Onger Akaba 6 - Godɨn Eghaghanim: Akar Gavgavir Dɨkɨrɨzir Ghurim ko Igiam

Gumazim osɨmtɨzim ikia uabɨn akurvaghasa God ko mɨgei

Gumazir onger akar kamɨn faragha zuim, gita gikararang ongasa me mɨkeme.

¹ O Ikiavɨra Itir God, nɨ adarim ikɨ pamten na mɨkɨman markɨ. Nɨn navim ikuvightɨ, nɨ ivezir kuram na danɨngan markɨ.

² O Ikiavɨra Itir God, kɨ bar osemegha ua gavgaviba puvatɨ, ezɨ nɨ nan apangkufigh. Nan gavgaviba bar gɨfa, eghtɨ nɨ gavgavir igiam na danɨngightɨ kɨ ua deragham.

³ O Ikiavɨra Itir God, nan navim osɨmtɨzir ekiam a itaragha ghuaghiri. Ezɨ dughiaba manmaghɨn, osɨmtɨzir ekiar kam nan navir averiamɨn ikɨvɨra ikiam?

⁴ O Ikiavɨra Itir God, nɨ iragh izɨ nan akuragh ua na inigh. Nɨn apangkuvim zurara ikia mamaghɨra iti, nɨ uan apangkuvim ginɨrɨgh nan akuraghtɨ kɨ ovengan kogham.

⁵ Gumazamizir oveaghueziba, me ua nɨ gɨnɨghnɨzir puvatɨ. Gumazamizir Oveaghuezibar Nguibamɨn, tina ua nɨn ziam fam?

⁶ Kɨ dia ghuavti, nan gavgaviba bar gɨfa. Nan temeriba zurara dɨmagaribar nan mɨsiam giri, kɨ ara ghuav itima, nan dapanir aghoghonim bar kumkumi.

⁷ Nan apanir avɨriba iti, kamaghɨn amizɨ, kɨ dughiabar aziavɨra iti. Nan damazimning nan bezɨ, kɨ deragha bizibar garir puvatɨ.

⁸ Ikiavɨra Itir God nan azirakam baregha gɨfa, kamaghɨn, ia gumazir arazir kurabagh amiba, na gitagh.

⁹ Kɨ uabɨn akurvaghasa Ikiavɨra Itir God ko mɨgeima, a na baregha gɨfa. Kɨ a ko mɨgeir mɨgɨrɨgɨaba, a da baregha gɨfa.

¹⁰ Nan apaniba osɨmtɨzir ekiam inigh, bar aghumsɨgh atiatigham. Me zuamɨra na ategh onganigh arɨ tintinibar mangegham.