Salmow 95 - An Sowter 1997 2023

SALM 95. Venite, exultemus.

¹ Dewgh, gwren ni kana dhe'n Arloedh : gwren ni tros heudhik dhe garrek agan selwyans.

² Deun ni a-dheragdho gans grasyans : ha gul tros heudhik dhodho gans salmow.

³ Rag an Arloedh yw Duw meur : ha Myghtern meur dres oll duwow.

⁴ Yn y dhorn yma pub sorn a'n norvys : hag yma pennow an menydhyow dhodho.

⁵ Ev a bew an mor, hag ev a'n gwrug : ha'y dhiwleuv a formyas an tir sygh.

⁶ Deun, gordhyen hag omblegya : gwren ni mos war benn dewlin a-rag an Arloedh agan Gwrier.

⁷ Rag ev yw agan Duw : hag yth on ni pobel y beurva, ha deves y leuv.

⁸ A mynnewgh hedhyw klewes y lev! Na galeshewgh agas kolonn : kepar dell wrussowgh yn Meriba, hag yn dydh Massa y'n difeyth,

⁹ Pan y'm temptyas agas tasow : ha'm previ, kyn hwelsens ow oberow.

¹⁰ Dewgens blydhen my a gasas an henedh na : ha my a leveris, ‘Hemm yw pobel a gammwra yn aga holonn, ha ny aswonnons ow fordhow.’

¹¹ Rakhenna my a wrug ti y'm sorr : na wrellens entra y'm powesva.