San Mateu 18 - EL Evangelio Segun San Mateo 1861

Cap. XVIII.

¹ ’N ISTA mesma ocasion allugáronse los descípulos á Xesús, y entrugaron-i: ¿Quién cúides que será ’l mayor nel reinu de los cielos?

² Y Xesús, llamando cabu sí á un niñin, pónxolu metanes d’ illos,

³ Y dixo: Miániques vos digo, que si non vos convertís y feis lo mesmo que niñinos en lo morosico y humilde, non vos enfilaréis nel reinu de los cielos.

⁴ Y ansina quienquiera que s’ humillare como isti niñin, aquisi será ’l mayor nel reinu de los cielos.

⁵ Y ’l q’ arrecibiere á un niñin tal cual acabo de dicer, en mió nome, á min m’ arrecibe:

⁶ Mas quien escandalizare á un d’ aquistos parvulinos, que cren en mió, meyor i fora que i amarrasen al cuellu una d’ aquises piedraces de molin que mueve un asnu, y ansina lu echasen en ’o mas fondo de la mar.

⁷ ¡Ai probe del mundu per morde de los escándalos! Pos si ye verdá que tien q’ haber escándalos; á pesar d’ iso ¡probe del home que causa ’l escandalu!

⁸ Que si to mano ó ’l to pié ye pa ti ocasion d’ escandalu ó pecáu, frádalos y tíralos lloñe de ti: pos mas te val enfiláte na vida eterna mancu ó coxu, que con dos manes ó dos piés ser echáu nel fuebu eternu.

⁹ Y si to güeyu ye pa ti ocasion d’ escandalu, arríncalu y tíralu lloñe de ti: meyor te ye intrar na vida eterna con un güeyu náa mas, que tener dos güeyos, y ser echáu nel fuebu del infiernu.

¹⁰ Mirái que non despreciéis á dalgun d’ aquistos piquiñinos: porq’ hais saber que sos ánxeles de guardia nos cielos están siempre viendo la cara de mió Pá celestial

¹¹ Y al endefetu ’l Fiu del home vieno salvar lo q’ habia perecío.

¹² Si un home tien cien oveyes, y una d’ illes se desveredare, ¿qué vos paréz que fará entós? ¿non dexara les noventa y nueve nos montes, y dirá en busca de la que se desveredó?

¹³ Y si por fortuna la ’falla, miániques vos digo que se fuelga mas con ista que co’ les noventa y nueve que non se i desveredaron.

¹⁴ Ansinamesmo, non ye voluntá de vuestru Pá, q’ está nos cielos, el que pereza un solu d’ istos piquiñinos.

¹⁵ Que si to hermanu pecare contra ti ó fexere daqué malo, cuerre y arrepréndelu ente ti y elli náa mas: si t’ ascucha, habrás agananciáo á to hermanu:

¹⁶ Si non fexere casu de ti, valte ’ntovía d’ una, ó dos persones, pa que coste tóo pe’ la boca de dos ó tres testigos.

¹⁷ Y si non los ascuchare, dílo á la iglesia: pero si nin á la mesma iglesia oyere, tenlu per xentil y publicanu.

¹⁸ Miániques vos aseguro, que tóo lo que lligareis so la tierra, será lligáo al empar en el cielu: y tóo lo que deslligaréis so la tierra, será deslligáo al empar en el cielu.

¹⁹ Dígovos entovía mas: que si dos de vosotros s’ axuntasen so la tierra pa pedir dalguna cosa, mas que sia lo que sia, faráyosla mió Pá q’ está nos cielos.

²⁰ Porque á ú ’stan axuntáos dos ó tres en mió nome, está yo allí metanes d’ illos.

²¹ Entós, arrimándosei Pedru, entrugói: A Señor, ¿cuántes veces teno perdonar á mió hermanu cuando pecare contra min? ¿fasta siete veces?

²² Arrespuendiói Xesús: Non te digo yo fasta siete veces, sinon fasta setenta veces siete, ó cuantes t’ ofendiere.

²³ Per isto ’l reinu de los cielos s’ asemeya á un rei que quixo axustar cuentes con sos criáos.

²⁴ Y desque empezó á ’xustáles, vieno un que i debia diez mil talentos.

²⁵ Y como non tuviés onde los sacar, mandó so señor que lu vendiesen á elli, y á la so muyer, y á lo’ sos fios con tóa so facienda, y q’ ansina se i pagás la deuda.

²⁶ Entós el criáu, afincándose delantre d’ elli, pedíai diciendo: Teni pacencia per un poco, que yo te lo pagaré tóo.

²⁷ Llastimáu ’l señor d’ aquel criáu, dexólu llibre, y á mas perdonói tóa la deuda.

²⁸ Mas apenes salió isti criáu de so presencia, afalló á un de sos compañeros que i debia cien dineros; y echándoi les manes al pescuezu afurfugábalu diciéndoi: Págame lo que me debes.

²⁹ El compañeru afincándose á sos piés, pedíai diciendo: Teni un migayin de pacencia co’ mió, que yo te lo pagaré tóo.

³⁰ Mas elli non fexo casu, sinon que fo y encaxólu na cárcel fasta que i pagás lo que i debia.

³¹ Al ver los utros criáos sos compañeros lo que pasaba, dióyos una gran señardá: y colaron cuntar á so señor tóo lo acaecío.

³² Entós llamólu so Señor, y díxoi: ¡Ah mal criáu! perdonéte yo tóa la deuda porque me lo pedisti.

³³ ¿Non yera entós razon que tuvieses tu tamien llástima de to compañeru, como yo la tevi de ti?

³⁴ Y enritáu ’l señor entrególu en manes de los verdugos, pa que lu atormentasen fasta que pagás tóa la deuda sin dexar náa.

³⁵ D’ isti móu mesmu fará mió Pá celestial con vosotros, si cad’ un non perdonare á so hermanu de tóes les veres de so corazon.