1 Kolini 13 - Ata New Testament

Vote'i so sexela

¹ Vote'i aloxo 'o. Loxo eni avivi­kala no anu vaikala iouiou noxinge tamitema o vaikalai'a ta'angelo ia loxo asexelaxa'a tamitema uasi, la vaikalaxeli ne mi vitanisi. Eni loxo velo umolo ina vitanisi o latalamu xalusou ane ukuelele vuluvulusi.

² O loxo eni exalisou lavulavu so pela'a no anu Mosinge vaikalou mo alavu no anu lavulavu e mutalume tatei. Mo kalumu loxo lopala noxilo xavinu so uvalanu la'ola'olu usuku no tanitanixu alavua. Ia loxo asexelaxa'a tami­tema uasi la lavulavu ilou lopala ne anu mi vitanisi ane.

³ O loxo eni ano'u mixemixeli mukalusi mo aiti'a ta'oloxola. Mo kalumo loxo tami­tema iveloxu xaixai noxou Mosinge so asoli avile mo i'elaxu vasimelo. Loxo apilixinu mimi­xeli ilou vasimelo axone ia loxo no opoleli manina asexelaxa'a tami­tema uasi la apulelisi ane.

⁴ Ia loxo itema usexelaxa'a tami­tema la u'oxonu aloxo 'o. Oponu lexa noxi'asi mo oponu ututulu so umamatolane'i mo loxo ixalisou mi ma'ia laixe la anu uisuxa'a no anu uasi. Xe anu umomomo so u'itinu ualasou uasi mo utoxu uasi.

⁵ Mo kalumo anu uxolaxola uasi mo oponu utulu so uxalixu masaxa noxoumo uasi. Mo loxo tamitema i'oxo axova noxou la oponu u'avuti uasi. Mo loxo isusunoxu la anu uxavutalanu so ukolinu uasi, umaloxo'usi.

⁶ Itema usexelaxa'a tamitema axone la anu umomomo so u'osasou ili'ilixo ukilikalu uasi, anu u'osasou vaikala ane mula­pusi.

⁷ Mo loxo tu'umaxu uxali la anu uvau oponu tu'umaxu avile uasi. Anu uxolu mo ulopalasi lexe, “Uasi, mi vile uasi. Ili'i la Mosinge uxalixu nene'axu laixe no anu mi ano'o.” Mo so axone la anu utulu pumuxu no anu tu'umaxu anene.

⁸ Ioxe, loxo xaixai so pela'a mo xaixai so lavulavu no anu vaikala laxu la Mosinge utalosou ane. Xe ane so vaikala iouiou ne anu tasiauxu ane. Ia loxo vote'i so sexela ne, la anu umomomo so ukalu uasi manina.

⁹ Xo vaimomo 'o nenge teno'u lavulavu mo vaikala ma'ia so pela'a la talemolu. Ia anene pa'usousi, uxali loloni uao.

¹⁰ Ia ili'i loxo lavulavu uxali maninasou mo loloni, laso ane. Lavulavu utu'utuxu se so vaimomo 'o ne tasiauxu avile.

¹¹ Xo aloxo 'o. Tatei e loxo amolomoloxo, la vaikalaxeli mo xavutalaxeli mo taleli u'isalili noxi'a tamolomolosi. Ia loxo eleme mo exali tatilae laso ane. Epilixinu ili'ilixo noxi'a tamolomolo musu'a avile.

¹² Ioxe, nenge Mosinge ta'olu vaimomo 'o taxolu mo anu loxo tasaxi no anu titilo ia tamaisou loxo xalexa­lexusi. Ia ili'ii laso ane. Nenge tano'u lavulavusou Mosinge manina aloxo tasixisou itema iou u'isalili. No voxo ne talavu manina a loxo anu ulavusinge vaimomo 'o.

¹³ Laso xoluxolungenge aloxo 'o. Ngalopalanu Mosinge mo ngaxo­maiou ngalopalanu voxosou olele mo ngasexelaxa'a tamitema. Mi tatalu ne uxolu no anu mauli noxinge, ia mi ane u'uli'uli avile ane so tasexelaxa'a tamitema.