Onger Akaba 8 - Godɨn Eghaghanim: Akar Gavgavir Dɨkɨrɨzir Ghurim ko Igiam

Godɨn ziar ekiam ko gumazibar ziar aghuim

Gumazir onger akar kamɨn faragha zuim gumazibav kemezɨ, me Getɨn nguibamɨn ingarizir gita inigha a gikararai.

¹ O Ikiavɨra Itir God, nɨ en Ekiam. Nguazir kamɨn nguibaba bar dar gumazamiziba, nɨn gavgavimɨn gara ziar ekiam nɨ ganɨdi. Ezɨ nɨn ziar ekiam bar overiam gizɨfa.

² Borir bar iririviba uaghan nɨn ziam fe. Nɨn apaniba ko, nɨn akam batozir darazi nɨ men tuavim apɨrasa, dɨvazir bar gavgavim atɨ.

³ Kɨ kogha pɨn overiar nɨ uan dafarimɨn ingarizimɨn gara, egha uaghan iakɨnim ko mɨkovezir uan danganir nɨ me arɨghɨzibar gari,

⁴ kɨ kamaghɨn nɨghnɨgha ghaze, e gumazamiziba ti manmaghɨram amizir biziba, ezɨ nɨ mɨghɨgha e gɨnɨghnɨsi? E pura biziba. Manmaghɨram amizɨ, nɨ bar puvɨrama e gɨnɨghnɨsi?

⁵ Nɨ uabɨ en ingarigha, e isa uabɨn apengan e atɨ. Nɨ gavgavim ko ziar ekiam isa e ganɨga e afazɨ, bizir nɨ ingariziba bar en apengan iti.

⁶ Bizir nɨ ingarizir kaba bar, nɨ dagh ativagh dar ganasa e amɨsefe. Biziba bar moghɨra nɨ da isa e gumazamiziba en suemningɨn apengan da arɨki.

^7-8 Bizir kaba bar moghɨra: Sipsipba, bulmakauba, asɨzir ruarimɨn itiba ko, overiamɨn itir kuaraziba, ongarimɨn osiriba ko ongarimɨn aven aruir biziba, da bar en apengan iti.

⁹ O Ikiavɨra Itir God, nɨ en God. Nguazir kamɨn nguibaba bar dar gumazamiziba, nɨn gavgavimɨn gara ziar ekiam nɨ ganɨdi.