Salmow 65 - An Sowter 1997 2023

SALM 65. Te decet hymnus.

¹ Y tegoedh dha wormel, A Dhuw, yn Sion : ha dhiso jy y fydh an ambos kollenwys.

² Ty neb a woslow orth pysadow : dhiso jy y teu pub kig.

³ Kammweythresow yw re grev ragov : agan kammwriansow ni, ty a's glanha.

⁴ Gwynnvys an den a dhewisydh hag a dhredh nes dhis, may trykko y'th klosyow : ni a vydh lenwys a dhader dha ji, ha'th tempel sans.

⁵ Ty a worthyp dhyn gans taklow euthyk yn ewnder, A Dhuw agan selwyans : ty, neb yw fydhyans oll pennow an nor, ha'n re usi pell war an mor.

⁶ Der y nerth y hwra ev fastya an menydhyow : yma grogys a alloes a-dro dhodho.

⁷ Ev a spavennha tros an mor : tros an mordonnow ha freudh an poblow.

⁸ Ynwedh an re a drig yn pella sornow an nor a berth own a'th toknys : ty a wra dhe borthow an bora ha'n gorthugher kana gormola.

⁹ Ty a vir orth an nor ha'y dhowra : ty a wra dh'y feythter ynkressya.

¹⁰ Avon Duw yw leun a dhowr : ty a brovi ys ragdha, rag yndella ty re'n darbaris.

¹¹ Ty a dhowrha y fynnglow, ha levenhe y ryllow : ty a'n medhelha gans kowasow, ha benniga y eginyow.

¹² Ty a gurun an vlydhen gans dha dhader : ha'th fordhow a dhever gans feythter.

¹³ Peurvaow an difeyth a dhever : ha'n bronnow yw grogysys gans lowender.

¹⁴ An peurvaow re omwiskys gans flokkys : an nansow re omgwethas gans ys : i a arm gans lowender, ha kana.