1 Kolini 12 - Ata New Testament

Ulenu Laixe u'itimenge lavulavu so xaixai iouiou

¹ Ioxe tavivilo, avikalangengi no anu lavulavu so xaixai iouiou Ulenu Laixe u'itimenge xo ama­saxau lexe ngaxovulaulau uasi.

² Ngingi ngalavusou xoluxolu noxinge mi ne ngexolu no isivo­xosio. Ngingi ngelopala no anu momosinge kalavoi ia anu temanu uasi, umomomo so ukolingengi uasi. Ia mi ne mupamupamu­xangengisi.

³ Xolu­xolu noxinge tei axone ia vaimomo 'o avikala lamana noxinge aloxo 'o. Loxo Mosinge anu Ulenu uxolu noxou itema vile la anu umomomo so ulemolu vaikala so mamulo sou Iesua uasisi. Xe itema ane Ulenu Laixe uxoxolu noxou axonesi umomomo so uvikala lexe, “Iesua anu Tatanaleli.”

⁴ Ioxe, noxinge Mosinge ta'olu la nenge taxalisou lavulavu so xaixai iouiou. Ia vote'i so taxalisou ne vilesisi a noxou Ulenu Laixe, xo anu molu u'itimenge.

⁵ La nenge tamomomo so ta'oxonu xaixai iouiou ia nenge ta'oxonu xaixai ne so lexe noxou Tatananenge vilesisi.

⁶ Xe no anu xaixai ne la vote­vote'isou iouiou ia anu Mosinge vilesisi so ulosinge mukalusi xavi no anu.

⁷ Mo Ulenu Laixe upela'inge vilevilesi no anu xaixai vilevilesi. Ia tava'u so u'oxo axone so nenge nenge'a tasu'ulinenge ngato'o.

⁸ Xo aloxo 'o. Se'i so ilanu vaikala so lavulavu ane u'asi'asi xe se'i so ipala'anixu laxu vaikala ne. Ia lavulavu ne molu noxou Ulenu Laixesi.

⁹ Xe se'i so lopala pakia'u manina xe se'i so ipamauline'i tapipiena. Ia mi ne molu noxou Ulenu Laixe kalumo.

¹⁰ Xe se'i so i'oxonu sosovo so xavi xe se'i so ipela'axu Mosinge vaikalaou xe se'i so itongone'i ta'ulenu lexe talaixe o tamasua xe se'i so ivikala no anu vaikala iouiou xe se'i so ixiunu vaikala ne mo ipalasinoxu laxu.

¹¹ Xaixai iouiou ne molu noxou vilesisi e Ulenu Laixesi. Anu uvelunu lavulavu so xaixai anene noxinge vilevilesi no anu masaxa noxousi.

Nenge Mosinge ta'olu pa'upa'usou no anu vasimolu Kalaisiti

¹² Ioxe, mo aloxo 'o. Nenge vasi­menge anu loloni ia no anu la pa'upa'usou tavu'alo. Pa'upa'usou tavu'alo ia uxolu upita la anu vasimolu vilesisi. La noxou Kalaisiti axone kalumo.

¹³ Xo Ulenu Laixe e vilesisi ne, muke­leninenge mupitanenge vilesisi so texali vasimolu Kalaisiti. Loxo nenge Taiuta xe Takiliki xe tami­tema so xaixai vitanisi xe nenge ane taxolu lalavulusi, nenge muka­lusi ne tepita no anu vasimolu. Mo nenge mukalusi loxo teie no anu Ulenu vilesisi ne xo anu a uxolu noxinge mukalusi.

¹⁴ Xo loxo ngelavu. Vasimenge anu pa'usou vilesisi loloni uasi, anu pa'upa'usou piena to.

¹⁵ Mo asolonu latilovo ne aloxo 'o. Loxo itema tava'u uvikala lexe, “Ai, eni itema 'o avolu uasi, laso eni vasimolu pa'usou vile uasi,” anu kalavoisi ane, anu uxolu pa'usou no anu vasimolusi.

¹⁶ O loxo sangalou u'oxo lexe, “Eni iou itema 'o uasi, laso eni vasimolu pa'usou uasi,” anu kalavoi kalumo xo anu pa'usou no anu vasimolu itema ne.

¹⁷ Mo aloxo 'o. Loxo itema vasimolu ne iou ukalusi, la anu ulomu axovae? O loxo vasimolu ne sangalousi la anu utuma'u mi axovae?

¹⁸ Ia uasi, vasimenge axone uasi. Mosinge mu'isali­linoxu vasimenge pa'u­pa'usou no anu tanitanixu mulovosi, mo no anu masaxa noxousi.

¹⁹ Xo loxo itema vasimolu pa'usou vilesisi la anene loxo vasimolu maninasou uasi.

²⁰ La uasi, pa'upa'usou tavu'alo upita so uxalixu vasivasi­menge vilesisi.

²¹ Ioxe, aloxo 'ola. Loxo itema iou uvikalanu avolu lexe, “Eni ano'u su'uli vile noxine uasi,” Uvikala axone la anu manina? O loxo kisou uvikalanu tava'u lexe, “Eni ano'u su'uli vile noxine uasi,” Anene manina?

²² E uasi. Loxo manina la vasimenge pa'upa'usou ane ta'oxo lexe pelepelesousi ne nenge tano'u su'uli no anu tatila.

²³ Xe vasimenge pa'upa'usou se'i tata­xanu uasi mo se'i ne tamai­lamulinu. Ia pa'upa'usou ne tavu'u­linu mo tavilasinu so tata­nuxu laixe.

²⁴ Ia no anu vasimenge pa'upa'usou anene tamailamulinu uasi la tavu'ulinu uasi, uxolu to xo nesi. Mosinge molu muxalixu vasimenge mo so pa'upa'usou ane tataxanu malaxo uasi la tavu'ulinu laixe.

²⁵ Mu'oxo axone mo so vasimenge pa'upa'usou ukalipala lexe se'i ixolu laixe xe se'i masua uasi. Ane'i ixolu ino'u su'uli iou vilesisi noxi'a ngato'o.

²⁶ Mo loxo vasimenge pa'usou uxamulinu navunavu la vasimenge loloni uxamulinu navunavu ne. Xe loxo tavu'ulinu pa'usou no anu la vasimenge loloni uxamuli lexe umauli laixe.

²⁷ Laso axone kalumo, la ngingi vasimolu Kalaisiti xo ngingi pa'upa'usou no anu.

²⁸ Xo Mosinge molu musosovosi'a tate­manu pita noxou so i'oxonu xaixai no anu vilevilesi aloxo 'o. Tei la ane'i ta'aposeli xe ili'i la tamitema so pela'a xe ili'i la tamitema so ilanu vaikala laixe. Mukalu la muso­sovosi'a se'i so i'oxonu sosovo so xavi xe se'i so ipamau­line'i tapi­piena xe se'i so su'uli xe se'i so saxila'u xe se'i so ivikala no anu vaikala iouiou.

²⁹ Xo axova? Nenge mukalusi ta'aposeli o nenge mukalusi tami­tema so pela'a o nenge mukalusi tamitema so talanu vaikala laixe o nenge muka­lusi ta'oxonu sosovo so xavi?

³⁰ Mo kalumo, nenge mukalusi tamitema so tapa­mauline'i tapipiena o nenge mukalusi tavikala no anu vaikala iou iou o nenge mukalusi tami­tema so tapala'anixu laxu vaikala ne? Uasi to!

³¹ Laso avika­langengi lexe mamu so opongengi utuluou xaixai ane nene'axu malaxo uasi. Laixe so opongengi utatamasou lavulavu no anu xaixai ane mutia­tilasi so Mosinge ulo­singe. Ia eni apala'anixu vote'i vile ane u'uli'uli avile.