San Mateu 17 - EL Evangelio Segun San Mateo 1861

CAP. XVII.

¹ SES dis dempués tomó Xesús consigo á Pedru, y á Xacobu, y á Xuan so hermanu, y subiéndose á un monte empináu con illos náa mas:

² Trasfeguróse ’n so presencia. Y pónxose so rostru resplandorientu como ’l sol, y sos vestíos blancos lo mesmo que la ñeve.

³ Y nel intre se yos aparecieron Moisés y Elíes afalucando con elli de lo q’ habia padecer en Xerusalen.

⁴ Entós Pedru tomando la palabra, dixo a Xesús: A Señor, bono ye ’stámos aquí: si te paréz, fagamos aquí tres cabañes, una pa ti, utra pa Moisés, y utra pa Elíes.

⁵ Entovía ’staba Pedru falando, cuando amiyó una nube resplandorienta que los atapó. Y dexóse oyer al mesmu tiempu dende la nube una voz que dicia: Isti ye ’l mió Fiu queríu, en quien yo me fuelgo perdafecho: ascucháilu.

⁶ Al oyéla los descípulos cayeron de cara nel suelu, y quedaron espavoríos percompleto.

⁷ Mas allugóse á illos Xesús, tocólos, y díxoyos: Irguíivos, y non vos amedrentéis.

⁸ Y alzando los güeyos, non vieron á naide mas q’ á Xesús.

⁹ Y al amiyar del monte, mandóyos una cosa, diciendo: Non digáis á naide lo que viesteis, fasta que ’l Fiu del home resuscite d’ ente los mortos.

¹⁰ Y entrugaron-i los descípulos ¿Entós como dicen los escribas q’ ha venir primero Elíes?

¹¹ A isto arrespuendióyos Xesús: Ye verdá q’ Elíes ha venir antes de mió segunda venía, y entós recomporná tóes les coses.

¹² Pero yo dígovos q’ Elíes ya vieno, y non lu conocieron, sinon que fexeron con elli tóo cuanto quixeron. Ansina tamien farán illos padecer al Fiu del home.

¹³ Entós cayeron los descípulos en que yos falára de Xuan Bautista.

¹⁴ Desque llegó á ó lu ’speraben le’ xentes, vieno un home, y afincándose de xinoyos delantre d’ elli, díxoi: A Señor, teni llástima del mió fiu, porque ye allunáu, y padéz muncho: pos cai á menudo nel fuebu, y á cáa pásu nel agua:

¹⁵ Y ufrílu á los tos descípulos, y non podieron curálu.

¹⁶ Xesús dixo en rempuesta: ¡Ah castra sin fe y permala! ¿fasta cuándo tengo vivir con vosotros? ¿fasta cuándo vos tengo aguantar? Tréimelu pa ’cá.

¹⁷ Y Xesús amenazó al demorgu, y dexó al rapaz, que quedó sanu nel intre.

¹⁸ Entós los descípulos falaron-i á parte á Xesús, y dixeron-i: ¿Per morde de qué non podiemos esconxurálu nosotros?

¹⁹ Arrespuendióyos Xesús: Porque tenéis poca fe. Pos miániques vos aseguro que si tuviereis fe, náa mas que com’ un graniquin de mostaza, podreís dicer á isi monte: Cuérrete de ’quí pa ’llá, y cuerreráse, y náa vos será imposible.

²⁰ Y arriendes d’ isto, porque tal castra de demorgos non se llanza sinon pe’ la oracion, y ’l ayunu.

²¹ Estaben illos en Galilea, y díxoyos otra vez Xesús: El Fiu del home ha ser entregáu en manes de los homes.

²² Y mataránlu, y resuscitará al tercer dia. Y dió isto una señardá pergrande á los descípulos.

²³ Desque llegó á Cafarnaun, arrimarónse á Pedru los que cobraben el tributu de les dos drames, y dixeron-i: ¿Ello vuestru Maestru non paga les dos drames?

²⁴ Sí, bon, sí, respuendió. Y como intrás en casa, entrugói primero Xesús, diciendo: A Simon, ¿qué te paréz? Los reyes de la tierra, ¿de quién cobren tributu ó censu? ¿de sos mesmos fios, ó de los aneyos?

²⁵ De los aneyos, dixo élli. Arreplicó Xesús: Entós los fios están llibres.

²⁶ Con iso y tóo, pa que non los escandalicemos, cuerre á la mar y echa ’l anzuelu, y agarra ’l primer piescáu que saliere, y desque i abras la boca, afallarás una pieza de plata de cuatro drames; apáñala, y dáyosla per min, y per ti.