1 Kolini 14 - Ata New Testament

Pelototo lexe opone'i ututuluou vaikala iouiou uasi, ututuluou vaikala so pela'asi

¹ Ioxe, ngamulinu vote'i so sexala axone. Xe no anu lavulavu so xaixai iouiou e Ulenu Laixe ulo­singe la anu laixe so nga'osasou kalumo. Ia anu ane so opongengi ututulu no anu, ane so pela'asi.

² Xo aloxo 'o. Loxo itema vile uxolu no anu pita mo uvivikala no anu vaikala iou vilemo la anu Mosingesi ulavusou vaikalaou ne. Tamitema ilavusou laxu axovao, xo ane'i so tokipelesi ne uasi? Vaikala laxu ne utalume noxou itema ne no anu ulenusi.

³ Ia tamitema so pela'a, la vaikalaou Mosinge ilanu ne so u'oxonu pakia'a mo u'avutinoxu osa mo umamatolane'i tatemanu pita mukalusi.

⁴ Itema ane uvikala no anu vaikala vilemo ne la anu so u'oxonu pakia'u lopala noxoumo. Ia itema ane so pela'a la anu vaikalaou u'oxonu pakia'a tate­manu pita mukalusi.

⁵ Laso loxo Ulenu ulosinge ngingi mukalusi lavulavu so ngavikala no anu vaikala iouiou la anu mi vile uasi, eni a'osasi. Ia mi ane amasaxau manina ane so ulosinge lavulavu so ngalanu vaikala so pela'a. Xo nene'axu xaixai so pela'a ne uua'ulixu ane so vaikala iouiou. Ia loxo itema uvikala no anu vaikala iou vilemo ka molu uxiunu so laxu upalasi la anu laixe. Xo axone la u'oxonu pakia'a tatemanu pita mukalusi.

⁶ Laso tavivilo, loxo eni ane'e noxinge mo avikala no anu vaikala iouiou ane ngalavusou uasi, la anene usu'ulingengi axova? Ia loxo avulunu vaikala vile Mosinge mupala'anixu noxilo o alemolu vaikala vile so lavulavu o so pela'a o avotongengi, laso ane. Anene su'uli ane.

⁷ Xo nenge tano'u lavulavu no anu mimi se'i kalumo. Loxo itausou mi vile o ipaiti mi vile so talexe ia loxo tamaxu vuluvulusi la talavusou lexe xolinu axovae?

⁸ Mo no anu piuka kalumo. Xo ilavusou itausou so utama u'isalili no anu sosovo so oto. Ia loxo itausou vuluvulusi la ane'i ta'ami ilalaxi axovae?

⁹ La axone kalumo noxinge. Loxo ngavikala no anu vaikala iouiou ane tamenexinge ilavusou uasi la laxu upalasi noxi'a axova? Vaikalameni ne ulapau vitanisi.

¹⁰ Xo manina. Vaikala iouiou so tuatuala uxolu no lialia 'o mo anu laxu mukalusi. Laso loxo tamosou me'a la laxu upalasisi.

¹¹ Ia loxo itema vile uvikalaleli no anu vaikala vilemo ane alavusou uasi la anu ukalipalanexi ane. Xo axone la axamulinu lexe anu itema so tokipelesi vilemo nopaxa mo anu uxamuli axone noxilo kalumo.

¹² Laso ane. Eni alavu lexe opongengi ututulu so ngaxalisou lavulavu so xaixai iouiou ane molu noxou Ulenu Laixe. Ia no anu anene, la ngalingalingau ane u'isalili so u'oxonu pakia'a tate­manu pita mukalusi.

¹³ Ioxe, loxo itema uvikala no anu vaikala iou vilemo la anu laixe so ulinga so ulavusou vaikala ne laxu kalumo.

¹⁴ Xo loxo eni avikala noxou Mosinge no anu vaikala vilemo ane alavusou uasi la anu loxo ulelelisi uvikala noxou. Anu uxalixu nene'axu no anu xavu­talaxeli uasi.

¹⁵ Laso axone laixe? E uasi. Loxo avikala noxou Mosinge la eni masi axamulinu no anu uleleli ia anu laixe so upalasi no anu xavutalaxeli kalumo. Xe loxo alexe la anu so axamulinu no anu uleleli ia laixe loxo laxu ne upalasi no anu xavutalaxeli kalumo.

¹⁶ Xe ngingi kalumo. Loxo vile uvikala laixe noxou Mosinge no anu vaikala vilemo, la axova? Anu ulenusi uxamulinu vaikala ne ia axova noxi'a tamenexu? Xo loxo ane'i ilavusou vaikala ane muvikala noxou Mosinge no anu uasi, la ivalaxu axova? Xo loxo 'o io la ivikala laixe no anu kaluxusou vaikalaou ia ilavusou laxu to uasi.

¹⁷ Manina, anu vaikala so osa mulemolu noxou Mosinge la laixe, ia anu u'oxonu pakia'a tamenexu uasi.

¹⁸ Mo loxo ngingi la ngavivikala no anu vaikala mose'isi. Ia eni la a'osasou Mosinge xo mulosilo lavulavu so avikala no anu vaikala tavu'alo kena.

¹⁹ Eni alavu axone ia anu mi vitanisi. Xo loxo tatemanu pita ipita xe loxo alexa no anu vaikala iou vilemo ane ilavusou uasi, la anu usu'uline'i axova? Ia loxo pelototo se ataxu ane axuvutalanu lamana mo apalasinoxu noxi'a tamitema no anu vaikalai'a, laso ane. Anu usu'uline'i ane.

²⁰ Tavivilo, xavutalamengi loxo tamolomolo uasi xo ane'i itilovo laixe uasi. Ngaxolu loxo tamitema ane tane'i mukalu. Ia no anu ngiou no anu sususi, la laixe so xoluxo­lungenge loxo takeakeasi. Xo noxi'a la opone'i ututulu no anu susu mo so ukasi'a uasi.

²¹ Xo no anu lavukuou Mosinge la mule­molu vaikalaou Tatananenge aloxo 'o, “No anu anaxa'a tamitema so vaikala iou vilemo la eni avikalane'i laili ano'o. Vaikalaxeli ula no anu anaxa'a taasila axone ia ane'i ilomuxo to uasi.”

²² Laso loxo vaikala iouiou ne anu so sosovo. Ia anu sosovo noxi'a talopala uasi, anu noxi'a ane'i ane ilopala uao. Mo vaikala so pela'a la anu so sosovo kalumo. Ia anu noxi'a talopalamo, anu so si'a ane'i ane ilopala uao uasi.

²³ Laso loxo tatemanu pita ipita io loxo ngingi mukalusi ngavikala no anu vaikala iouiou axone la anu laixe uasi. Xo loxo tamitema noale o ane'i ane ilopala uao i'una la masi i'oxo lexe ngingi talongulongu ane.

²⁴ Ia loxo ngingi mukalusi ngalanu vaikala so pela'a xe tamitema i'una la anu laixe. Xo masi vaikalamengi mukalusi uto'ome'a la ane'i ikulukemolu susu noxi'a.

²⁵ Mo mimi ane italumeu no opone'i la upala'asi. La ane'i ilu'ene'i mo imama'u noxou Mosinge. Mo ivi­kala lamana lexe, “Manina mise­vile, Mosinge molu uxoxolu no taingengi 'o!”

Loxo Mosinge ta'olu ixolu ipita la i'oxonu vuluvulusi uasi

²⁶ Laso tavivilo, telexu axova? Loxo ngapita la nga'oxonu axova? Nga'oxonu aloxo 'o. Anu laixe so se'i ilalaxinu xavutala so lexe se'i xe se'i ilalaxi so ipelototo xe se'i so ilanu vaikala so pela'a xe se'i so ivikala no anu vaikala iou vilemo xe se'i so ixiunu vaikala anene. Mo so axone la mimi mukalusi ne u'oxonu pakia'u lopala noxinge.

²⁷ No anu vaikala iou vilemo ne tamitema tamei o tatalu mososi. Ia loxo ivikala la ikei uasi, ipala­vilene'i. Mo evile so uxiunu vaikalai'a ne.

²⁸ Ia loxo evile so uxiunu uasi la ane'i ivikala no anu vaikala iou vilemo uasi. Ixolu tasiausi mo ivikala noxou Mosinge no opone'isi.

²⁹ Xe tamitema so pela'a la ane'i tamei o tatalusi ilanu vaikala no taingengi. Mo ngingi ngaxolusi so ngalo­munganiou vaikalai'asi.

³⁰ Mo loxo vile utulu uvikalasio xe Mosinge upala'anixu mi vile noxou menexu so ulemolu, la anu ane utulu la utalo. Utalo mo so anu ane vaikala muxali noxou la utulu ulemolusi.

³¹ Mo so no anu vote'i anene la ngingi mukalusi so ngalanu vaikala so pela'a la tianisi so ngavivikala. Xe ane'i loxo ixolu ilomu la ino'u lavulavu mo su'uli laixe.

³² Laso ngingi tamitema so pela'a la ngingi menge ngala­xa'ingengi laixe no anu xaixai anene.

³³ Xo Mosinge ne u'osasou mi ane vuluvulusi uasi. Anu uma­saxau mimi ane ulapau se'isisi laixe. No anu pitapita mukalusi noxi'a tami­temaou Mosinge u'isalili la ane'i imulinu axonesi.

³⁴ Ioxe, mo vile aloxo 'o. Loxo ngapita la tasema ivikala uasi, ixolu tasiausi. Ane'i ilu'ene'i mo ixolu no laxa'a tamulu a loxo lo Mosisi mukaukavunu ulemolu kalumo.

³⁵ Xe loxo ane'i imasaxau ilamana no anu mimi se'i la itali'isi'a tamului'a no tatanisi. Xo loxo tasema ivikala no voxo loxo ngapita la anene laixe uasi.

³⁶ Xo axova so nga'oxonu ilixo iou vilemo noxi'a Mosinge ta'olu latala? Xo vaikalaou Mosinge molu noxinge tei? Uasi, anu musoko'u xo xe mune'e mune'e xo laso muxali noxinge.

³⁷ Laso loxo ngingi mose'i nga'oxo lexe ngingi tamitema so pela'a o xavutala­mengi molu noxou Ulenu Laixe, la ngatilovo laixe. Ngatilovo laixe mo ngatongonu pelototo akaukavunu 'o lexe anu molu noxou Tatanane­ngesi.

³⁸ Ia loxo itema uxililiou vaikala ano'o la ngingi ngalomuxu to uasi.

³⁹ Laso ane, tavivilo. Opongengi ututuluou xaixai ane so pela'asi. Io loxo se'i ivikala no anu vaikala iouiou la nga'apixa'a uasi.

⁴⁰ Nga'apixa'a uasi, ia no anu pita noxinge la ngamulinu vote­vo­te'isou ane laixe mo u'isalilisi.