1 Kolini 1 - Ata New Testament

¹ Eni Polu a. Eni aposeliou Iesua Kalaisiti a xo Mosinge mu'avalilo no anu masaxa noxou. Nexi noxou vivinge Sosotenisi taxolu 'o mo oponexi vilesisi no anu lapasi 'o.

² Lapasi ano'o so ulai noxinge no anu pita noxou Mosinge no tuala ne Kolini. Ngingi ane mu'avalinge mo mupitangengi noxou Kalaisiti Iesua. Mupitangengi laso mukali­pala­ngengi lexe ngingi tanoxou mu'isa­lili. Ngingi ngoli'a tatemanu tuatuala aneva ilavusou i'itinu ualasou Tatananenge Iesua Kalaisiti. Anu Tatanane'i xe Tata­nanenge.

³ Eni amasaxau lexe ngingi ngaxamulinu iaiama noxou Mosinge anu Maminge ilou Tata­nanenge Iesua Kalaisiti mo so ngaxolu opongengi uai se'isisi.

Polu muvikala laixe noxou Mosinge

⁴ Eni alavusou axavutalangengi mo avikala laixe noxou Mosinge utotomu. Avikala laixe so iaiama mulosinge no anu vote'i e noxou Kalaisiti Iesua.

⁵ Xo ngaxolu noxou laso ngepalava no anu mimi noxou mukalusi. Xo anu Kalaisiti musu'ulingengi no anu lavulavusou mo no anu vaivaikalasou mukalusi.

⁶ Mi ne ngalavu lexe maninasou, xo nexi tea'alomengixu xe opo­ngengi mukasou, laso maixene nene'axu muxali no anu xoluxolu noxinge ne.

⁷ Ngingi ngasoti no anu mi vile laixe so Ulenu ulosinge uasi. Laso vaimomo 'o ngingi ngaxolu opongengi u'olo'olou voxo so Tatananenge Iesua Kalaisiti upala'a.

⁸ Anu molu utetelisinge pakia'u umomomo no anu kaluxu­sou voxosinge. Xo no anu voxo so lailivu noxou la itema vile umomomo so uto'omenge uasi. Ngingi ngaxolu tamalemalenga noxou ane.

⁹ Xo talavu lexe Mosinge uxiunu oponu uasi. Mo mi ne noxoumo, xo anu molu mu'avalinge so ta'una no anu xoluxolu noxou Olu Iesua Kalaisiti anu Tatananenge.

Tu'umaxu muxali no taine'i Mosinge ta'olu ne Kolini

¹⁰ Tavivilo, eni atama pakia'u noxinge no anu ualasou Tatana­nenge Iesua Kalaisiti lexe ngingi mukalusi ngaxolu opongengi vilesisi. Ngingi ngakalipalangengi no taingengi ngato'o uasi. Ngaxolu xavutalamengi vilesisi mo nga­tilovo vilesisi.

¹¹ Xo tavivilo no anu laili noxie Koloe mia'aloxeli lexe ngingi mose'i ngakusuku­suinge ngato'o.

¹² Vaikala so kusukusu ne aloxo 'o. Se'i noxinge ivikala lexe, “Eni amitemaou Polu.” Xe se'i lexe, “Eni amite­maou Apolosi.” Xe se'i lexe, “Eni amitemaou Pita.” Xe se'i lexe, “Eni amitemaou Kalaisiti.”

¹³ Xo axova? Kalaisiti mukalikalipala? Xe eni Polu esoli no ovu valautu so apamaulingengi? Xe mi'oxonu ilixo so kelele noxinge la no anu ualasilo eni Polu? Uasi to!

¹⁴ No taingengi ne eni e'oxonu ilixo so kelele noxi'a Kilisipusi ilou Xaiusisi, se'ila uasi. No anu anene la a'osasou Mosinge.

¹⁵ A'osasou xo itema vile umo­momo so uvikala lexe eni e'oxonu ilixo so kelele no anu ualasilo Polu uasi manina.

¹⁶ E uasi, exavuta­lanu. Eni ekelenixa'a se'ila kalumo, ane'i laili noxou Sitevanasi. Masi ekelenixa'a se'ila o uasi, talelivu­lusi.

¹⁷ Kalaisiti upalusilo so a'oxonu ilixo so kelele uasi, mupa­lusilo no anu xaixai so alanu vaikalasou laixesi. Mo loxo alanu la axilisi mo avilasinu vaikalaxeli uasi, xo loxo 'o io soli noxou Kalaisiti no ovu valautu uxali loxo mi vitanisi.

Vote'i so xavi noxou Mosinge mupala'a a noxou Iesua

¹⁸ Avikala aloxo 'o. Tamitema so imamulo loxo ilomusou vaikalasou soli noxou Iesua no ovu valautu, la i'oxo lexe anene vaikala xovulau­lausi. Ia nenge tamitema ane Mosinge a upa­maulinenge la talo­palanu lexe manina ane. Talopala axone laso maixene vaikala anene vote'isou xavi noxou so upamau­linenge.

¹⁹ Xo no anu Mosinge vaikalaou muvikala aloxo 'o, “Lavulavui'a tamitema so lavulavu la axalixu lexe mi vitanisi. Xe xavutalai'a tamitema takeleva la a'italonu lexe mi vuluvulusi.”

²⁰ Laso nenge tavikala axova so lavulavu toxoxa'a noxi'a takeleva? Xe axova noxi'a tamitema so lavulavu no anu lo xe noxi'a tami­tema so i'itine'i no anu vaivaikala vai­momo 'o? Xo Mosinge muma­xa'u lexe lavulavu so lialia ano'o ne mi vuluvulusi.

²¹ Ioxe, Mosinge mumaxa'u lavu­lavu noxou aloxo 'o. Ane'i tamitema so lavulavu no anu lialia 'o me'a imomomo so ilavusou Mosinge uasi. Ia vaikala e mi'oxo lexe muxovulaulau ne, Mosinge musosovosou lexe anu anesi vote'i so pamauli. Xo aloxo 'o. Nexi talanu vaikalaou laixe xe loxo tamitema ilopalanu, la Mosinge upamauline'i ane.

²² Xo manina. Taiuta imasaxau imaisou sosovo so xavisi xe Takiliki opone'i ututuluou lavulavu lailaixe so imolo.

²³ Ia nexi talanu vaikala so Kalaisiti musoli no ovu valautusi. Vaikala anene mi so Taiuta loxo itulaki no anu xe Takiliki i'oxo lexe vaikala xovulaulau ane.

²⁴ Ia nenge tami­tema Taiuta xe Takiliki ane telo­muxu ava noxou Mosinge la talavu. Talavu lexe xaviou mo lavulavu noxou Mosinge a noxou Kalaisitisi.

²⁵ Xo mi se'i Mosinge u'oxonu ia tamitema ilavu uasi, i'oxo lexe mi ne uxovulaulau mo papaxesi. I'oxo axone ia no anu mi ne la lavulavuou mo xavinu uua'ulixu ane noxi'a tamitema avile.

²⁶ Xo tavivilo, ngingi menge ngaxavutala lexe ngingi tamitema kaini axova ngelomuxu ava noxou Mosinge ne. Xo tavu'alo noxinge ne takeleva no anu mimi so vasimenge uasi. Xe tavu'alo noxinge tatiatila o tamitema so uala tatila uasi.

²⁷ Xo Mosinge musosovosi'a ane'i ane tamitema i'oxo lexe tamolesi. Mo so axone la umaxa'u lexe lavulavu noxi'a takeleva ne mi vitanisi ane. Xe musosovosi'a tamitema loxo mamalaxa'a so umaxa'u lexe xavi noxi'a tatiatila olele ne mi vitanisi.

²⁸ Xe musosovosi'a ane'i ane tamitema i'oxo lexe tami vitanisi o tamosomososi. Usosovosi'a ane'i ino'u uala uasi axone so umaxa'u lexe ualauala tatila ne anu mi vitanisi kalumo.

²⁹ Laso ane. Umomomo so itema vile u'itinu no iou Mosinge uasi manina.

³⁰ Xo Mosinge molu mumulangenge noxou Kalaisiti Iesua. Mo anu anusisi vote'isinge so texalisou lavulavusou Mosinge ane u'asi'asi. Mo noxou Kalaisitisi Mosinge muxalinenge tamalema­lenga mo ukalipalanenge lexe nenge tanoxou mu'isalili. Xo no anu xaixai noxou Kalaisitisi la anu mulotonenge mo mu'ume­nenge no anu mi e mukalavusunenge tei.

³¹ Laso maixene no anu vaikalaou Mosinge uvikala lexe, “Uala vile­sisi so tamitema i'itinu. Uala ane noxou Mosingesi.”