1 Kolini 10 - Ata New Testament

Talaxa'i laixe xo uasi la tovotovo upalusinge no anu susu

¹ Ioxe tavivilo, eni amasaxau lexe ngingi ngalamana. Xo aloxo 'o. No voxo loxo ta'ilusunenge mixixao no xale lia esi'esi la sauma mu'uli laxune'i so mulosoie'ixu vote'i. Mo kalumo la Mosinge mu'oxonu vote'i so ane'i mukalusi mipolo mivaxa no luaki lauoinu la mixali xalevile.

² La no anu vote'i anenesi la anu loxo latilovo so ilixo so kelele. Xo Mosisi mu'uli laxune'i so mikelele no sauma ilou luaki laso no anu vote'i anene la mupitane'i tamitema mukalusi xe anu oli'a vilesisi.

³ Mo kalumo no voxo ne ane'i mukalusi mi'ani'ani no anu la'ilali ane Mosinge Ulenu mulosi'a.

⁴ Mo ane'i mukalusi miie no anu lexa Mosinge Ulenu mulosi'a no lavo'o. Ia lavo'o ne anu lavo'o vitanisi uasi xo Ulenu mu'oxonu latilovo so Kalaisiti no anu. Mo Kalaisiti molu muxolu no taine'i ne kalumo.

⁵ Mosinge mu'oxonu su'uli tatila noxi'a axone ia ilixo noxi'a mose'i la u'osasou uasi manina. U'osasou uasi laso maixene vasime'a mu'italo vitanisi no xale lia esi'esi ne.

⁶ Ioxe, mimi anene muxali so nenge tano'u lavulavu no anu. Xo ane'i ne, la opone'i muiave mu'i­salili no anu mimi masumasua laso anu laixe so nenge ta'oxo axone uasi.

⁷ Mo mamu so nga'itinu tamitema momosi'a kalavoi a loxo Ta'isilaeli mose'i mi'oxonu tatei. Xo vaikalaou Mosinge mua'aloxu voxo loxo ane'i mi'itinu mosi'a kalavoi. Mo mua'aloxu voxo anene kalumo lexe, “Ane'i mixolu mi'ani mo miie. Mukalu la ane'i mivila'i noxi'a tasemasi.”

⁸ Laso nenge, la ta'oxonu ilixo nuni'u axone uasi. Xo ane'i mi'oxonu axone la no anu aso vilesisi ane'i tamitema 23,000 misoisoli.

⁹ Xe mamu so ta'oxonu susu so tatovonu Kalaisiti lexe ukolinu o uasi. Xo ane'i tatei mi'oxo axone la mixalisou mamulo noxi'a tasineke tamasua.

¹⁰ Xe mamu so ngakalapu aloxo ane'i Ta'isilaeli ne mi'oxonu. Xo mika­lapu la angelo so mamulo muve'a­ve'a tavu'alo misoisoli.

¹¹ Ioxe, vaimomo 'o voxosou kaluxusou lialia 'o nopaxa malaxo uasi. Laso nenge ta'itisou a'alosi'a ta'ilusunge tatei xo uai no anu Mosinge vaikalaou so tano'u lavulavu no anu. Tano'u lavulavu mo talaxa'i­nenge laixe xo masi tapolo no anu ilixo noxi'a.

¹² Ioxe, laso loxo itema vile uxamulinu lexe anu utulu pumuxui la ulaxa'i laixe. Xo masi ulapau ane.

¹³ Tovotovo ma'ia uxalisine la ninisisi uasi, anu uxalisi'a tami­tema latala ane. Ia Mosinge uxiunu oponu noxinge nenge ta'olu uasi. Anu tanunexene mo anu umo­momo so upilixineni so tototovo vile uua'ulixene uasi. Loxo tovotovo aneva uxalisine la anu molu u'oxonu vote'isine so nama­xalexu. Anu molu ulosine xavi mo so tovotovoto ne upalusine no anu susu uasi.

Ta'itinu ualasou Mosingesi, tami se'ila uasi

¹⁴ Laso ane. Eni asexelangenge misevile mo avikalangengi lexe ngingi nga'umolu mo nga'umesou ilixo ane so nga'itinu tamitema momosi'a kalavoi.

¹⁵ Eni avika­langengi aloxo 'o xo alavu lexe ngingi tamitema so lavulavu. Laso ngingi menge ngatilovosou vaika­laxeli 'o.

¹⁶ Loxo nenge tasoso­vosou Kalaisiti sialuxu no anu lexa la tavikalasou laixe noxou Mosinge tei. Ukalu xe taiexu la nenge oponenge vilesisi mo nenge vilesisi no anu sialuxu Kalaisiti. Mo axone kalumo no anu pileti. Loxo tase'i­nenge mo ta'ou la anu upitanenge vilesisi xo nenge vilesisi no anu vasimolu Kalaisiti.

¹⁷ Nenge tavu'alo ia ta'ani no anu pileti vilesisi. Laso no anu vote'i anene tapita vilesisi xo vasimolu Kalaisiti.

¹⁸ Mo aloxo 'o kalumo. Ngaxavu­talane'i Ta'isilaeli. Ane'i mi'ani no anu misoposi ane mi'elaxu no tanixu navu so ulai noxou Mosinge. Mi'ani axone la no anu vote'i anene mipita vilesisi noxou Mosinge.

¹⁹ Ia vaikalaxeli 'o laxu axova? Eni opoleli lexe loxo tamitema ilosou momosi'a kalavoi mimi se'i la uxalixu nene'axu? Uasi to! Momosi'a kalavoi ne manina to uasi.

²⁰ Vaikalaxeli laxu aloxo 'o. Loxo tamitema so isivoxo ilaixu mimi so loxo ilosou momosi'a kalavoi la ane'i ilosou Mosinge uasi ane. Loxo manina la ane'i ilosi'a ta'angelo tamasua ane. Laso opoleli lexe nga'oxo axone uasi xo loxo 'o io ngapita noxi'a ta'angelo tamasua.

²¹ Mamu so ngingi ngaie no anu lexa so usosovosou Tatananenge sialuxu kaio ngaie no anu lexa e misosovosou lexe noxi'a ta'angelo tamasua. Xe mamu so nga'ani no anu la'ilali so usoso­vosou Tatananenge vasimolu kaio nga'ani no anu la'ilali e misoso­vosou lexe noxi'a ta'angelo tamasua.

²² Tatananenge xaviou misevile, laso nenge ta'oxonu ilixo ne so oponu tu'umaxuinge? Ai, tamama'u.

No anu mi ma'ia ta'oxonu la taxavutalanenge uasi, taxavutalane'i tamenexinge

²³ Ioxe, loxo ngingi ngalemolu, “Mi vile so tavu noxinge uasi.” Manina ia mimi se'i so ta'oxonu la usu'uli no anu xoluxolunenge uasi. Mimi mukalusi umomomo so ta'oxonu ia mimi tavu'alo ne u'oxonu pakia'a tavivinge uasi.

²⁴ Laso oponenge utulu so nenge menge taxalisou xoluxolu laixesi uasi. Taxavutalane'i tamenexinge no anu xoluxolu noxi'a.

²⁵ Ioxe, loxo misoposi ma'ia isalimunu no maketi la nalotonu ka na'ousi. Natilitali'i uasi, mo so axone la taneni uauavuti uasi.

²⁶ Taneni uai se'isisi xo loxo ulemolu no anu Mosinge vaika­laou lexe, “Lialia ilou tatemanu muka­lusi noxou Tatananengesi.”

²⁷ Mo kalumo loxo itema Mosinge olu uasi ulinga'ine so ngolou nga'ani la mi noxinesi, nalaisi. Nalai xe loxo ulosine la'ilali ma'ia la na'anisi, nata­litali'isou uasi. Natali'i uasi mo so taneni ukakamuli vote'i uasi.

²⁸ Ia loxo itema vile upela'ine mo so nalavu lexe tamitema milaixu misoposi noxou momosi'a kalavoi tei, la naxolusi. Na'ani uasi xo masi itema ne tanulili lexe anene susu o uasi.

²⁹ A'apixene axone xo tava'u no anu taneni uasi. A'api­xene xo noxou itema olele, xo masi tanu uxovulaulau mo utavulenu tu'u­maxu no anu ani'ani noxine. Avikala axone laso masi opo­ngengi uvikala lexe, “Loxova, eni atilovo laixe mo mi vile usakileli uasi. Ia loxo a'apixo no anu mimi xo tava'u noxou menexilosi, la anu loxo tanu mamulaxu olele upamuxalelisi.

³⁰ Loxo eni avikala laixe noxou Mosinge kaio a'ani laso axova so itema olele uto'omelo no anu mi e opoleli u'osasou noxou Mosinge ne.”

³¹ Laso no anene la avika­langengi aloxo 'o. Loxo nga'ani o ngaie o nga'oxonu mi ma'ia la nga'oxonu so uxalixu mi vilesisi. Ane so uxalixu Mosinge ualasou utilasi.

³² Mo aloxo 'o kalumo. Tange­ngingenge ngato'o. Ngingi Taiuta xe Takiliki xe tatemanu pita noxou Mosinge mukalusi ne, nga'oxonu ilixo ane so uxalixu tu'umaxu no opongengi ngato'o uasi.

³³ Xo noxilo, la eni alavusou a'oxonu ilixo ane tamitema i'osasousi. A'oxonu mi vile so asu'ulilelimo uasi, a'oxonu mi anesi loxo uxalixu su'ulisi'a tavu'alo. Mo so ane'i latala ixalisou pamauli.