San Mateu 27 - EL Evangelio Segun San Mateo 1861

CAP. XXVII.

¹ ALLÁ á la mañanica, tóos los príncepes de lo’ sacerdotes y lo’ xueces del pueblu tuvieron conceyu contra Xesús, pa felu morrer.

² Y declarándolu reu de morte, lleváronlu amarráu, y entregáronlu al rexidor ó presidente Ponciu Pilatu.

³ Entós Xúes, el que lu habia vendío, viendo á Xesús condenáu, peraburríu co’ la so fechoría, restituyó les trenta monées de plata á los príncepes de lo’ sacerdotes, y á lo’ xueces,

⁴ Diciendo: Pequé, vendiendo la sangre del xustu. Y dixeron-i illos. ¿Qué mas nos da á nosotros? allá tu.

⁵ Mas elli tirando ’l dineru nel templu, fo, y echándose un ñudu al pescuezu, aforcóse desesperáu.

⁶ Pero los príncepes de lo’ sacerdotes, desq’ apañaron les monées, dixeron: Non podemos echáles nel tesoru del templu, siendo como son preciu de sangre.

⁷ Y tratándolo ’n un conceyu, axustaron con illes el campu d’ un fareru, pa sepultures de los pelegrinos.

⁸ Y per morde d’ isto llamóse aquel campu Hacéldama, quier dicer, campu de sangre, y ansina se llama ogaño.

⁹ Co’ lo que vieno á compliése lo que dixo ’l profeta Xeremíes, que diz: Coyeron les trenta monées de plata preciu del puestu en venta, segun fo tasáu pe’ los fios d’ Israel:

¹⁰ Y empleáronles en la compra del campu d’ un fareru, como me lo disponxo ’l Señor.

¹¹ Desque Xesús estevo delantre del rexidor, entrugói isti, diciendo: ¿Yes tu ’l rei de lo’ xudíos? Arrespuendiói Xesús: Tu lo dicis: sólo.

¹² Y por mas que lu acusaben los príncepes de lo’ sacerdotes, y lo’ xueces, non gurgutó náa.

¹³ Entós díxoi Pilatu: ¿Ello non oyes cuánto dicin contra ti?

¹⁴ Pero elli non i gurgutó tampoco á náa; ansina ye que ’l rexidor estaba perplasmáu.

¹⁵ Tenia ’l rexidor el vezu de soltáyos el dia de la fiesta de la pascua un de los presos, el que quixesen:

¹⁶ Y teniendo á la sazon en ’a cárcel un mui ruxíu, llamáu Barrabás,

¹⁷ Entrugó Pilatu á los que s’ habín axuntáo: ¿Ello á quién queréis que vos suelte, á Barrabás, ó á Xesús, que llamen Cristu ó Mesíes?

¹⁸ Pos sabia que i lu habín entregáo los príncepes de lo’ sacerdotes d’ envidia.

¹⁹ Y ’stando elli empastranáu en so tribunal, unviói á dicer la so muyer: Non te metas en ’es coses d’ isi xustu: pos per morde d’ elli padecí hoi en sueños mil congoxes.

²⁰ Entanto los príncepes de lo’ sacerdotes, y lo’ xueces azuzaron al pueblu pa que pidiés la llibertá de Barrabás, y la morte de Xesús.

²¹ Ansina ye q’ entrugándoyos el rexidor utra vez, y diciendo: ¿A quién queréis que vos suelte d’ entrambos? arrespuendieron illos: A Barrabás.

²² Arreplicóyos Pilatu: ¿Entós qué tengo fer de Xesús, llamáu Cristu?

²³ Dicin tóos: Sia crucificáu. Y ’l rexidor: Pero ¿qué mal fexo? Mas illos entamaron á gritar mas alto diciendo: Sia crucificáu.

²⁴ Co’ lo que viendo Pilatu que non adelantaba náa, sinon qu’ al contra arreciaba mas el barullu, desque mandó trei agua, llavó les manes delantre del pueblu, diciendo: Yo per mi parte só inocente de la sangre d’isti xustu: allá vos componáis.

²⁵ Y arrespuendiendo tóu ’l pueblu, dixo: Caya so sangre so nosotros, y so los nuestros fios.

²⁶ Entós soltóyos á Barrabás: y á Xesús, desque fexo azotálu, pónxolu ne’ sos manes, pa que fos crucificáu.

²⁷ En seguía la soldaesca del rexidor, agarrando á Xesús v poniéndolu na corráa del pretoriu ó palaciu de Pilatu, allugaron al redor d’ elli la cohorte ó compañía tóa entera:

²⁸ Y desvistiéndolu, atapáronlu con un manton de grana;

²⁹ Y enriestrando una corona de ’spines, ponxeron-ila so la cabeza, y una caña per cetru en so mano derecha. Y afincando ’l un xinoyu nel suelu, ensandecínlu, diciendo: Dios te guarde, rei de lo’ xudíos.

³⁰ Y cuspiéndolu, agarraben la caña, y cutín-i na cabeza.

³¹ Y dempués que i fieron burla ansina, quitaron-i ’l manton, y desque i ponxeron otra vez lo’ sos vestíos, entamaron con elli pa crucificálu.

³² Al esfiláse de la ciodá afallaron á un home cirenen, llamáu Simon, y angariáronlu pa q’ arrecostinás co’ la cruz de Xesús.

³³ Y desque vinieron al sitiu que llamen Gólgota, quier dicer, sitiu del calvariu ó de les calaveres,

³⁴ Dieron-i de beber vinu mezcláu con fiel. Mas elli, desque lu ’probó, non quixo bebélu.

³⁵ Dempués que lu crucificaron, repartieron ente sí la so ropa, echando á suertes, pa que se compliés la profecía que diz: Repartieron ente sí la mió ropa, y sortiaron el mió vestíu.

³⁶ Y asentándose cabu elli fin-i la guardia.

³⁷ Y ponxeron-i so la cabeza aquistes palabres que dicín per morde de qué lu habín condenáu: Isti ye Xesús el rei de lo’ xudíos.

³⁸ Tamien crucificaron dos lladrones al empar d’ elli: ’l un á la derecha, y ’l utru á la izquierda.

³⁹ Y los q’ esfilaben per allí blasfemábenlu y ensandecínlu meneando la cabeza, y diciendo:

⁴⁰ ¡Vá vá! tu que basties el templu de Dios, y lu faes en tres dis, sálvate á te mesmu: si yes el fiu de Dios, amiya de la cruz.

⁴¹ Y tamien los príncepes de lo’ sacerdotes, al empar con los escribas y lo’ xueces, lu ensandecín, diciendo:

⁴² A utros salvólos, y á se mesmu non ye capáz de salváse: si ye ’l rei d’ Israel, amiye agora de la cruz, y crerémoslu entós:

⁴³ Estaba enfotáu en Dios: pos sí tanto lu quier, que lu llibre agora, ya q’ elli mesmu dicia: Yo só ’l fiu de Dios.

⁴⁴ Y lo mesmo i echaben en cara los lladrones q’ estaben crucificáos al so par.

⁴⁵ Mas dende la gora sesta fasta la gora de nona pónxose tóa la tierra fecha una ’scuridá.

⁴⁶ Y allá á la gora nona esclamó Xesús con una voz mui grande, diciendo: Eli, Eli, lamma sabacthani? quier dicer: Dios miúyu, Dios miúyu, ¿por qué me desamparaste?

⁴⁷ Y oyéndolo dellos de los q’ estaben per allí, dicín: Isti ’stá llamando á Elíes.

⁴⁸ Y corriendo nel intre un d’ illos agarró una ’sponxa, empapóla en avinagre, y desque la ponxo na punta d’ una verdasca, apurríaila pa que chupás.

⁴⁹ Los utros aldiricaben: Dexái, á ver si vien Elíes á llibrálu.

⁵⁰ Entós Xesús, clamando utra vez con una voz grande y clara, entregó so ’spritu.

⁵¹ Y nel intre ’l velámen del templu se fisgó en dos pedazos d’ arriba a baxo, y la tierra tiembló, y escacháronse les piedres,

⁵² Y abriéronse le’ sepultures, y resuscitaron los cuerpos de munchos santos, q’ habín muerto.

⁵³ Y escabulléndose de le’ sepultures dempués de la resurecion de Xesús, colaron pa la ciodá santa, y aparecieronse á munchos.

⁵⁴ Entanto ’l centurion y los q’ estaben con elli fiendo la guardia á Xesús, desque vieron el bamboleu de la tierra, y les coses q’ acaecín, quedaron perablucáos de miéu, y dicín: Miániques q’ isti yera Fiu de Dios.

⁵⁵ Estaben tamien per allí á lo lloñe munches muyeres, que s’ habín ensertáo con Xesús dende Galilea pa fei los menesteres:

⁵⁶ Y yeren d’ illes María Madalena y María madre de Xacobu y de Xosé, y la madre de los fios del Zebedeu.

⁵⁷ Y como fues ya sero, vieno un home ricu d’ Arimatea, llamáu Xosé, que yera tamien descípulu de Xesús.

⁵⁸ Isti tal allugóse á Pilatu, y pidiói ’l cuerpu de Xesús, y Pilatu mandó dáilu.

⁵⁹ Y Xosé, desque posó ’l cuerpu de Xesús de la cruz, engorropellólu ’n una sábana fresquillina,

⁶⁰ Y pónxolu ’n un sepulcru suyu fechu á picu ’n un peñascu, y que non s’ habia usáo entovía; y entornando una gran llábana, ciarró la porta del sepulcru, y fose.

⁶¹ Estaben allí María Madalena, y la utra María, acurrucáes en frente del sepulcru.

⁶² Al utru dia, que yera ’l de dempués del avíu del sábadu, ó ’l mesmu sábadu, axuntáronse delantre de Pilatu tóos los príncepes de lo’ sacerdotes y los fariseos,

⁶³ Diciendo: A Señor, non se mos escaeció q’ aquel enfallador, estando entovía en vida, dixo: A los tres dis resuscitaré.

⁶⁴ Manda pe’ lo mesmo que se faga guardia al sepulcru fasta ’l dia terceru: non sia quiciáis que vayan pe’ la noche sos descípulos, y lu furten, y ruxan per ente la xentuza: Resuscitó d’ ente los mortos: y sia ’quisti en gañu peyor que ’l utru primeru.

⁶⁵ Arrespuendió Pilatu: Ahí tenéis la guardia, dii, y ponéila como vos pareza.

⁶⁶ Con iso entamando pa ’llá, aseguraron bien el sepulcru, asiñalando la llábana, y poniendo guardies á la ’tisba.