Salmow 48 - An Sowter 1997 2023

SALM 48. Magnus Dominus.

¹ Meur yw an Arloedh, ha gwiw dhe vos gormelys yn feur : yn sita agan Duw, yn y venydh sans.

² Teg hy ughelder, lowender oll an nor : yw menydh Sion, war yn pella rannow an kledh, sita an Myghtern meur.

³ Aswonnys yw Duw yn hy lysyow : avel dinas krev.

⁴ Rag otta, an vyghternedh a omguntellas : i a dremenas war-barth.

⁵ I a welas, ytho marth a's teva : dyegrys ens i, hag i a fyskas dhe-ves.

⁶ Skruth a's dalghennas ena : ha payn, avel benyn yn lavur.

⁷ Gans gwyns an howldrevel : ty a vrew gorholyon Tarshish.

⁸ Dell glewsyn ni, yn kettella y hwelsyn ni yn sita Arloedh an luyow, yn sita agan Duw : Duw a wra hy fastya bynitha.

⁹ Ni re brederis a'th tregeredh, A Dhuw : yn kres dha dempel.

¹⁰ Kepar dell yw dha Hanow, A Dhuw, yndella yw dha wormola, bys yn pennow an nor : dha leuv dhyghow yw leun a ewnder.

¹¹ Lowenhes menydh Sion, bedhes myrghes Yuda heudhik : drefenn dha vreusow jy.

¹² Kerdhewgh a-dro dhe Sion, kewgh a-dro dhedhi : niverewgh hy thouryow.

¹³ Merkyewgh yn ta hy fosow, prederewgh a'y balesyow : ma'n deriffowgh dhe'n henedh a dheu.

¹⁴ Rag an Duw ma yw agan Duw ni bys vykken ha bynnari : ev a'gan hembronk bynitha.