San Mateu 24 - EL Evangelio Segun San Mateo 1861

CAP. XXIV.

¹ DESQUE salió Xesús del templu, diba ya andando, cuando se i arrimaron sos descípulos, pa felu arreparar en ’os llabores del templu.

² Pero díxoyos elli: ¿Veis tóo iso? Pos dígovos de cierto, que non ha quedar aquí piedra so piedra.

³ Y ’stando dempués asentáu nel monticu de los Ollivos, allugáronse dellos de los descípulos y entrugaron-i pasiquin: ¿Dímos, cuándo ha ser iso? ¿y cuála será la siñal de to venía, y del fin del mundu?

⁴ Y arrespuendióyos Xesús: Cuidáu que non vos enfalle naide.

⁵ Porq’ han venir munchos en mió nome, diciendo: Yo só ’l Cristu ó Mesíes: y han enfallar á muncha xente.

⁶ Oyeréis ansinamesmo ruxir muncho de batalles, y de barruntos de guerres. Non hai q’ alloriáse per iso: que si bien ye verdá q’ han acaecer aína istes coses, non ye ’ntovía isti ’l cabu.

⁷ Tamien ye verdá que s’ irguirá xente contra xente, y un reinu contra utru reinu, y q’ habrá pestes, y fames, y que dayure bamboliará la tierra.

⁸ Pero tóo isto ye náa mas que ’l escomienzu de les llaceries.

⁹ Entós entregaránvos á lo’ xueces pa que vos atormenten, y faránvos morrer: y non vos podrá ver naide per morde del mió nome o per ser míos descípulos.

¹⁰ Y con isto escandalizaránse munchos, y andarán con falsíes unos pa utros, y non se podrán ver.

¹¹ Irguiránse tamien munchos profetas falseros q’ enfallarán muncha xente.

¹² Y pe’ lo abondo de la maldá, ha esfreceráse la caridá de munchos.

¹³ Mas el q’ aguantás fasta la postre, isi salvaráse.

¹⁴ Entanto pedricaráse isti evanxeliu del reinu de Dios per tóu ’l mundu, en testimoniu pa tóes le’ xentes: y entós verná ’l fin.

¹⁵ Segun iso, cuando aportéis á ver que se ponxo nel llugar santu la maldá asoladora que dixo ya Daniel el profeta (el que lea isto, cálelo bien):

¹⁶ Entós los que viven en Xudea, fuxan pa los montes;

¹⁷ Y ’l q’ está nel techu, non amiye coyer daqué de so casa;

¹⁸ Y ’l que nes eres, non torne buscar la ropa.

¹⁹ ¡Pero ai probes de les preñáes y de les q’ estén criando y non pueden fuxir á gálmios ’n aquellos dis!

²⁰ Pedí pe’ lo mesmo á Dios que non vos toque fuxir nel inviernu o en sabadu en que se puede andar poco:

²¹ Porq’ ha ser tan tremendu ’l alloriamientu d’ entós, que non hebo utru parecíu de magar hai mundu fasta ’gora, nin enxamás lu habrá.

²² Y á non acortáse aquellos dis, non se salvaria dengun; pero han acortáse per morde de los escoyios.

²³ Si ’n isti tiempu vos dixere dalgun: El Cristu o Mesíes está ’quí ó allí, non lu criáis.

²⁴ Porq’ han irguíse cristos y profetas falseros, y han fer grandes maravíes y prodixos; per manera q’ enfallarín fasta los mesmos escoyios (si fora posible).

²⁵ Ya veis que vos lo digo-d’ antemano.

²⁶ Ansina anque vos digan: Mirái q’ el Mesíes está nel ermu, non vayáis allá; ó bien: Mirai q’está ’scondíu en casa, non lo criáis.

²⁷ Porque lo mesmo q’ el rellumu sal del oriente, y se dexa ver nel intre fasta ’l ocidente, ansina ha ser la venía del Fiu del home.

²⁸ Y á ú quiera q’ estuviere ’l cuerpu, allí mesmo s’ apetiguñarán les águiles.

²⁹ Pero lluego dempués del alloriamientu d’ aquellos dis, ha ’tapecése ’l sol, non allumará la lluna, han escorrése les estrelles del cielu, y les virtúes ó los ánxeles de los cielos tiemblarán:

³⁰ Entós asomará nel cielu la siñal del Fiu del home, y al véla plañirán tóes le’ xentes de la tierra: y verán al Fiu del home amiyar so les nubes resplandorientes del cielu con munchu poderíu, y maxestá.

³¹ Y unviará sos ánxeles, que col chirríu d’ una trompeta y una voz mui grande allugarán lo’ sos escoyíos de les cuatro partes del mundu, d’ un cabu al utru cabu del cielu.

³² Adeprendéi de la figal ista comparanza: cuando tien ya tenres les rames, y retueyen les fueyes, conocéis q’ el veranu ’stá ya cerquillina:

³³ Pos lo mesmo vosotros, cuando viereis istes coses tóes, tenéi per cierto q’ el Fiu del home ’stá ya si llega ó non llega, q’ está ya cuasi á la porta.

³⁴ Lo que sí vos aseguro ye que non ha pasar aquista xeneracion, en sin q’ acaeza tóo isto.

³⁵ Colarán los cielos y la tierra, pero les miós palabres non fallarán.

³⁶ Mas en cuanto al dia y á la gora naide lo sabe, nin siquiera los ánxeles del cielu, sinon mió Pá náa mas.

³⁷ Na venía del Fiu del home ha soceder lo mesmo que nos dis de Noé:

³⁸ Porq’ ansina como nos dis aquellos ante ’l dilluviu siguín los homes xintando y bebiendo, xuniéndose y apalabrándose, fasta ’l dia mesmu en que Noé se ’nfiló nel arca,

³⁹ Y nin pe’ les mientes yos dió xamás tal dilluviu fasta que lu tenín enriba, y los arrabañó á tóos: ansinamesmo socederá na venía del Fiu del home.

⁴⁰ ’N aquel entós de dos homes q’ estarán xuntos na era, agarrarán o llibrarán ’l un, y dexarán o abandonarán ’l utru:

⁴¹ Estarán dos muyeres moliendo ’n un molin: y agarrarán o salvrán l’ una, y dexarán o perecerá l’ utra.

⁴² Estáivos sollertes vosotros pe’ lo mesmo, pos non sabéis á qué gora verná vuestru Señor.

⁴³ Tenéi per cierto, que si un padre de families supiés á qué gora lu habia asaltar el lladron, miániques q’ estaria á la ’tisba, y non dexaria minái la casa.

⁴⁴ Pos lo mesmo vosotros debéis estar sollertes: porq’ á la gora menos pensáa, verná ’l Fiu del home.

⁴⁵ ¿Quién cuidéis que ye ’l siervu fiel, y prudente, á quien so Señor ponxo so la so reciella, pa repartir á cad’ un la vianda á so tiempu?

⁴⁶ Bienaventuráu aquel siervu, á quien afallare so Señor fiéndolo ansina, cuando viniés:

⁴⁷ Dígovos miániques, que lu porná so tóa la so facienda.

⁴⁸ Pero s’isti siervu fora malu, y afalucare ’n so corazon: El mió amu non vien tan ceo:

⁴⁹ Y con isto entamáse á cutir á los criáos sos eguales, y á xintar y beber co’ los borrachos:

⁵⁰ Verná ’l amu d’ isti siervu nel dia que ’l non cúida, y á la gora menos pensáa:

⁵¹ Y unviarálu noramala, y empovinarálu al par de los falseros o siervos malos: allí será ’l llantu y ’l ruquíu de dientes.