Salmow 68 - An Sowter 1997 2023

SALM 68. Exurgat Deus.

¹ Seves Duw, bedhes y eskerens skattrys : ha fies dhe'n fo a-dheragdho an re a'n kas.

² Dell yw mog pellhes, yndella gwra aga fellhe i : ha dell deudh koer a-dherag an tan, yndella es an debeles dhe goll a-dherag Duw.

³ Mes lowenhes an re wiryon; bedhens heudhik a-dherag Duw : ha bedhens leun a joy.

⁴ Kenewgh dhe Dhuw, kenewgh gormola dh'y Hanow ev : drehevewgh kan dhe neb a varghok war an nevow; an Arloedh yw y Hanow; bedhewgh heudhik a-dheragdho.

⁵ Tas dhe'n omdhivasow, ha breusyas an gwedhwesow : yndella yw Duw yn y drigva sans.

⁶ Duw a worr an re dhigoweth yn teyluyow; ev a dhre an prisnoryon yn-mes dhe sewena : mes an re worth a drig yn tir kras.

⁷ A Dhuw, pan ythys yn-mes a-dherag dha bobel : pan gerdhsys der an difeyth;

⁸ An nor a grenas, an nevow ynwedh a dheveras a-dherag Duw : ha Sinay y honan a dhegrenas a-dherag Duw, Duw Ysrael.

⁹ Ty, A Dhuw, a wrug glaw hel dhe goedha : ty a gennerthas dha ertach pan o skwith.

¹⁰ Dha bobel a drigas ena : ty, A Dhuw, a brovias y'th tader rag an den boghosek.

¹¹ An Arloedh a ros an ger : bagas meur a dhellos an derivas

¹² ‘Myghternedh a luyow a fias dhe'n fo’ : An venyn esa ow kortos yn tre a rannas an preydh.

¹³ Kyn hwrowedhsowgh yn mysk an korlannow : yth owgh avel eskelli kolomm kudhys gans arghans, ha'y fluv gans owr melyn.

¹⁴ Pan skattras an Ollgalloesek myghternedh ynni : gwynn o hi avel ergh yn Salmon.

¹⁵ Menydh Duw yw avel menydh Bashan : menydh ughel yw menydh Bashan.

¹⁶ Prag y lemmowgh, hwi venydhyow ughel? Hemm yw an menydh may fynn Duw triga ynno : yn tevri, an Arloedh a drig ynno bynitha.

¹⁷ Charettow Duw yw ugens mil, ha milyow a vilyow : yma an Arloedh yn aga mysk, avel yn Sinay, y'n sentri.

¹⁸ Ty re yskynnas y'n ughelder, ty re hembronkas prisnoryon, ty re dhegemmeras rohow yn mysk tus : hag yn mysk an re worth, rag may trykko an Arloedh Duw ena.

¹⁹ Benniges re bo an Arloedh, neb a berth agan begh pub dydh : ev yw Duw agan selwyans.

²⁰ Agan Duw ni yw Duw a selwyans : ha der an Arloedh Duw yma diank rag ankow.

²¹ Mes Duw a vrew penn y eskerens : klopenn blewek an den a bes hwath yn y gammweyth.

²² An Arloedh a leveris, ‘My a dhre arta dhiworth Bashan : my a dhre ow fobel arta dhiworth downderyow an mor;

²³ Rag may trogghi dha droes yn goes : rag may kaffo taves dha geun y rann a'th eskerens.’

²⁴ I re welas dha geskerdh, A Dhuw : keskerdh ow Duw, ow Myghtern, y'n sentri.

²⁵ An ganoryon eth a-rag, an menestrouthi gans daffar kerdyn eth a-dryv : yn aga mysk yth esa morenyon ow tonsya gans tabouryow.

²⁶ Bennigewgh Duw y'n kuntellesow : ha'n Arloedh, hwi fenten Ysrael.

²⁷ Ottena Benyamin byghan, aga rewler, pennternedh Yuda ha'ga routh : pennternedh Zebulun ha pennternedh Naftali.

²⁸ Dha Dhuw re worhemmynnis dha nerth : surha, A Dhuw, an pyth re wrussys ragon ni.

²⁹ A-barth dha dempel yn Yerusalem : myghternedh a dhre rohow dhiso jy.

³⁰ Keredh goedhvil an kors, gre an terewi, gans leughi an poblow : a stankyas yn-dann dreys an temmyn a arghans; skatter an poblow a lowenha yn bresel.

³¹ Pennsevigyon a dheu yn-mes a Ejyp : Ethiopia a fysk dhe ystynn hy diwleuv dhe Dhuw.

³² Kenewgh dhe Dhuw, hwi wlaskordhow an nor : kenewgh gormola dhe'n Arloedh;

³³ Dhe neb a varghok war an nevow, an nevow koth : otta, ev a dhyllo y lev, ha henn yw lev galloesek.

³⁴ Askrifewgh nerth dhe Dhuw; yma y veuredh war Ysrael : hag yma y nerth y'n ebron.

³⁵ A Dhuw, euthyk osta y'th tylleryow sans : Duw Ysrael, neb a re nerth ha galloes dh'y bobel; benniges re bo Duw.