Onger Akaba 61 - Godɨn Eghaghanim: Akar Gavgavir Dɨkɨrɨzir Ghurim ko Igiam

Gumazim deragh uabɨn ganasa God ko mɨgei

Gumazir onger akabar faragha zuim, kar an onger akam. Gumazir kam, gumazir gitabav sozibav kɨmtɨ me ighiam bangam.

¹ O God, nɨ kuarim atɨgh nan dɨmdiam baragh, kɨ nɨ ko mɨgeir mɨgɨrɨgɨaba nɨ deragh da baragh.

² Kɨ uan nguibamɨn saghon iti, ezɨ nan navim bar oseme. Nɨ nan akurvaghasa kɨ nɨn dei. Nɨ na inigh mangɨ dagɨar gavgavimɨn aven na modoghtɨ, nan apaniba na gasɨghasɨghan kogham.

³ Nɨrara nɨ nan dɨvazir bar gavgavimɨn iti, ezɨ kɨ an modima, nan apaniba na abɨnamin tuaviba puvatɨ. Nɨrara dɨpenir ruarir gavgavimɨn mɨn bar deragha nan gara na geghufi.

⁴ Nan ifongiam kamakɨn, kɨ zurara nɨn dɨpenimɨn ikɨ mamaghɨra ikɨ mangɨ ovegham. Kɨ, tuarir nguziba uan amebamɨn avɨzimɨn apengan ikia deragha iti moghɨn, kɨ nɨn apengan bar deravɨra ikiasa. (Ighiam gamua an suiam atugha avughsegha ua ighiam gami.)

⁵ God, kɨ nɨ ko akam akɨrigha mɨkemezir biziba nɨ da baregha gɨfa. Gumazamizir nɨn atiatia nɨn ziam feba, nɨ bizir aghuiba me ganɨdi. Arazir kamra nɨ uaghan bizir aghuiba na ganɨdi.

⁶ Nɨ atrivim ateghtɨ, an azenir avɨribar angamɨra ikɨvɨra ikɨ. Nɨ aneteghtɨ, a dughiar ruarimɨn nguazimɨn ikegh.

⁷ O God, nɨ aneteghtɨ a nɨn damazimɨn dughiar ruarimɨn atrivimɨn ikɨ. Nɨ bar a gifongegha mɨkemezɨ moghɨra deragha bizibagh amua, uan nɨghnɨzim gɨghavkɨrir puvatɨ, kamaghɨra nɨ bar deragh a geghuv an gan.

⁸ Nɨ kamaghɨn damutɨ, kɨ dughiabar zurara akar faragha nɨ ko dɨkɨrɨzibar gɨn mangɨ, zurara ighiaba bangɨ nɨn ziar ekiam fam.