Onger Akaba 70 - Godɨn Eghaghanim: Akar Gavgavir Dɨkɨrɨzir Ghurim ko Igiam

Gumazim uabɨn akurvaghasa God ko mɨgei

A gumazir onger akabar faragha zuim gɨnɨghnɨgha an osiri.

¹ O Ikiavɨra Itir God, nɨ nan God, nɨ ifuegh zuamɨra izɨ nan akuragh!

² Gumazamizir maba na mɨsueghtɨ kɨ aremeghasa. Eghtɨ nɨ me abɨnigh men nɨghnɨziba aghamsightɨ, me aghumsika. Osɨmtɨzir kɨ isiba, gumazir maba dar gara bar akonge. Nɨ men ziaba abɨnigh me batueghtɨ me mangɨ.

³ Gumazir dɨbovir akabar na mɨgeiba, nɨ bar aghumsɨzir ekiam me danɨngigh, eghtɨ me uan arazir kurar me amir kam bagh, akongegh fogham.

⁴ Eghtɨ gumazamizir nɨ baghavɨra zuiba, men naviba deraghtɨ, me bar akuegh ikɨ. Gumazamizir kaba, nɨ bar moghɨra ua me ini. Nɨ me bagha amizir ingangarir kam me bar a gifonge. Egh me zurara kamagh mɨkɨm suam, “God, a guizbangɨra bar dera.”

⁵ O God, kɨ gavgaviba puvatɨgha uabɨra uabɨn akurvaghan iburaghburaki. Kamaghɨn, nɨ zuamɨra na bagh izegh. O Ikiavɨra Itir God, nɨrara nan akurvagha ua na isir gumazim. Nɨ suighsuighan markɨ, nɨ zuamɨra izɨ nan akuragh!