Onger Akaba 98 - Godɨn Eghaghanim: Akar Gavgavir Dɨkɨrɨzir Ghurim ko Igiam

God gumazamiziba bar men Atrivim

Kar Godɨn ziam fer onger akam.

¹ Ia onger akar igiatam Ikiavɨra Itir God bagh, a bangɨ. A uan agharimɨn bizir aghuir igharagha garibagh ami. A uan gavgavir ekiamɨn amodoghɨn, mɨdorozir kam gamua apaniba abɨra.

² Ikiavɨra Itir God, apaniba ko mɨsogha me abɨrazir bizimɨn gun mɨkeme, a uan akurvazir arazim isa gumazamizibar akazɨ me bar an gari.

³ A Israelian apangkuvigha men akuraghasa dɨkɨrɨzir akar kam gɨnɨghnɨghavɨra ikia, me ataghizir puvatɨ. Kantribar gumazamiziba Godɨn gari, an apaniba ko mɨsogha me abɨragha, uam e ini.

⁴ Nguazimɨn gumazamiziba, ia Ikiavɨra Itir God bagh bar akongezir ighiabar amu. Ia onger akaba pamten dar amuva bar akuegh an ziam fɨ.

⁵ Ia gitabav sogh, Ikiavɨra Itir God bagh ighiabar amu. Ia boabav soghtɨ, dar arareba bar deragh.

⁶ Ia sɨghaba ko itabagh iviva, pamten dɨmɨva Ikiavɨra Itir Godɨn ziam fɨ, a en atrivim.

⁷ Nɨ ongarim, nɨ ko nɨn itir osiriba, ko bizir nɨn aven itiba, ia bar pamten dɨm mɨkɨm. Nɨ nguazim, nɨ ko nɨn itir gumazamiziba ko bizir nɨn itiba, ia bar onger akabar amu.

⁸ Ia faner ekiaba, ia dafaribav sogh. Ia mɨghsɨaba, ia ighiabar amuva bar akongegh.

⁹ Ikiavɨra Itir God izɨ nguazim gativagh an ganam. An atrivimɨn ikɨ, guizɨn arazimɨn gumazamizibar araziba tuisɨgham. Kamaghɨn amizɨ, ia a bagh bar akuegh onger akabar amu.