Salmow 39 - An Sowter 1997 2023

SALM 39. Dixi, custodiam.

¹ Yn-medhav, ‘My a with ow fordhow : rag na begghiv gans ow thaves.

² My a with ow ganow gans fronn : hedre vo an tebelwas y'm gwel.’

³ Avlavar en vy, ow tewel : kosel en vy, heb hebaska.

⁴ Ow galar a wethhas, toemm o ow holonn ynnov vy : ha my ow prederi, an tan a dhewis, ha my a gewsis gans ow thaves;

⁵ Arloedh, gwra dhymm godhvos ow diwedh, ha pyth yw musur ow dydhyow : may hwodhviv hirder ow bewnans.

⁶ Otta, ty re wrug ow dydhyow avel nebes dornvedhi : ha'm oes yw avel travyth a-dheragos; yn hwir, pub den a sev avel anall.

⁷ Rag den a gerdh avel skeus; yn hwir ev yw troblys yn euver : ev a wra bern a rychys ha ny woer piw a'n kuntell.

⁸ Ha lemmyn, A Arloedh, pyth yw ow govenek : ynnos jy yma ow fydhyans.

⁹ Gwra ow delivra dhiworth ow hammwriansow oll : na wra dhymm bos skorn an den fol.

¹⁰ Avlavar en vy, ny igeris vy ow ganow : rag ty yw neb a wrug hemma.

¹¹ Kemmer dha strekys dhiworthiv : dre voemmenn dha leuv yth av vy dhe goll.

¹² Pan geredhydh den, ow kessydhya kammweyth, ty a wra dh'y dekter teudhi dhe-ves kepar dell wra an goedhan : yn hwir, anall yw pub den.

¹³ Klew ow fysadow, A Arloedh, ha ro skovarn dhe'm kri : na vydh tawesek orth ow dagrow.

¹⁴ Rag alyon ov vy genes : godriger, avel ow thasow oll.

¹⁵ Mir dhe-ves dhiworthiv, may fiv kennerthys : kyns my dhe dhiberth, heb bos namoy.