San Mateu 4 - EL Evangelio Segun San Mateo 1861

CAP. IV.

¹ ’N AQUELLA sazon Xesús fo afaláu pel Espritu de Dios al ermu pa que lu tientás el diablu allí.

² Y dempués d’ ayunar cuarenta dis con cuarenta noches, tevo fame.

³ Entós arrimándose á elli ’l tientador díxoi: Si yes el fiu de Dios, dí q’ ises piedres se fagan panes.

⁴ Mas Xesús arrespuendiói: Escrito ’stá: Non de solu pan vive ’l home, sinon de tóa palabra ó mandatu que sal de la boca de Dios.

⁵ Dempués d’ isto arremetió con elli ’l diablu pa la santa ciodá de Xerusalen, y pónxolu so ’l cumbrial del templu,

⁶ Y díxoi: Si ves fiu de Dios tírate dende abaxo. Pos está ’scrito: Que t’ encomiendó á sos ánxeles, que te pornán nes palmes de le’ sos manes, pa que to pié non tropiece contra denguna piedra.

⁷ Arreplicói Xesús: Tamien está ’scrito: Non tientarás al Señor to Dios.

⁸ Entovía lu ’ncaramielló ’l diablu ’n un monte mui empináu: y ensiñói tóos los reinos del mundu, y ’l arrullu d’ illos,

⁹ Y díxoi: Tóes istes coses te daré, si afincándote delantre de min me fexeres acatamientu.

¹⁰ Arrespuendiói entós Xesús: Quítateme d’inde satanás: porq’ escrito ’stá: Adorarás al Señor Dios tuyu, y á elli solu sirvirás.

¹¹ Con iso dexólu ’l diablu; y cata ’quí q’allugáronse los ánxeles, y fin-i los menesteres.

¹² Oyendo dempués Xesús q’ habín prendío á Xuan, esmucióse pa la Galilea:

¹³ Y dexando la ciodá de Nazaré, fo vivir en Cafarnaun, ciodá de la vera del mar, en los llinderos de Zabulon y Netalin:

¹⁴ Con lo que vieno á compliése lo que dixo ’l profeta Isaíes:

¹⁵ La tierra de Zabulon, y la tierra de Netalin, camin de la mar de Tiberíades de la vera d’ allá del Xordan, la Galilea de lo’ xentiles,

¹⁶ Isti pueblu q’ estaba metíu ’n una escuridá, arrecibió una gran clarencia: lluz que vieno allumar á los que vivín ne’ sombres de la morte.

¹⁷ De magar fo isto entamó Xesús á pedricar, y dicer: Fei penitencia: porque ’stá cerquillina ’l reinu de los cielos.

¹⁸ Caminando un día Xesús pe’ la vera del mar de Galilea, vió á dos hermanos, Simon, llamáu Pedru, y Andrés so hermanu, echando la rede na mar, (pos yeren piescadores)

¹⁹ Y díxoyos: Veníi co’ mió, y yo faré que siáis piescadores d’ homes.

²⁰ Y dexando entrambos á dos les redes, antainaron á dir tras d’ elli.

²¹ Diendo mas alantre, aportó á ver utros dos hermanos, Xacobu fiu del Zebedeu, y Xuan so hermanu arremiendando sos redes na barca con so pá ’l Zebedeu: y llamólos.

²² Illos tamien dexáes ’n un verbu les redes, colaron con elli.

²³ Y diba Xesús per tóos los llugares de Galilea, ensiñando ne’ so’ sinagogues, y pedricando l’ evanxeliu ó bona nueva del reinu celestial: y sanando tóa llaceria, y tóa enfermedá nos del pueblu.

²⁴ Con lo que ruxó so fama per tóa la Siria, y presentaben-i tóos los q’ estaben amaláos, y tenín enfermedáes y dolores agudos, los espritáos, los allunáos, los tullíos; y curábalos:

²⁵ Y diba tras d’ elli un verbeneru de xente de Galilea, y Decápoli, y Xerusalen, y Xudea, y de lʼ utru lláu del Xordan.