Salmow 61 - An Sowter 1997 2023

SALM 61. Exaudi, Deus.

¹ Klew ow garm, A Dhuw : goslow dhe'm pysadow.

² Dhiworth penn an nor y halwav warnas : pan yw gwann ow holonn.

³ Hembronk vy dhe'n garrek yw ughella agesov : rag ty re beu skovva dhymm, ha tour krev erbynn an eskar.

⁴ My a drig y'th tylda bynitha : my a hwila skovva yn kudhans dha eskelli.

⁵ Rag ty, A Dhuw, re glewas ow ambosow : ty re ros dhymm ertach an re a berth own a'th Hanow.

⁶ Ty a re dhe'n Myghtern bewnans hir : y vlydhynyow dhe henedhow pals.

⁷ Ev a drig a-dherag Duw bynitha : re'n gwittho tregeredh ha gwirder.

⁸ Yndella y kanav gormola dhe'th Hanow bynitha : ow tyli ow ambosow pub dydh oll.