San Mateu 14 - EL Evangelio Segun San Mateo 1861

CAP. XIV.

¹ PER aquel tiempu Heróes el tetrarca aportó oyer lo que ruxín de Xesús:

² Y dixo á sos cortesanos: Isti ye Xuan el Bautista, que resuscitó d’ ente los mortos, y por iso resplande tanto ’n elli la virtú de fer milagros.

³ Hai que saber q’ Heróes prendío á Xuan, y amarráu con cadenes encaxólu na cárcel per morde d’ Herodíes muyer de so hermanu.

⁴ Porque Xuan dicíai: Non te ye llícito tenéla per muyer.

⁵ Y Heróes bien queria facélu morrer, pero non s’ atrevia per miéu del pueblu: porque tóos tenín á Xuan per un profeta.

⁶ Mas nel festexamientu del compliaños d’ Heróes, salió bailar la fia d’ Herodíes metanes de la corte; y gustói tanto á Heróes,

⁷ Que prometiói con xuramentu dai cualquier cosa que i pidiés.

⁸ Con iso illa, socatráa ya por so ma: Tráime aquí, dixo, ’n una fonte ó platu la cabeza de Xuan Bautista.

⁹ Dió señardá isto al rei: mas per morde del xuramentu, y de los convidáos, mandó dáila.

¹⁰ Y ansina unvió á degollar á Xuan en ’a cárcel.

¹¹ Nel intre truxeron so cabeza ’n una fonte, y diéronla á la rapaza, que i la ufrió á so ma.

¹² Acudierou dempués sos descípulos á recoyer el cuerpu, y sepultáronlu, y colaron dai á Xesús la noticia.

¹³ Xesús desque oyó aquello q’ Heróes dicia d’ elli, esmucióse d’ allí pe’ la mar á un ermu, fora de pobláu: mas sabiéndolo le’ xentes, salieron de les ciodáes, siguiéndolu á pié per tierra.

¹⁴ Y al amiyáse del barca, viendo tantu xentíu, llastimóse d’ illos, y curó sos enfermos.

¹⁵ Allá á la tardica, allugáronse á elli sos descípulos, diciendo: Isti llugar ye un ermu, y la gora ye avanzaíca ya: despacha aquise’ xentes pa que vayan á los pueblos á comprar daqué que comer.

¹⁶ Pero díxoyos Xesús: Non tienen menester d’ ise: dayos vosotros de comer.

¹⁷ A lo que arrespuendieron-i: Non tenemos aquí mas que cinco panes y dos piescaúcos.

¹⁸ Díxoyos Xesús: Apurrímelos pa ’cá.

¹⁹ Y desque mandó asentáse á tóos so la yerba, agarró los cinco panes y los dos piescáos, y allevantando los güeyos al cielu bendíxolos, y espedazólos, y dió los panes á los descípulos, y los descípulos diéronlos á la xente.

²⁰ Y comieron tóos, y fartucáronse, y de lo que sobró apañucaron doce copinos acorrompináos de garitos.

²¹ El númeru de los que comieron fo de cinco mil homes, en sin cuntar les muyeres y los niñinos.

²² Dempués d’ isto Xesús fexo á sos descípulos embarcáse nel intre, y dir esperálu á la vera d’ allá del llagu, en tanto q’ elli despachaba á la xente.

²³ Y desque la despachó, subióse orar solu ’n un monte, y atapecío ya, mantévose solu allí:

²⁴ En isto la barca ’staba metanes la mar arremetía de los cachones con gran furia, porque tenín vientu de contra.

²⁵ Allá á la cuarta vela de la noche, vieno Xesús á ó ’staben, andando so la mar.

²⁶ Y atisbándolu los descípulos andar so la mar, plasmaron, y dixeron: Ye una fantasma. Y atochecíos de miéu, entamaron á dar gritos.

²⁷ Nel intre yos faló Xesús, diciendo: Cobrái ánimu: só yo, non tengáis miéu.

²⁸ Y arrespuendió Pedru: A Señor, si yes tu, mándame dir pa ’hí so les agües.

²⁹ Y díxoi elli: Veni. Y amiyando Pedru de la barca, diba andando so lʼ agua pa ’llugar á Xesús.

³⁰ Pero viendo la furia del vientu, asustóse: y empezando lluego á fundíse, dió un gritu diciendo: Sálvame, Señor.

³¹ Nel intre Xesús, espurriendo la mano, agarrólu del brazu, y díxoi: Home de poca fe, ¿por qué dudaste?

³² Y desque se ’smucieron en ’a barca, aparó ’l vientu.

³³ Mas los q’ estaben adientro, arrimáronse á elli y adoráronlu, diciendo: Miániques que yes el Fiu de Dios.

³⁴ Atravesáu lluego ’l llagu, arribaron á tierra de Xenesaré.

³⁵ Y como lu conociesen los d’ ista tierra, lluego unviaron avisu per tóu aquel cotarru, y truxeron-i tóos los amaláos:

³⁶ Y pedín-i per favor el tocar náa mas q’ el ruéu de so vestíu. Y cuantos lu tocaben, tantos quedaben sanos.