San Mateu 12 - EL Evangelio Segun San Mateo 1861

CAP. XII.

¹ ’N AQUEL tiempu, pasando Xesús nel dia de sábadu al par d’ unes eres, lo’ sos descípulos, que tenín fame, entamaron á ’scamochar espigues, y esmorgar los granos.

² Y atisbándolo los fariseos, dixeron-i: Míra que tos descípulos faen lo que non se puede fer en sábadu.

³ Pero elli arreplicóyos: ¿Non leyesteis lo que fexo Daví, cuando elli y los que lu acompañaben se vieron escorrexáos de fame;

⁴ Como s’ enfiló na casa de Dios, y xintó los panes de la proposicion, que non podín xintar nin elli nin los suyos, sinon lo’ sacerdotes náa mas?

⁵ ¿O non leyesteis en ’a llei, que lo’ sacerdotes trabayen nel templu ’l sábadu, y per iso non pequen?

⁶ Pos dígovos yo, q’ aquí ’stá un que ye mayor que ’l templu.

⁷ Que si sopieseis vosotros, que quier dicer: Mas quiero la misericordia, que non el sacrificiu: enxamás hubieseis condenáo á los inocentes.

⁸ Porque ’l Fiu del home ye amu tamien del sábadu.

⁹ Y desque coló d’ allí, encaxóse na sinagoga d’ illos,

¹⁰ Ú ’staba un home, que tenia seca una mano; y entrugaron á Xesús, pa ’fallar motivu d’ acusálu: ¿Ello ye permitío curar en sábadu?

¹¹ Mas elli díxoyos: ¿Habrá daquién ente vosotros, que tenga una oveya, y s’ ista s’ enfoscare ’n un pozu en sábadu, non la ’llevante y la saque afora?

¹² ¿Pos cuánto meyor ye un home, q’ una oveya? Entós puede facése bien en dia de sábadu.

¹³ Y dixo al home: Espurri isa mano. Espurrióla, y quedó tan correcha como lʼ utra.

¹⁴ Mas los fariseos desque salieron, axuntáronse pa urdir trames contra elli, y perdélu.

¹⁵ Pero Xesús sabiendo isto esmucióse d’ allí: y enriestráronse munchos enfermos tras d’ elli, y curólos á tóos:

¹⁶ Mandándoyos que non lu descubriesen.

¹⁷ Con lo que se complió lo que dixo ’l profeta Isaíes, que diz:

¹⁸ Cata ’quí ’l mió siervu, á quien yo escoyí, el mió amáu, en quien mi’ alma se fuelga perdafecho. Porné so elli mió ’spritu, y ensiñará la xosticia á le’ xentes.

¹⁹ Non riñirá con naide, non será llingüateru, nin oyerá dangun la so voz, ó gritar en ’es places:

²⁰ Non bastiará la verdasca solmenáa, nin matará dafecho la torcía q’ entovía ’fuma, fasta que faga vencer la xosticia de so causa:

²¹ Y han enfotáse tóes le’ xentes nel so nome.

²² Truxeron-i entós un espritáu, ciegu, y mudu, y de tal móu lu curó nel íntre, que comenzó á falar, y ver.

²³ Con lo que tóa la xente quedó empapielláa, y dicia: ¿Ello ye isti quiciáis el fiu de Daví, el Mesíes?

²⁴ Al oyélo los fariseos, aldiricaben ansina: Isti non llanza los demorgos sinon pel arte de Belzebú, príncepe de los demorgos.

²⁵ Entós Xesús adivinando sos pensamientos, díxoyos: Tóu reinu dividíu en faiciones contraries, esñizaráse; y tóa ciodá, ó casa dividía en bandos, non podrá mantenése.

²⁶ Y si satanás echa fora á satanás, ye contrariu á se mesmu: ¿como entós s’ ha mantener so reinu?

²⁷ Que si yo llanzo los demorgos pel arte de Belzebú, los vuestros fios ¿pel arte de quién los llancen? Per iso aquisos mesmos serán vuestros xueces.

²⁸ Mas si llanzo los demorgos en virtú del espritu de Dios, entós ya vieno ’l reinu de Dios ó ’l Mesíes á vosotros.

²⁹ Y sinon, dicíime: ¿como puede ser q’ un se ’smuza na casa de dalgun home forzudu, y róbei sos bienes, si aína non amarra al forzudu? entós podrá esfarrapái la casa.

³⁰ Aquelli que non ye co’ mió, contra mió ye: y ’l que comigo non cueye, esparrama.

³¹ Dígovos pe’ lo mesmo: Que cualquier pecáu y cualquier blasfema se perdonará á los homes, pero la blasfema contra ’l espritu de Dios non se perdonará tan fácil.

³² Ansinamesmo á quienquiera que dixés daqué contra ’l Fiu del home, perdonarásei; pero ’l que lo dixés contra ’l Espritu santu, non se i perdonará, nin en ista vida, nin en ’a utra.

³³ O dicíi que ye bonu ’l árbol, y bonu so frutu: ó si tenéis el árbol per malu tenéi tamien per malu so frutu: ya que pel frutu se ’strema la calidá del árbol.

³⁴ ¡Ah castra de víbores! ¿como hais poder falar cosa bona, siendo, como sois, malos? si la boca fala de lo abondo del corazon.

³⁵ ’L home bonu saca bones coses del bon fondu de so corazon: y ’l home malu saca coses males de so mal fondu.

³⁶ Dígovos, que fasta de tóa palabra uciosa, que falaren los homes, han dar cuenta nel dia del xuíciu.

³⁷ Pos per tos palabres ha’ ser xostificáu, y per tos palabres condenáu.

³⁸ Entós dalgunos de los escribas y fariseos aldiricaron-i, diciendo: A Maestru, quixéramos vete fer dalgun milagru.

³⁹ Mas elli arrespuendióyos: Aquista castra mala y adúltera pide un prodixu; pero non se i dará ’l que pide, sinon el prodixu de Xonás profeta.

⁴⁰ Porq’ ansina como Xonás estevo nel vientre de la ballena tres dis, y tres noches; ansina ’l Fiu del home ’stará tres dis, y tres noches nes entrañes de la tierra.

⁴¹ Los de Nínive irguiránse nel día del xuíciu contra ’quista castra d’ homes, y condenaránla: porq’ illos fexeron penitencia á la pedricacion de Xonás. Y mirái cuánto meyor que Xonás ye isti q’ está ’quí.

⁴² La reina del mediudía fará de testign nel dia del xuíciu contra ’quista castra d’ homes, y condenarála: porque vieno de lo cabero de la tierra, pa ’scuchar la sapiencia de Salomon, y mirái cuánto meyor que Salomon ye isti q’ está ’quí.

⁴³ Cuando ’l espritu ¡mundu se ’smució de dalgun home, anda vaguiando per llugares areniscos, catando ó folgáse, y non afalla daqué.

⁴⁴ Entós diz: Tornaré á mió casa, onde me ’smucí. Y tornando á illa atópala vaciáa, bien barriica, y empaxelláa.

⁴⁵ Con iso cuela, y lleva al empar utros siete ’spritus peyores q’ elli, y enfilándose ’n illa viven allí: y ansina la postre d’ aquisti home ye ’ntovía mas llastimosa q’ el escomienzu. Pos ansina ha pintar á ista castra d’ homes perdafecho mala.

⁴⁶ Entovía ’staba platigando al pueblu, y cata ’quí que so ma y sos hermanos estaben fora, que querín falái.

⁴⁷ Y díxoi un: Míra que to ma, y tos hermanos están ’hí fora entrugando per ti.

⁴⁸ Pero elli arrespuendiendo al que i lo decia, arreplicó: ¿Quién ye mió ma, y quiénes son miós hermanos?

⁴⁹ Y espurriendo la mano pa sos descípulos: Istos, dixo, son mió ma, y miós hermanos.

⁵⁰ Porque quienquiera que fexere la voluntá de mió Pá, q’ está nos cielos, aquisi ye mió hermanu, y mió hermana, y mió ma.