Salmow 77 - An Sowter 1997 2023

SALM 77. Voce mea ad Dominum.

¹ My a elwis war Dhuw gans ow lev : war Dhuw y helwis gans ow lev, hag ev a ros skovarn dhymm.

² Yn dydh ow anken my a hwilas an Arloedh : ow leuv o ystynnys y'n nos, ha nyns o skwith : ow enev a skonyas a gavoes hebaska.

³ My a berth kov a Dhuw, ha moredhek ov vy : my a breder yn town, ha'm enev a glamder.

⁴ Ty a syns ow dewlagas yn tifunys : mar droblys ov vy ma na allav kewsel.

⁵ My re brederis a'n dydhyow kyns : a'n blydhynyow usi tremenys seuladhydh.

⁶ My a berth kov a'm kan y'n nos : my a gews gans ow holonn, ha'm enev a hwila dihwans.

⁷ A wra an Arloedh skonya bynitha : hag a ny vydh ev pes da nevra namoy?

⁸ A hedhis y dregeredh bynitha : a fyll y ambos a unn henedh dhe'n nessa?

⁹ A ankovas Duw bos grassyes : a dhegeas ev y druedh yn sorr?

¹⁰ Ha my a leveris, ‘Hemm yw duwon dhymm : leuv dhyghow an Ughella dhe vos treylys.’

¹¹ My a berth kov a wriansow an Arloedh : devri, my a berth kov a'th varthusyon kyns.

¹² My a breder ynwedh a'th oberow oll : ha my a gews a'th wriansow.

¹³ Dha fordh, A Dhuw, yw sans : pana dhuw yw meur avel agan Duw ni?

¹⁴ Ty yw an Duw a wra marthusyon : ty re dherivas dha nerth yn mysk an bobel.

¹⁵ Gans dha vregh ty re brenas dha bobel : mebyon Yakob ha Yosef.

¹⁶ An dowrow a'th welas, A Dhuw, an dowrow a'th welas hag a borthas own : an downderyow ynwedh a grenas.

¹⁷ An kommol a dhiveris dowr, an nevow a wrug tros : dha sethow ynwedh a lughesas a-les.

¹⁸ Lev dha daran esa y'n korwyns : an lughes a wolowis an norvys; an nor a dhegrenas ha krysya.

¹⁹ Yma dha fordh y'n mor, ha'th hynsyow y'n dowrow meur : ha nyns yw olyow dha dreys aswonnys.

²⁰ Ty a hembronk dha bobel avel deves : dre leuv Moyses hag Aron.