San Mateu 25 - EL Evangelio Segun San Mateo 1861

CAP. XXV.

¹ ENTÓS el reinu de los cielos asemeyaráse á diez vírxines: q’ agarrando le’ sos llámpares, salieron al encuentru del esposu y de la ’sposa.

² D’ illes, les cinco yeren fates, y les utres cinco mui miráes ó prudentes:

³ Pero les cinco fates, al coyer les llámpares, escaecióseyos ’l aceite.

⁴ Mas les prudentes al empar de les llámpares coyeron ’l aceite ne’ sos aceiteres.

⁵ Como ’l esposu se fexés dalgo ronceru en venir, entamó a dayos el pigazu, y á la postre quedaron adormecíes.

⁶ Mas desque vieno la media noche aportóse á oyer una voz que gritaba: Mirái que vien ’l esposu, salíi al camin.

⁷ Nel intre s’ irguieron tóes aquelles vírxines, y aperiaron sos llámpares.

⁸ Entós les fates dixeron á les prudentes: Dá ’cá un poco del vuestru aceite: porque nos muerren les nuestres llámpares.

⁹ Arrespuendieron les prudentes, diciendo: Non sia q’ isti que truximos non algame pa nosotros y pa vosotros, meyor ye que vayáis á los que lu vienden, y lu compréis.

¹⁰ Mas dun illes colaben comprálu, vieno ’l esposu, y les q’ estaben aviáes, enxaretáronse con élli nes bodes, y ciarraron la porta.

¹¹ Vinieron á la postre les utres vírxines tamien, diciendo: Señor, Señor, ábremos.

¹² Pero elli arrespuendiói y dixo: Miániques vos digo que non vos conozo.

¹³ Estái sollertes vosotros pe’ lo mesmo, ya que non sabéis nin el dia, nin la gora.

¹⁴ Porque ’l Señor fará lo mesmo q’ un home que colando pa tierres mui lloñes, llamé á sos criáos, y dióyos lo’ sos bienes,

¹⁵ Al un cinco talentos, á utru dos, y al utru náa mas q’ unu, á cad’ un segun so calter, y fose nel intre.

¹⁶ El q’ arrecibió cinco talentos fo, y negociando con illos, agananció utros cinco.

¹⁷ Del mesmu móu, aquel q’ habia arrecibío dos, agananció utros dos.

¹⁸ Mas el q’ arrecibió un, fose, fozó na tierra, y ’scondió ’l dineru de so señor.

¹⁹ Allá dempués de munchu tiempu tornó á venir ’l amu d’ aquistos criáos, y llamólos á dar cuentes.

²⁰ Y allugándose ’l q’ habia arrecibío cinco talentos, ufriói utros cinco, diciendo: Señor, tu dístime cinco talentos, cata ’quí utros cinco mas, q’ agananció con illos.

²¹ Arrespuendiói so amu: Guapamente, criáu bonu ó llistu, y fiel; porque fuisti fiel no poco, teno ponéte so lo muncho: intra folgáte al empar de to señor.

²² Allugóse ’n seguía ’l q’ habia arrecibío dos talentos, y dixo: Señor, tu dístime dos talentos, aquí te trayo utros dos, q’ agananció con illos.

²³ Díxoi so amu: Guapamente, criáu bonu y fiel; pos fuisti fiel nes coses pequeñes, teno ponéte so utres muncho mayores: intra folgáte al empar de to señor.

²⁴ Allugóse tamien el q’ habia arrecibío un talentu, y dixo: Señor, yo sé que yes un home de calter duru, que siegues ú non semaste, y atropes ú non espardisti:

²⁵ Y ansina, tiemblando perdélu, fui y escondí to talentu na tierra: aquí tienes lo que ye tuyo.

²⁶ Pero so amu, agarrándolu pe’ la palabra, arreplicói y dixo: ¡Ah criáu malu y galbaniegu! tu sabís que yo siego ú non semo, y atropo ú non espardí;

²⁷ Pos pe’ lo mesmo debís tu haber dáo ’l mió dineru á los traficantes, pa q’ al tomar yo arrecibiés mió caudal, y á mas á mas les ganancies.

²⁸ Y ansina, quitái ’l talentu, y dáilu al que tien diez talentos:

²⁹ Porq’ al que tien, ha dásei, y terná abondo: mas al que non tien, fasta ’quello que paréz que tien se i ha quitar.

³⁰ Agora bien, á isi criáu que non val pa náa empovináilu nes tiniebles d’ afora: allí será ’l llantu y ’l ruquíu de dientes.

³¹ Ansinamesmo cuando vénia ’l Fiu del home con tóu so arrullu, y tóos sos ánxeles al empar, asentarase entós nel tronu de so gloria:

³² Y allugará delantre de sí tóes le’ xentes, y estremará los unos de los utros, lo mesmo que ’l pastor estrema les oveyes de los cabritos:

³³ Poniendo les oveyes á la so derecha, y los cabritos á la izquierda.

³⁴ Entós el rei dirá á los q’ estarán á la so derecha: Veníi benditos de mió Pá, intrái nel reinu, que ya ’stá ’periáu pa vosotros de magar hai mundu.

³⁵ Porque yo tevi fame, y diésteisme de xintar: alampaba de sede, y diésteisme de beber: yera güéspede, y diésteisme posáa:

³⁶ Estaba esgarrapetáu, y atropásteisme: malu, y fosteis veme: presu, y veniesteis consolame.

³⁷ Entós arrespuenderán lo’ xustos, diciendo: Pero Señor, ¿cuando te viemos nosotros famientu, y te diemos de xintar: alampando de sede, y te diemos de beber?

³⁸ ¿Cuándo te viemos güéspede, y te diemos posáa: esgarrapetáu, y t’ atropámos?

³⁹ Ó ¿cuándo te viemos malu, ó presu, y te fomos ver?

⁴⁰ Y arrespuenderáyos el rei: Miániques vos digo, que tóes les veces que lo fexesteis con dalgun d’ istos miós hermanos piquirisquinos, comigo lo fexesteis.

⁴¹ Al mesmu tiempu dirá á los q’ estarán á la izquierda: Diivos lloñe de min, malditos, pal fuebu eternu, que fo aperiáu pal diablu, y sos ánxeles ó ministriles:

⁴² Porque tevi fame, y non me diesteis de xintar: alampaba de sede, y non me diesteis de beber:

⁴³ Yera güéspede, y non me diesteis posáa: estaba esgarrapetáu, y non m’ atropasteis: malu y presu, y non fosteis veme.

⁴⁴ Y entós aldiricarán-i los malos! Pero, Señor, ¿cuándo te viemos esfamiáu, ó alampando de sede, ó güéspede, ó esgarrapetáu, ó malu, ó presu, y dexámos de mirar per ti?

⁴⁵ Entós arreplicaráyos elli: Miániques vos digo, que tóes les veces que dexasteis de felo con dalgun d’ istos miós hermanos piquiñinos, dexasteis de felo co’ me mesmu.

⁴⁶ Y ansina istos dirán pal tormentu eternu, y lo’ xustos pa la vida eterna.