Salmow 142 - An Sowter 1997 2023

SALM 142. Voce mea ad Dominum.

¹ My a gri war an Arloedh gans ow lev : gans ow lev devri y hwrav ow govynnadow dhe'n Arloedh.

² My a dhyllo ow krodhvol a-dheragdho : my a dhiskwa a-dheragdho ow anken.

³ Pan glamderas ow spyrys a-berth ynnov ty a aswonnis ow hyns : y'n fordh may kerdhyn i re gudhas maglenn er ow fynn.

⁴ Mir orth ow leuv dhyghow ha gwel : rag nyns eus denvyth a'm aswonno.

⁵ Skovva a fyllis dhymm : nyns eus neb a wittho ow enev.

⁶ My a armas warnas, A Arloedh, yn-medhav : ‘Ty yw ow skovva, ha'm rann yn tir an re vew.’

⁷ Goslow dhe'm garm : rag yth ov vy dres pur isel.

⁸ Gwra ow delivra dhiworth ow helghysi : rag kreffa yns i agesov.

⁹ Doroy ow enev yn-mes a brison, may hwormelliv dha Hanow : an re wiryon a omguntell a-dro dhymm, rag ty a vydh da orthiv.