1 Kolini 11 - Ata New Testament

Pelototo so isu'asou kisi'a

¹ Ioxe, ngingi ngamulinu ilixoleli a loxo eni amulinu ilixou Kalaisiti.

² La eni a'osasinge manina xo ngatetelisou vaika­laxeli mo mi ma'ia epilixinu noxinge la ngala­vusou ngamulaxu no anu xavutala­mengi.

³ Ia mi vilela so ngalamana no anu aloxo 'o. Tamulu la ane'i kisi'a tasemai'a xe Kalaisiti la kisi'a tamulu xe Mosinge la kisou Kalaisiti.

⁴ Laso loxo itema usu'asou kisou ka uvikala noxou Mosinge o upala'anixu Mosinge vaikalaou la anu ulu'enu ualasou kisou e Kalaisiti.

⁵ Ia loxo sema vile ivikala noxou Mosinge o ilemolu vaikala so pela'a mo isu'asou kisie uasi la ane ilu'enu ualasou kisie e mulue. Ane loxo iou vilesisi noxi'a tasema e isalanu kisi'a laxusou.

⁶ Laso loxo sema isu'asou kisie to uasi la iluinu kisie avile. Ia axone la imai­lamulinu. Laso ane, laixe loxo isu'asou kisiesi.

⁷ Isu'asou xo tasema ne so ivalaxu ualasi'a tamului'a. Xe tamulu la isu'asou kisi'a uasi xo ane'i so isosovosou Mosinge mo so ivalaxu ualasou.

⁸ Mo aloxo 'o. Mosinge uxalixu itema no anu vasimele sema uasi. Anu muxalixie no anu itema vasimolusi.

⁹ Xo sema ixolu tei kaio itema uxali so usu'uline uasi. Itema muxolu tei laso Mosinge muxalixie sema so isu'ulinu.

¹⁰ Laso anu laixe so sema isu'asou kisie. Xo axone la ta'angelo isaxisie lexe ilu'ene mo so mulue u'uli laxune.

¹¹ Anene manina ia no anu xoluxolunenge noxou Tatananenge la loxo tasemamo xe tamulumo uasi. Ane'i ixolu so ivalaxa'a ngato'o.

¹² Xo tei la Mosinge muxalixie sema no vasimolu itema. Xe mune'e la tamulu mukalusi ixali no anu vasime'a tasemasi xo no anu lavulo'o. Ia anu Mosinge molu tava'u mauli mukalusi.

¹³ Laso ngingi menge ngatilovo. Loxo sema ivikala noxou Mosinge mo isu'asou kisie uasi la anu mi laixe?

¹⁴ Nenge talavu. Loxo tamulu laxusi'a veveni avile la anu laixe uasi.

¹⁵ Ia loxo sema laxusie veveni axone la anu laixe xo anu tokolomoie ane. Xo Mosinge mulosie laxusie axone so usu'asou kisie.

¹⁶ Ia loxo se'i ixiliou pelototo ano'o la ilavu laixe lexe anenesi ilixo noxinge. Xe no anu pitapita noxou Mosinge mukalusi la ilixo noxi'a axone kalumo.

Pelototo so sosovosou Tatananenge vasimolu

¹⁷ Ioxe, mo apelototosinge no anu mi vilela. Ia no anu ano'o la eni vaikala vile so lexe a'osasingexu uasi manina. Xo no voxo loxo ngapita la nene'axu laixe uasi, masua to!

¹⁸ Vaikala ane tei so mi ne aloxo 'o. Sivo muxali noxilo lexe no voxo so ngapita no anu pita noxinge la ngaxolu ngaka­likalito­tongengi mo ngakusu­kusuinge ngato'o. Elomusou sivo ne la axa­mulinu lexe masi temanu sevile.

¹⁹ Ngakalipala se axone la no anu vote'i anene masi upala'a lamana lexe Mosinge u'osasi'a ta'ei no taingengi.

²⁰ Xo loxo ngapita la nga'oxo lexe nga'oxonu la'ilali so ngasosovosou Tata­nanenge vasi­molu. Ia anene manina uasi.

²¹ Xo ngingi nga'oxonu la'ilali ne vulu­vulusi. Ngingi se'i ngakaolinu ngenge la'ilali ia se'i ixolu iso­lixa'asi. Xe ngingi se'i la ngaiexu uaini mo ngasipaki avilesi.

²² Xo axova? Ngingi tatasinge so nga'ou la'ilalingenge mo ngaie lexa­ngenge no anu uasi? Xo loxo 'o io ngingi ngataxanu pita noxou Mosinge uasi. Mo ngingi ngapa­mailane'i ane'i ane xa'a la'ilali uasi. Ai, eni avikala­ngengi so ilixo­ngengi ne axova? Nge'oxo lexe opoleli u'osa­singexu? Uasi to, mi vile no anene so alemolu vaikala so osa uasi.

Vote'i so tasosovosou Tatananenge vasimolu

²³ Ioxe, vaikala ane eno'u noxou Tatananenge a elemolu noxinge mukalu. Aloxo 'o. No olovoxo e Iutasi mupilixinu Tatananenge Iesua no avo'a ta'uluaou la tei oli'a tatisaipeli mixolu mi'ani. Mixolu mi'ani la anu muno'u pileti vile.

²⁴ Muno'u mukalu la anu muvi­kala laixe noxou Mosinge. Xe muse'inu, la muvikala lexe, “Ano'o vasimelo. Anu so uxalisou mamulo singe. Ngingi nga'oxo ilixo aloxo 'o so xavutalamengi uno'ilo.”

²⁵ Xe mi'ani mukalu la anu muno'u kapu so uaini kalumo mo muvikala lexe, “Kapu so uaini ano'o ne sialuxo. Anu so uxalixu konitalaki alavua. Loxo ngaxolu ngaie no anu kapu aloxo 'o la nga'oxonu ilixo aloxo 'o so xavutalamengi uno'ilo.”

²⁶ Laso ane. Loxo ngaxolu nga'ou pileti mo ngaie no anu kapu so uaini axone, la anu loxo ngalanu vaikala lamana so soli noxou Tatananenge. La ngaxolu nga'oxo axone xo mo umomomo no anu lailivu noxou.

Loxo tasosovosou Tatananenge vasimolu ia tataxanu uasi, la lakolisou tu'umaxu

²⁷ Mi ne mutiatila laso loxo itema vile u'oxonu ilixo so u'ou pileti xe uie no anu kapu ne so usosovosou Tatananenge. Ia loxo u'oxonu vuluvulusi mo utaxanu uasi la anu ususunoxu vasimolu ilou sialuxu Tatananenge ane.

²⁸ Laso laixe loxo tatilovosou oponenge tei kaio ta'ou pileti mo taie no anu kapu.

²⁹ Xo loxo itema u'ou mo uiexu ia oponu umama'u laixe no anu vasimolu Tatananenge uasi, la lakolisou tu'umaxu.

³⁰ Laso maixene mose'i no taingengi pelesi'a mo ipipiena mo se'i misoisoli mukalu.

³¹ Ia loxo tatilovosinge mo tamama'u laixe la lakolisou tu'umaxu uxalisinge uasi.

³² Ia loxo tasusu xe Tatananenge ulosinge tu'umaxu so ulovonixinge axone, la anu laixe xo nenge tamamulo avile loxo tatemanu lialia mukalusi uasi.

³³ Laso tavivilo, loxo ngapita so nga'ani la ngingi se'i nga'uli no anu ani uasi. Ngavisimenge ngato'o so nga'ani ukeisi.

³⁴ Loxo itema vile usolixu manina la laixe loxo u'ani tei no tasou. Xo loxo 'o io nga­pitapita mo anu uxalixu lakolisou tu'umaxu no taingengi. Mimi se'i a uxolusio, ia loxo ili'i ane'e noxinge laso alovonixu.