Salmow 135 - An Sowter 1997 2023

SALM 135. Laudate Nomen.

¹ Gormelewgh an Arloedh, gormelewgh Hanow an Arloedh : gormelewgh ev, hwi wesyon an Arloedh;

² Hwi neb a sev yn chi an Arloedh : yn klosyow chi agan Duw.

³ Gormelewgh an Arloedh, rag da yw an Arloedh : kenewgh gormola dh'y Hanow ev, rag grassyes yw.

⁴ Rag an Arloedh re dhewisas Yakob dhodho y honan : hag Ysrael avel y berghennogeth arbennik y honan.

⁵ Rag my a woer an Arloedh dhe vos meur : ha'gan Arloedh dhe vos a-ugh an duwow oll.

⁶ Pup-tra a vynnas an Arloedh, ev a'n gwrug yn nev hag yn nor : y'n moryow hag y'n downderyow oll.

⁷ Ev a wra dhe'n kommol yskynna dhiworth penn an nor : hag ev a wra lughes rag an glaw, ow tri an gwynsow yn-mes a'y dresorvaow.

⁸ Ev a weskis an re gynsa-genys a Ejyp : ha tus hag enyvales.

⁹ Ev a dhannvonas toknys ha marthusyon y'n kres ahanas, A Ejyp : erbynn Faro hag erbynn oll y wesyon.

¹⁰ Ev a weskis kenedhlow meur : ha ladha myghternedh alloesek;

¹¹ Sihon myghtern an Amorysi, hag Og myghtern Bashan : hag oll gwlaskordhow Kanan;

¹² Hag ev a ros aga thir yn ertach : ertach dhe Ysrael y bobel.

¹³ Dha Hanow, A Arloedh, a dhur bys vykken : ha'th kovadh, A Arloedh, a unn henedh dhe'n nessa.

¹⁴ Rag an Arloedh a vreus y bobel : ha kemmeres truedh a'y wesyon.

¹⁵ Imajys an kenedhlow yw arghans hag owr : ober diwleuv den.

¹⁶ Ganow a's teves, mes ny gewsons : dewlagas a's teves, mes ny welons.

¹⁷ Diwskovarn a's teves, mes ny glewons : ha nyns eus anall yn aga ganow.

¹⁸ Aga gwrioryon yw haval dhedha : seul a fydh ynna i.

¹⁹ Chi Ysrael, bennigewgh an Arloedh, : chi Aron, bennigewgh an Arloedh.

²⁰ Chi Levi, bennigewgh an Arloedh, : hwi neb a berth own a'n Arloedh, bennigewgh an Arloedh.

²¹ Benniges re bo an Arloedh dhiworth Sion : neb usi trigys yn Yerusalem.