Onger Akaba 54 - Godɨn Eghaghanim: Akar Gavgavir Dɨkɨrɨzir Ghurim ko Igiam

God nan Akurvazir Gumazim

Me onger akar kam kamagh a dɨbori, Maskil.

¹ O God, nɨ uan ziar gavgavimɨn nan akuragh gumazir kurabar dafaribar ua na inigh. Nɨ uan gavgavir bar ekiamɨn nan akuraghtɨ, kɨ fɨrighɨrɨka.

² O God, kɨ nɨ ko mɨgei, nɨ na baragh. Nɨ kuarim atɨgh nan mɨgɨrɨgɨaba baragh.

³ Nguibar igharazibar gumaziba na mɨsoghasa izegha gɨfa. Gumazir igharaz darazigh asɨghasɨziba, me na mɨsueghtɨ kɨ aremeghasa. Gumazir kaba kamaghɨn nɨghnɨsi, God a pura bizim. (Ighiam gamua an suiam atugha avughsegha ua ighiam gami.)

⁴ Bar guizbangɨra, God uabɨra nan akurvasi. Ekiam nan akurvazima, kɨ deravɨra ikia, angamɨra ikiavɨra iti.

⁵ Nan apaniba, God mar mɨzazim me gasɨ. Egh arazir kurar me na gamiba, a maghɨra da otevkɨnigh da isɨ me gasegh. Nɨ mɨkemezɨ moghɨra deragha bizibagh amua, uan nɨghnɨzim gɨghavkɨrir puvatɨ. Egh kamaghɨra, nɨ bar nan apaniba agɨvagham.

⁶ O Ikiavɨra Itir God, nɨ bar derazɨ kɨ nɨ mɨnaba. Kɨ uan ifongiamɨn nɨ bagh ofa damuasa bar ifonge.

⁷ Nɨ nan akurazima, osɨmtɨzir na bativiba, tam na abɨrazir puvatɨ. Kɨ nɨn gari, nɨ nan apanibagh bar me gasɨghasɨki.