so'io xe tataoto la usaxi laixe ia ie'iie'i vilevilesi. Xe noxi'a tataoto la ane'i isaxi iou vilemo noxi'a vilevilesi.

⁴² Laso axone kalumo noxinge tamitema so tamauli no anu soli. Xo loxo tasoli la anu vasimenge so i'asixu ne anu so u'ui ane. Ia loxo tatulu tamaulila la no anu vasimenge anene so u'ui uasi.

⁴³ Vasimenge i'asixu ne anu masua to, ia so tatulu no anu, la anu iaxusi. Anene i'asixu, la anu pelesousi ia so tatulu no anu la xavinusi.

⁴⁴ Anene i'asixu la mi so lialiasi ia so tatulu no anu la anu so tualasou Mosingesi. Xo vasimenge so lialiamo xe vasimenge ane so tualasou Mosingemo.

⁴⁵ Xo no anu Mosinge vaikalaou la muvikala aloxo 'o, “Mosinge mulosou itema tei e Atamu tauxu so mauli no vasimolu.” Xe mune'e la itema tameisou e Kalaisiti la mulosinge mauli so ulenenge.

⁴⁶ Ia mauli so ulenenge uxali tei uasi. Anene so vasimenge muxolu tei kaio texalisou mauli so ulenenge.

⁴⁷ Itema ane tei ne anu so lialia xo Mosinge muxalixu no anu lialiasi. Ia anu itema tameisou anu molu no tualasou Mosingesi.

⁴⁸ Laso tamitema mukalusi so lialia 'o ane'i ie'i vilesisi noxou itema so lialia. Xe ane'i ane so tualasou Mosinge la ie'i vilesisi noxou itema so tualasou Mosinge.

⁴⁹ Vaimomo 'o taxolu no lialiasio laso maixene vasimenge iou vilesisi aloxo itema so lialia e Atamu ne. Ia ili'i loxo taxolu no tualasou Mosinge la vasimenge iou vilesisi aloxo itema so tualasou Mosinge e Kalaisiti.

⁵⁰ Ioxe tavivilo, eni avikala lamana aloxo 'o. No voxo so Mosinge molu u'uli laxune'i tamitemaou la ane'i ane so vasime'a sialu, imomomo so ixolu uasi manina. Mo mi ane so u'ui la umomomo uasi so u'unalai no anu xoluxolu kaluxu uasi.

⁵¹ Ngalomu, eni apla'anixu mi vile mutalume aloxo 'o. Ili'i la se'i noxinge isoli uasi. Se'i isoli uasi ia nenge mukalusi vasimenge uxiu.

⁵² Mi ne uxali alaxu vilesisi, ienge u'amosi. No voxo anene la piuka kaluxusou utama la tamitema misoisoli ne itulu imauli no anu vasime'a ane so uxolu avile. Ane'i loxo misoisoli xe ane'i loxo ixoxolusio, nenge mukalusi vasi­menge uxiu axone.

⁵³ Xo vasi­menge kaini so usoli mo u'ui 'o anu uxiu alavua uxali kaini so usoli uasi, uxolu avilesi.

⁵⁴ Vasimenge so u'ui mo usoli 'o loxo uxiu mo uxali kaini ane so uxolu laixe avile ukalui, laso ane. Nene'axu vaika­laou Mosinge uxali xo uvikala lexe “Tatananenge muua'ulixu soli mo mukalusou avile.”

⁵⁵ Mo loxo ulemolu, “Soli nini naua'ulinexe axovae? Nini a loxo tanga xo nelosixe navunavu toxoxu. Ia mi ane so nekapinexi no anu muna­vae? Ta'umenela uae.”

⁵⁶ Tava'u so soli ulosinge navunavu toxoxu ne xo no anu sususi. Mo talavusou susu lexe xavinu xo tava'u no anu losi.

⁵⁷ Ia talemolu laixe noxou Mosinge xo nenge taxolu noxou Tatananenge Iesua Kalaisiti laso no anu vote'i anene nenge taua'ulixu soli ane.

⁵⁸ Laso tavivilo ane asexela­ngenge ne. Ngaxolu pumunge­ngesi, nga­vaxa ngane'e no anu lopala noxinge uasi. Mo loxo nga'oxonu xaixai noxou Tatana­nenge la xavinge­ngiousi. Xo ngalavu lexe ngaxolu noxou Tatananenge laso xaixai noxinge ne ulapau vitanisi uasi.