Onger Akaba 85 - Godɨn Eghaghanim: Akar Gavgavir Dɨkɨrɨzir Ghurim ko Igiam

Gumazim God, an adarazigh eghuvasa a me bagha God ko mɨgei

A gumazir onger akabar faragha zuim gɨnɨghnɨgha an osiri.

¹ O Ikiavɨra Itir God, nɨ deragha uan nguazim gamigha, Jekopɨn ovavir boriba ua men inizɨ me deragha, faragha ikezɨ moghɨn iti.

² Nɨ uan gumazamizibar arazir kurar me amiziba, nɨ da gɨn amada. Nɨ men arazir kuraba batoghezɨ da ua itir puvatɨ. (Ighiam gamua an suiam atugha avughsegha ua ighiam gami.)

³ Nɨ faragha men atara men anɨngazi. Nɨ arazir kam, datɨrɨghɨn uam a gamir puvatɨ.

⁴ O God, nɨ en Akurvazir Gumazim. E nɨn azangsɨsi, nɨ en ataran markɨ, nɨ uam e inigh ua bagh izɨ.

⁵ Manmaghɨn ami, nɨ en atar kamaghɨra ikɨtɨ, nɨn adarim gɨvaghan kogham o?

⁶ Nɨ ua ikɨrɨmɨrir e itir kam damightɨ a igiamɨn otogh, gavgavim e danɨngtɨ e tuivigh gavgavigham. Eghtɨ e nɨn gumazamiziba, nɨ bagh bar akuegh nɨn ziam fam.

⁷ O Ikiavɨra Itir God, nɨ zurara bar en apangkuvir arazir kam en akagh, en akuragh uam e inightɨ e deragh ikiam.

⁸ Kɨ uan kuarim atɨgh Ikiavɨra Itir Godɨn Gavgavim Itim, an akam baragham. E an gumazamiziba arazir kurar e amibar gɨn mangan kogh, uan navir averiabar aven a baghvɨra ikɨtɨ, a mɨkɨmtɨ e navir amɨrizim ikiam.

⁹ Bar guizbangɨra, an akurvazim, an gumazamizir an ziam fava an atiatia an apengan itiba, bar men boroghɨra iti. An angazangarim e gisiragha en akura, a uabɨ e ko en nguazir kamɨn ikɨ mamaghɨra ikiam.

¹⁰ Dughiar kamɨn, gumazamiziba uarir apangkuvigh, guizɨn arazir aghuibar zurara uarir amuam. Me Godɨn damazimɨn deragh ikɨ, navir amɨrizimɨn ikɨ, deragh uari ko dapiagh ikiam.

¹¹ Gumazamiziba nguazimɨn ikɨ, bar guizbangɨra Ikiavɨra Itir Godɨn gɨn mangɨ nɨghnɨzir gavgavim an ikɨvɨra ikiam, eghtɨ Godɨn uan Nguibamɨn Itim me damightɨ me an damazimɨn zuegham.

¹² Guizbangɨra, Ikiavɨra Itir God en akuragh bizir aghuiba isɨ e danɨngam. Eghtɨ nguazir en azeniba itiba, dagher bar avɨriba dar aghungam.

¹³ Ikiavɨra Itir God, gumazamizibar amightɨ, me arazir an damazimɨn derazimɨn gɨn mangam. Eghtɨ arazir kamra, God ua izamin tuavim atɨgham.