San Mateu 11 - EL Evangelio Segun San Mateo 1861

CAP. XI.

¹ DESQUE Xesús peracabó de dar aquistes lleciones á sos doce descípulos, coló d’allí pa ensiñar y pedricar en ’es ciodáes d’ illos.

² Pero Xuan desque oyó na prision les obres maravioses de Cristu, un vió dos de sos descípulos á entrugái:

³ ¿Yes tu ’l Mesiés q’ ha venir, ó hemos esperar utru?

⁴ A lo que arrespuendióyos Xesús: Dii, y cuntái á Xuan lo q’ oyesteis y viesteis.

⁵ Los ciegos ven, los coxos anden, los lleprosos queden llimpios, lo’ sordos oyen, los mortos resusciten, pedrícase ’l evanxeliu á los probes:

⁶ Y biénaya ’quel que non temás de min motivu d’ escándalu.

⁷ Lluego que colaron istos, entamó Xesús á falar de Xuan, y dixo al pueblu: ¿Qué ye lo que saliesteis ver al ermu? ¿dalguna verdasca solmenáa pel vientu?

⁸ Sinon dicíime: ¿Qué saliesteis ver? ¿á un home vestíu con lluxu femenible? Ya sabéis que los q’ ansina visten, viven en ’os palacios de los reyes.

⁹ Al fiu y al cabu, ¿qué saliesteis ver? ¿á dalgun profeta? Miániques que sí, yo vos lo aseguro, y entovía mas que profeta.

¹⁰ Pos elli ye de quien está ’scrito: Míra que yo únvio mió ánxel ante la to presencia, quien dirá delantre de ti aperiándote ’l camin.

¹¹ Dígovos en verdá, que non s’ irguió ente los fios de muyeres utru dalgun mayor que Xuan Bautista: anque ’l mas piquirisquin nel reinu de los cielos, ye mayor q’ elli.

¹² Y de magar vieno Xuan Bautista fast’ agora, el reinu de los cielos alcánzase con gran xera, y los que la ponen son los que lu arrabañen.

¹³ Porque tóos los profetas, y la llei fasta Xuan, prenunciaron lo porvenir:

¹⁴ Y si queréis entendélo, el mesmu ye aquel Elíes que debia venir.

¹⁵ El que tien oíos pa ’tolenar, atolene.

¹⁶ Mas ¿qué comparanza porné yo d’ista castra d’homes? Aseméyase á los rapazacos sentáos na plaza, que dando voces á utros de sos compañeros,

¹⁷ Yos dicen: Cantámosvos cantares alegres, y non reblincasteis: cantares tristes, y non llorasteis.

¹⁸ Ansina ye que vieno Xuan, que cuasi non come, nin bebe, y dicen: Está ’spritáu.

¹⁹ Vieno ’l Fiu del home que come, y bebe, y dicen: Mirái que farton, y bebedor, amigu de publicanos, y xentes de mala vida. Pero la devina sapiencia queda xostificáa pa con sos fios.

²⁰ Entós empezó á reñir á les ciodáes á ú se fexeren permunches maravíes, porque non habín fecho penitencia.

²¹ ¡Ai probe de ti Corozain! ¡ai probe de ti Besaida! que si en Tiro y Sidon s’ hubiesen fecho les maravíes que se fexeron en vosotros, ya bienayá q’ habrín fecho penitencia, cubiertes de ceniza y de ciliciu.

²² Dígovos pe’ lo mesmo, que nel día del xuíciu será mas pasaero á Tiro y Sidon, q’ á vosotros.

²³ Y tu Cafarnaun ¿cúides quiciáis írguite fasta ’l cielu? serás, miániques, abaxáa fasta ’l infiernu; porque, si en Sodoma s’ hubiesen fecho les maravíes q’ en ti, Sodoma quiciáis se mantuviés ogaño.

²⁴ Per iso te digo, que nel día del xuíciu será mas pasaero á Sodoma q’ á ti.

²⁵ Per aquel tiempu esclamó Xesús diciendo: Yo te lloo, Padre miúyu, Señor del cielu y de la tierra, porque celaste istes coses á lo’ sabiondos y prudentes del siglu, y les revelaste á los piquiñinos.

²⁶ Sí, Padre miúyu, lloáu sias: porque fo de to gustu que fos ansina.

²⁷ Mió Pá ponxo en miós manes tóes les coses. Pero naide conóz al Fiu, sinon so Pá: nin dangun conóz al Padre, sinon so Fiu, y aquelli á quien el Fiu quixere dicélo.

²⁸ Veníi á min tóos los q’ andáis encorviáos con trabayos, y cargues, que yo vos ayudaré.

²⁹ Ponéi mió xugu so vosotros, y adeprendéi de min, que só mansu, y homilde de corazon: y afallaréis el fuelgu pa vuestres almes.

³⁰ Pos el mió xugu ye suave, y mió carga llixera.