Salmow 60 - An Sowter 1997 2023

SALM 60. Deus, repulisti nos.

¹ A Dhuw, ty re'gan skonyas, ha'gan terri : ty re sorras; treyl arta dhyn ni.

² Ty re gryghyllas an nor, ha'y folsa : yaghha y dorrvaow, rag ev a gren.

³ Ty re dhiskwedhas dhe'th pobel taklow kales : ty re wrug dhyn ni eva gwin a benn-dro.

⁴ Ty re ros baner dhe'n re a berth own ahanas : rag may fions dhiworth an warak.

⁵ Rag may fo dha garadowyon delivrys : salw dre dha leuv dhyghow, ha klew vy.

⁶ Duw re gewsis yn y sansoleth : ‘My a lowenha, ha ranna Shekem, ha musura nans Sukkoth.

⁷ Gilead yw dhymm, ha Manasse yw dhymm : Efraym ynwedh yw nerth ow fenn; Yuda yw ow gwelenn.

⁸ Moab yw ow seth-golghi; dres Edom y teghesav ow eskis : war Filistia my a arm yn trygh.’

⁹ Piw a'm dre a-berth y'n dinas krev : piw a'm hembronk bys yn Edom?

¹⁰ A ny'gan forsaksys, A Dhuw : nyns edh yn-mes gans agan luyow.

¹¹ Ro dhymm gweres erbynn an eskar : rag euver yw gweres den.

¹² Dre Dhuw y hwren ni obereth meur : ev yw neb a drett agan eskerens dhe'n dor.