Salmow 71 - An Sowter 1997 2023

SALM 71. In te, Domine, speravi.

¹ Ynnos jy, A Arloedh, y hwilav skovva : na as vy dhe berthi meth bynitha.

² Gwra ow delivra y'th ewnder ha'm difres : pleg dha skovarn dhymm ha'm sawya.

³ Bydh dhymm karrek grev may tyffiv dhedhi pup-prys : ty re worhemmynnis ow selwel, rag ty yw ow harrek ha'm kastell.

⁴ Gwra ow delivra, A Dhuw, dhiworth leuv an tebelwas : dhiworth dorn an den kammhynsek ha didruedh.

⁵ Rag ty yw ow govenek, A Arloedh Duw : ow fydhyans dhiworth ow yowynkneth.

⁶ Genes jy re beuv mentenys dhiworth an brys : ty yw neb a'm kemmeras dhiworth torr ow mamm; ow gormola a vydh prest ahanas.

⁷ My re dheuth ha bos marthus dhe lies huni : mes ty yw ow skovva grev.

⁸ Bedhes ow ganow lenwys a'th wormola : ha'th glori oll an jydh.

⁹ Na'm towl vy dhe-ves yn termyn henys : na'm forsak vy pan fyll ow nerth.

¹⁰ Rag ow eskerens a gews er ow fynn : ha'n re a gontrewayt ow enev a omgusul war-barth;

¹¹ Hag yn-medhons i, ‘Duw re'n forsakyas : helghyewgh ev, ha'y gemmeres; rag nyns eus den a'n deliffro.’

¹² A Dhuw, na vydh pell dhiworthiv : ow Duw, deus uskis dhe'm gweres.

¹³ Perthens i meth ha mos dhe goll, neb yw eskerens ow enev : bedhens i kudhys gans mewl ha disenor, neb a hwila ow fystik.

¹⁴ Mes my a wayt heb hedhi : ha my a'th wormel moy ha moy.

¹⁵ Ow ganow a dheriv dha ewnder ha'th selwyans oll an jydh : rag ny wonn aga niver.

¹⁶ My a dheu yn nerth an Arloedh Duw : my a dhre dhe gov dha ewnder jy dha honan.

¹⁷ A Dhuw, ty re dhyskas dhymm dhiworth ow yowynkneth : ha prest re venegis vy dha varthusyon.

¹⁸ Ha lemmyn y'm henys, ha loes ow blew, A Dhuw, na wra ow forsakya : erna dheriffiv dha alloes dhe'n kenedhel ma, dha nerth dhe bub henedh a dheu.

¹⁹ Ha'th ewnder, A Dhuw, a dhrehedh dhe'n ughelder : ty neb re wrug gwriansow meur; A Dhuw, piw yw avelos jy?

²⁰ Ty, neb re dhiskwedhas dhymm lies anken bras ha drog, a'm bewha arta : ha ty a'm dre yn-bann dhiworth downderyow an nor.

²¹ Ty a voghha ow enor : ha'm hebaskhe arta.

²² My a'th wormel ynwedh gans an sowtri drefenn dha wiryonedh, ow Duw : my a gan dhiso jy gans an delynn, ty Sans Ysrael.

²³ Ow diwweus a arm yn lowen pan ganav gormola dhiso jy : ha'm enev ynwedh hag a brensys.

²⁴ Ha'm taves a gews a'th ewnder oll an jydh : rag i a berth meth, yth yns i shyndys, neb a hwila ow fystik.