Onger Akaba 97 - Godɨn Eghaghanim: Akar Gavgavir Dɨkɨrɨzir Ghurim ko Igiam

God an atrivir bar ekiam

¹ Ikiavɨra Itir God, an atrivimɨn iti. Nguazimɨn itir gumazamiziba, ia bar akueghtɨ, arighatɨzibar itir gumazamiziba, ia dɨmɨva bar akongegh.

² Overiar mɨgharir pɨziba an okarizɨ, an arazir aghuimɨn gumazamizibagh ativagha men gari.

³ Apanir a gasɨghasɨghasava amiba, avim an faragha ghua men isia me gasɨghasɨki.

⁴ An onɨmaribar angazangaribagh ami, da nguazimɨn taghtazima, nguazim nɨghava agoi.

⁵ Ikiavɨra Itir God, a nguazir kamɨn God. A izima, mɨghsɨaba pura amera uaghira dɨpabar mɨn otifi.

⁶ Overiam uabɨ, kamaghɨn akam akura ghaze, “God arazir aghuibaram ami.” Ezɨ gumazamiziba bar an angazangarim ko gavgavimɨn gari.

⁷ Gumazamizir marvir guabar ziaba feba bar aghumsɨki. Aseba teviba apɨrigh Ikiavɨra Itir Godɨn ziam fam.

⁸ Saionɨn nguibamɨn itir gumazamiziba, bizir kam barasi. Judan nguibabar itir gumazamiziba, nɨn kotiar arazir aghuir kam bagh bar akuegh, men naviba deragham.

⁹ O Ikiavɨra Itir God, Nɨ Godɨn Bar Pɨn Itim, nɨ nguazimɨn gumazamiziba bar me gativagha men gari. Nɨ ziar ekiam ikia, bar asebagh afira.

¹⁰ Arazir kurabar aghuazir gumazamiziba, Ikiavɨra Itir God bar me gifonge. Gumazamizir a baghavɨra itiba, a men apaniba da ua me inigha, me geghuva deragha men gari.

¹¹ God angazangarim isa gumazamizir aghuibagh anɨga, me gamizɨ men naviba bar akonge.

¹² Gumazamizir aghuiba, ia bizir Ikiavɨra Itir God amiba bagh, bar akongegh. Ia bizir kabagh nɨghnɨgh a mɨnabagh. Ia an ziar zuezir aghuim gɨnɨghnɨgh, a pɨrafɨ.