Luka 17 - Evanghelu pi dupi Luka 2013

Nu ti fё sebepi ti amartii

¹ Jezus ll'u xësi a dishepujllu a lluj: “Tuc pot s'fakë llath sh kad tu amartii, ma kavaj di acej ci li ping amartiili.

² Ti nës us ara ma gjini s'lëga tu zverrkë unë shkëmbë di môrë, shi s'ja mëna tu amari, dipi s'i fëcja sebepi ti amartii ti ma njicjë.

³ S'avec mintja! Ma kë fratëtu faci llath vërjau. Ma s'feci pishmani, hërxjau.

⁴ Ma s'fakë amartii dininti a ta shapti or n'xuë, shi shapti or s'tôrrë sh xëci ‘feç llath’, ‘hërxjau’.”

⁵ Dapoja apostujë i'j xësërë a Domnëlu: “Avdaxënu pistusera”.

⁶ Shi Domnëlu ll'u xësi: “Ma s'pistusjat kit sëmica a sinap, us i'j xëcjat a shtëlluj çërriçu: ‘zbatëti di aô, shi sjamëti tu amari’, ell ashë us fëcja.

⁷ Kaj di voj, ma s'avja un ysmeqar ci llukraxë tu agur iti pashti ojli, us i'j xëcja a lluj kënd s'i turra di pi lluk: ‘Hajdi di-unôrë sh apunëti tas mëc!’?

⁸ A nu us i'j xëcja: ‘Fënju etëmë cina, tôrrë mënëcli, sh fënj ysmeti tas mëk sh tas bjau mini, shi dapoja poc tas mëc shi s'bje shi tini’.

⁹ Naka vëhj u efharistiseshti ysmeqarru kë feci llukërru a lluj?

¹⁰ Ashë sh voj, kënd s'fëcec llukërru ci avec ti fëceri, xëcec: ‘Est ysmeqar. Avem faptë aca ci i'nj tukueshti’”.

Jezus pëstreshti xaci llëndic ku lebrë

¹¹ Kënd ara nqësit ti Jerusalem, Jezus tërku pit Samarii shi Galilei.

¹² Kënd intrë tu unë hôrë, i'j s'apurqarë xaci llëndic ku lebrë. Ej stëtja dëparti sh gra:

¹³ “Jezus, mvëcëtor s'ic jinë krimë ti noj!”

¹⁴ Jezus i'j vëxu sh ll'u xësi: “Fuxic shi adunacvë ku prefcjë”. Sh kënd nqësirë kala, ej s'vindëkarë.

¹⁵ Dapoja un di nësh, kënd u vëxu ci ara pëstrit, s'turrë sh allëvda Dumëxë ku bôci analltë.

¹⁶ Ell gëxu përdinc, tu çëçôrrë a Jezus shi u efharistisi. Ell ara Samaritan.

¹⁷ Astumsëna Jezus u tërbë: “A nu ara xaci acej ci s'i vindikarë? Ma nau allanc ju sënt?

¹⁸ Nu s'i afllë içvërr di nësh, tas s'i turra, shi s'allavda Dumëxë, ma gôllë aist ksenu?”

¹⁹ Dapoja i'j xësi a lluj: “Skôllë sh fux. Pistusera a ta t'i skëpë”.

Vinera a kratu a Dumëxë

²⁰ Unôrë kënd farisenjjë u tërbarë Jezus, kë kënd us jinë kratu a Dumëxë, Ell ll'u xësi: “Kratu a Dumëxë nu jini ku bujë.

²¹ Nu us xëkë, ‘Ja ju esti aô!’ iti ‘Ja ako!’. Kë kratu a Dumëxë esti nunt lla voj.”

²² Jezus ll'u xësi a dishepujllu: “Ma jin xëlili kënd us vrec s'vëdec unë di xëlili a Hjiju a Omu, ma nu us u vëdec.

²³ Astumsëna us v'i xëkë: ‘Ja ju esti ako!’ iti ‘Ja aô!’ Nu fuxic ako, sh nu j'ashtërrac!

²⁴ Ashë kum skapërë dit cerl tu pllôji, shi u llunjinëseshti cerlu tu tuti përcli, ashë us hjibë sh Hjiju a Omu xua ci us jinë.

²⁵ Ma, ma ninti Ell prindi s'strragë mullt kë nu us'i aprôqë di aistë filii di ômënj.

²⁶ Sh ashë kum s'feci tu xëlili a Noeu, ashë us'i fakë sh tu xëlili a Hjiju a Omu.

²⁷ Tu acell qëro, ômënjjë mëka shi bja, s'i sura shi s'mërta, pën di xua kënd Noeu intrë tu kutii, sh dapoja vini nëkara sh l'i rrustunë tuti.

²⁸ Ashë kum s'feci shi tu xëlili a Lot, ômënjjë mëka sh bja, kupura sh vindja, sëmëna shi skulla kasi,

²⁹ ma xua kënd Lot s'dëpërtë di Sodoma, gëxu fok sh squfur dit cerl shi i'j vëtëmë tuc.

³⁰ Ashë us'i fakë xua kënd us jinë Hjiju a Omu.

³¹ Ma kë aca xuë vërr us hjibë pi çatii, ma pleçkëli a lluj us l'ajbë akasë, s'nu dëpunë tas l'i ja. Shi, ma kë vërr us tihjisjastë tu agur, niki ell s'nu s'i tôrrë.

³² Aduqicvë ti mujera a Lot!

³³ Kaj s'çukuteshti tas u vjagjë bana a lluj, us'u qarë aca, sh acell ci us'u qarë bana a lluj, us'u skapë.

³⁴ Mini ma v'i xëk: aca sjarë, di doj ish ci us hjibë tu un kërvat, un us'i ja, sh allant us'i allasë.”

^35-36 “Di dau mujer ci us hjibë lla môre ti mëcënari, unë us'i ja sh allantë us'i allasë”.

³⁷ Dapoja u tërbarë: “Ma ju, Domne a nost?”. Ell llu xësi: “Ju esti kërrma, ako s'i adunë shi skifterënjjë”.