San Mateu 20 - EL Evangelio Segun San Mateo 1861

CAP. XX.

¹ PORQUE ’l reinu de los cielos aseméyase á un padre de families, q’ al riscar l’ alba salió axustar xornaleros pa so viñéu,

² Y desque s’ axustó con illos nun dineru per cáa dia, unviólos á so viñéu.

³ Saliendo dempués cerca de la gora de tercia, afallóse con utros q’ estaben mano so mano na plaza,

⁴ Y díxoyos: Dii tamien vosotros al mió viñéu, y yo vos daré lo que fues xusto.

⁵ Y ellos colaron. Tornó á salir utres dos veces allá á la gora de sesta y á la gora de nona: y fexo lo mesmo.

⁶ Salió á la postre cerca de la gora undécima, y vió utros q’ entovía ’staben sin fer náa, y díxoyos: ¿Como ’stáis aquí uciosos tóu ’l dia?

⁷ Arrespuendieron-i: Ye que naide nos llamó á xornal. Díxoyos: Pos dii tamien vosotros al mió viñéu.

⁸ Desque atapeció, dixo ’l amu del viñéu á so mayordomu: Llama lo’ xomaleros, y págayos el xornal, encomenzando pe’ los postreros y acabando nos primeros.

⁹ Veníos entós los q’ habín dío cerca de la gora undécima, arrecibieron un dineru cad’ un.

¹⁰ Cuando á la postre allugaron los primeros, barruntaron que yos darín dalgo mas: pero arrecibieron lo mesmo un dineru cad’ un.

¹¹ Y al agarrálu refunfuñaben contra ’l padre de families,

¹² Diciendo: Istos postreros non trabayaron mas q’ una gora, y fexéstelos eguales á nosotros, que sofrímos la xera del día, y del calor.

¹³ Mas elli arrespuendió á un d’ illos: Amigu, non te fago perxuíciu: ¿non t’ axustaste comigo ’n un dineru?

¹⁴ Cueye lo que ye tuyo, y cuela: yo quiero dar á isti, anque sia ’l últimu, lo mesmo q’ á ti.

¹⁵ ¿Quiciáis non puedo yo fer de lo miúyo lo que quiero? ¿ó ha ser to güeyu malu ó envidiosu, porque yo só bonu?

¹⁶ Ansinamesmo los postreros ’n isti mundu han ser los primeros nel reinu de los cielos, y los primeros postreros: pos munchos son los llamáos, y pocos los escoyíos.

¹⁷ Y esfilando Xesús pel camin de Xerusalen, aseparó pa una vera á sos doce descípulos, y díxoyos:

¹⁸ Mirái que vamos pa Xerusalen, á ú ’l Fiu del home ha ser entregáu á los príncepes de lo’ sacerdotes y á los escribas, y condenaránlu á morte,

¹⁹ Y entregaránlu á lo’ xentiles pa que lu ’nsandezan, y lu azoten, y lu ’nclaven ’n una cruz; mas elli ha resuscitar al tercer dia.

²⁰ Entós la madre de los fios del Zebedeu acurrióse pa elli con sos dos fios, y féxoi acatamientu, aparentando querer pedíi dalgun favor.

²¹ Xesús díxoi: ¿Qué quies? Illa arrespuendiói: Dispón q’ istos miós dos fios s’ asienten nel to reinu, ’l un á la to derecha, y ’l utru á la to izquierda.

²² Mas Xesús diói pe’ rempuesta: Non sabéis lo que pedís. ¿Podéis beber el cáliz de la pasion que yo tengo de beber? Dicin-i: Bien podemos.

²³ Arreplicóyos: El mió cáliz miániques que lu hais beber: mas ’l asentávos á mió derecha ó izquierda non ye cosa miúya ’l concedévoslo á vosotros, sinon que será pa ’quellos pa quienes mio Pá lo tien aperiáo.

²⁴ Desq’ oyeron isto los utros diez apóstoles, enritáronse contra los dos hermanos.

²⁵ Mas Xesús llamólos cabu sí, y díxoyos: Bien sabéis que los príncepes de le’ xentes dominen á lo’ sos pueblos: y que lo’ so’ señores yos manden con imperiu.

²⁶ Non ha ser ansina ente vosotros: sinon que quien quixere ser mayor ente vosotros, debe ser vuestru criáu:

²⁷ Y ’l que quixere ser ente vosotros el primeru, ha ser vuestru siervu:

²⁸ Del mesmu móu que ’l Fiu del home non vieno pa que lu sirviesen, sinon pa servir elli, y pa dar so vida pa la redencion de munchos.

²⁹ Al colar de Xericó, enxaretóse con elli un gran xentíu:

³⁰ Y cata ’quí que dos ciegos q’ estaben currucáos cabu ’l camin, desque atolenaron que colaba per allí Xesús, entamaron á ’pellidar, diciendo: A Señor, a fiu de Daví, teni llástima de nosotros.

³¹ Mas le’ xentes arregañábenyos pa que callasen. Pero illos daben entovía mayores gritos, diciendo: A Señor, a fiu de Daví, teni llástima de nosotros.

³² Aparóse entós Xesús, y llamándolos, díxoyos: ¿Qué queréis que vos faga?

³³ Señor, i arrespuendieron illos, que se mos abran los güeyos.

³⁴ Y llastimáu Xesús, tocóyos los güeyos. Y nel intre vieron, y s’ enfilaron con elli.