Salmow 32 - An Sowter 1997 2023

SALM 32. Beati, quorum.

¹ Gwynnvys neb yw gevys y gammweyth : ha neb yw kudhys y beghes.

² Gwynnvys an den na reken an Arloedh kammweyth dhodho : ha nag eus falsuri yn y spyrys.

³ Pan dewis vy heb aswonn ow feghes, ow eskern a wedhras : ha my owth hanasa oll an jydh.

⁴ Rag dydhweyth ha nosweyth poes o dha leuv warnav : ow sugen o treylys kepar hag yn syghor hav.

⁵ My a aswonnis ow feghes dhiso jy : ha ny gudhis ow hammweyth.

⁶ My a leveris, My a yes ow hammweyth dhe'n Arloedh : ha ty a avas kabel ow feghes.

⁷ Rakhemma y hwra pubonan yw glan pysi warnas jy, yn prys may hyllir dha gavoes : devri yn liv an dowrow meur, ny dhons ogas dhodho.

⁸ Ty yw ow hovva, ty a'm gwith rag anken : ty a dheu a-dro dhymm gans kanow livreson.

⁹ My a'th kevarwoedh, ha dyski dhis an fordh mayth yw res dhis mos : ha gans ow lagas warnas my a'th kusul.

¹⁰ Na vedhewgh kepar ha'n margh na'n mul, heb konvedhes : res yw dhedha bos synsys gans genva ha fronn, ma na dheffons ogas dhis.

¹¹ Galarow pals a vydh dhe'n tebelwas : mes neb a drest y'n Arloedh, tregeredh a dheu a-dro dhodho.

¹² Lowenhewgh y'n Arloedh, ha bedhewgh heudhik, hwi an re wiryon : germewgh yn lowen, oll hwi yw ewnhynsek agas kolonn.