Luka 21 - Evanghelu pi dupi Luka 2013

Dhora ali mujari vedu

¹ Jezus skullë oqjë sh vëxu avucjë ci amëna dhorëli a llor tu thesar.

² Ell vëxu sh unë mujeri vedu, fukërônjë, ci amënë dau monedhi njic di bëkërrë,

³ sh xësi: “Darihënja us v'i xëk, kë aistë mujeri fukërônjë, vedu, ari amënatë ma mullt di tuc allanc,

⁴ kë ej amënarë ti dhorë tu thesar aca ci ll'u tupuri, ma ija dedi di fukërallëqja a je tutë ci avja adunatë ti bënari”.

Jezus paraxeci rrustunara a tempullu

⁵ Kënd ndoj ômënj ma zburra ti tempull, kë kum ara ndrept bun, ku shkëmbi mushati sh ku dhorëli ci avja datë ti Dumëxë, Jezus xësi:

⁶ “Us jinë xua kënd di aisti ci vëdec nu us arrëmënë shkëmbë pisti shkëmbë ni rrustunatë”.

Nojma ti stërrxeri

⁷ U tërbarë Jezus: “Mvëcëtor, kënd us'i fakë aisti llukëri, sh kaj us hjibë nojma ci eli ma s'fak?”

⁸ Ell xësi: “Zhdikidec oqjë, tas s'nu v'i arrëdë, kë us jinë mullc ômënj pi numa a mja sh us xëkë ‘Est mini’ iti ‘S'apurqë qërollu’. Nu fuxic dupi nësh.

⁹ Kënd s'avxac ti polum sh katrauri, nu v'i aspërac, kë aisti llukëri us'i fakë ma ninti, ma fundu nu us jinë di-unôrë.

¹⁰ Un krat us'i skôllë pisti un allt krat, sh un vësëjë pisti un allt vësëjë.

¹¹ Us kadë tërmet vërtôs, sh tu ndau bilokëri us ajbë llajë ti pëni, sh llëngôrë di murtajë. Us ajbë sh katrauri llëhtrësiti, dit cerl us ajbë semn mari,

¹² ma, ma ninti ci us'i fakë tuti aisti, us v'i akacë sh us v'i agudjastë. Us v'i parada pit sinagogi sh pit hapsanëri, us v'i adukë dininti a ma marrë ali qevërrii di sebepja ali numi a mja.

¹³ Ashë us putec tas spunec.

¹⁴ S'hjic vindusic, sh nu v'i stinahorsic ti skëpara a vôstë,

¹⁵ kë mini us v'i dau xhoniaca tas gric zbôrri mintimeni, kit s'nu pôtë içvërr di acej ci avec kondra, tas v'u trakë, shi s'grastë kondra.

¹⁶ Us axhungë pën ako ci sh përincjë, fracjë, kusurinjjë, us v'i allasë tu muzgë, shi us vatëmë ndoj di voj.

¹⁷ Tuc nu us v'i vra di sebepja ali numi a mja,

¹⁸ ma niki un per di kap nu us v'i kadë.

¹⁹ Ku qindurera a vôstë us qërdhësic sufëlltu a vost”.

Jezus paraxëci aspërxera a Jerusalem

²⁰ “Kënd s'vëdec Jerusalem avërtit di andarc, s'u shtic kë aspërxera a lluj esti aprôpja.

²¹ Acej ci sënt tu Judei s'i rrëspëndjastë pit munc, acej ci sënt pit hor, s'nu intrë tu Jerusalem,

²² kë aisti sënt xëlili ci us'i lla amartiili, shi us'i fakë aca ci esti skëratë.

²³ Kavaj di mujerrë greli, sh aceli ci hërrest cilëmanjjë aceli xëli, kë us kadë fukërallëqi mari tu dunei, shi nërreri ti aiç ômënj.

²⁴ Ej us kadë di tëjëtura ali tëpôrri, shi us'i fake skllav a tuc ômënjllu ci nu pistusest, shi Jerusalem us'i zdrrumënë di paganëjë, pën kënd s'll'u bitisjastë qërollu a llor”.

Vinera a Hjiju a Omu

²⁵ “Us ajbë semnuri pi sôri, pi llunë sh pi steli. Pi llok ômënjjë ci nu pistusest us j'akacë hjevërrë sh frika di bubunusera ali amari sh ali vali.

²⁶ Ômënjjë us môrë di frikë, sh di ashtëptarea a cëje ci ma kadi pisti llok, kë tutë dunea us'i trunduljastë.

²⁷ Astumsëna us vjadë Hjiju a Omu ci ma jini di pit nor ku force sh ku tinjii mari.

²⁸ Kënd s'ahurhjastë s'i fakë aisti llukëri, skullacvë sh skullac kapu kë skëpara a vôstë esti aprôpja”.

Mvëcëtura ti hjiku

²⁹ Dapoja Jezus ll'u spusi unë parabolë: “Vëdec hjicli sh allanc ponj.

³⁰ Kit s'vëdec kë ar skôsë frrënxë, voj u shtic ci ma s'i aprôqë vjara.

³¹ Ashë sh voj, kënd s'vëdec ci ma s'fak aisti llukëri, s'u shtic kë kratu a Dumëxë esti aprôpja.

³² Darihënja ma v'i xëk, kë aiç ômënj, a shtëlluj qërollu, nu us'u trakë eta ni vëxutë aisti llukëri.

³³ Cerlu sh lloku us qarë, ma zbôrrëli a njeli nu us'i agërshëstë”.

S'avec mintja

³⁴ “Vëgjacvë tas nu s'i angrakë inëmli pit qefëri, pit mbëtari, shi stinahorëli a shtëjej bani, shi s'nu v'i afllë tu apofasi aca xuë,

³⁵ kanda s'ara un kurth. Aistë us kadë pisti tuc acej ci bëniaxë pisti tut lloku.

³⁶ Tjaca s'avec mintja tut qërollu, sh fëcec rixhai tas skëpac di tuti aisti ci us'i fakë, shi s'putec s'stëtec dininti a Hjiju a Omu.”

³⁷ Tutë xua Jezus mvëca ômënjjë tu tempull, sh nôptja u tërcja tu un bilok ci s'akjëma Muntili a Masënllu.

³⁸ Tuc ômënjjë s'i zhdëpëta dimjaca tahjëna, tas avxa Jezus tu tempull.