Luka 15 - Evanghelu pi dupi Luka 2013

Meseleja ti ôja qërutë

¹ Tuc acej ci aduna xhelepja shi acej ci fëcja amartii, ma s'ja purqa ningi Jezus tas avxa.

² Farisenjjë shi skribënjjë xhuduka shi xëcja: “Aist aprôqë acej ci fak amartii, mëkë shi bja ku nësh.”

³ Astumsëna Jezus ll'u spusi aistë meselei:

⁴ “Kaj di voj ci, ma s'ajbë unësutë di oj, sh unë di nësi qeri, nu us l'i allasë nauxëc i nau oj tu padi tas kaftë aca ci ari qërutë pën s'u afllë?

⁵ Shi kënd u afllë, u ja pi numëri mullt hërësit.

⁶ Kënd si tôrrë akasë, adunë ôspëcjë a lluj, shi kusurinjjë sh llu xëci: ‘Hërësicvë ku mini kë o-fllaj ôja ci nj'avja qërutë.’

⁷ Mini ma v'i xëk kë ashë esti shi tu cerl. Ako ari ma mulltë hërau ti un amartios ci esti fapt pishmani, dipi ti nauxëc i nau ndrepc ci nu ar ti ci s'i fakë pishmani”.

Meselea ti përëllu qërut

⁸ “Shi napoj, ma kë unë mujeri ari xaci monedhi di asimi, shi unë i'j qeri, a nu nexi s'aprindë unë këndillë tas fakë llunjinë pit kasë, tas u kaftë pën kënd s'u afllë.

⁹ Shi kënd u afllë, ll'u greshti a sôcëllu a je shi a gjitonëllu, shi ll'u xëci: ‘Hërësicvë ku mini, kë o-fllaj përëllu ci nj'avja qërutë.’

¹⁰ Mini ma v'i xëk: ‘Ashë s'hërësest shi ëngjëjë a Dumëxë ti un qërut ci s'tôrrë, shi s'faci pishmani’”.

Meselea ti fëçorru arrakat

¹¹ Dapoja Jezus xësi: “Un om avja doj fiçor.

¹² Ma njiku i'j xësi a tatësu: ‘Tate, dënj pjesa ali averi ci nj'tukueshti’.

¹³ Dupi ndau xëli fiçorru acell njiku adunë pleçkëli ci avja shi fuxi tu un bilok allt, dëpërtos. Ako ell o-dusi qërutë avera a lluj kë fëcja unë banë fërë namustrë.

¹⁴ Shi kënd l'asparsi tuti, tu acell bilok gëxu unë urfanjë ti pëni, shi ell arrëmasi fërë cëva.

¹⁵ Astumsëna nesi shi afllë lluk lla un om di aca kasabai, shi aist u petërku tas pashtë porrcjë.

¹⁶ Ako us vra tas s'i hërra ku ginduri ci mëka porrcjë, ma içvërr nu i'j dëdja.

¹⁷ Ell s'ja duqi shi xësi: ‘Mullc di acej ci llukraxë lla tati a njell, ar pëni kit ll'u tupureshti, sh mini aô ma mor ti pëni.

¹⁸ Us m'i skoll shi us neg lla tatënju, shi us i'j xëk: Tate, mini am faptë llath mari dininti a cerlu shi dininti a tau.

¹⁹ Nu i'nj tukueshti tas est hjiju a tell. Cënëmi ka un di acej ci llukraxë lla tini.’

²⁰ Ashë nqësi shi nesi lla tatësu. Ma kënd ara ninga dëparti, tatësu u vëxu shi i'j vini rrëu ti nës, s'i siligji kiti nës, o-vërti tu bracëli a lluj shi u bëshë.

²¹ Astumsëna hjijësu i'j xësi: ‘Tate, mini am faptë amartii dininti a cerlu shi dininti a ta. Nu i'nj tukueshti tas est hjiju a tëll.’

²² Ma tatësu ll'u xësi a ysmeqarëllu: ‘Aducec ntrôrë stranjli ma buni shi mvështecu. Bëgaci'j tu xedut nellu shi tu çëçôri sandalili.

²³ Lloc viçu ma bun shi tëjacu. S'mëkëm shi s'fëcem daveti,

²⁴ kë aist hjiju a njell ara mort shi injjë, avja qërut shi s'ja fllë!’ Shi ahurhjirë s'hërësjastë.

²⁵ Fiçorru a lluj, ma marrë ara tu agur. Kënd vini, shi s'ja purqë di kasë, avxë tëmpinj sh xhok.

²⁶ Dapoja i'j gri a unuj di ysmeqarjë shi u tërbë, ci ma s'fëcja.

²⁷ Ell j'u turrë: ‘Ari vinitë fratëtu, shi tatëtu ari tëjatë viçu ma gras, kë ell esti turrat gjini sh ku sënëtati.’

²⁸ Astumsëna ell s'nërri, sh nu vra s'intra nunt. Tatësu ishë nafôrë tas i'j fëcja rixhai s'intra n'kasë,

²⁹ ma ell ju turrë: ‘Mini am llukratë ka ysmeqar tuc aiç anj ti tini, shi nu c'ôm turratë zbôrru içvërrorë, sh ku-tutë-aca, tini nu nj'aj datë niki un ed tas fak daveti ku ôspëcjë a njej.

³⁰ Shi tora, ci s'turrë hjijëtu, acell ci o-sparsi tutë avera a ta ku putanili, tëjash ti nës viçu ma gras.’

³¹ Dapoja tatësu i'j xësi: ‘Hjij, tini esht totëna ku mini, shi tuti aisti ci am mini sënt sh a tëli.

³² Ma noj prindi s'fëcem gostii, shi s'hërësim kë fratëtu ara mort shi s'turrë tu banë, avja qërut shi s'afllë’”.