Onger Akaba 52 - Godɨn Eghaghanim: Akar Gavgavir Dɨkɨrɨzir Ghurim ko Igiam

Gumazir arazir kurabagh ifongezim, a gumazir onganim

Me onger akar kam kamagh a dɨbori, Maskil.

¹ O gumazir ekiam, nɨ manmaghsua uabɨ fa, arazir kurar nɨ Godɨn gumazamizibagh amiziba bagha bar akonge? Godɨn apangkuvim men ikia mamaghɨra iti.

² Nɨn mɨzem resan mɨn bar ghumigha ifavaribagh ami da otifi. Dughiabar zurara nɨ gumazamizibagh asɨghasɨghasa mɨgei.

³ Nɨ arazir aghuim bar an aghuagha arazir kuram baghavɨra ifonge. Nɨ guizɨn akam gifongezir puvatɨgha, ifarasa bar ifonge. (Ighiam gamua an suiam atugha avughsegha ua ighiam gami.)

⁴ Nɨ ifarir gumazim! Nɨ uan akamɨn gumazamizibagh asɨghasɨghasa bar ifonge.

⁵ Nɨ orakigh, God bar nɨ gasɨghasightɨ nɨ ikuvigh kamaghɨra ikiam. A nɨn dɨpenimɨn nɨn suiragh nɨ batuegh bar nɨ agɨvaghtɨ, nɨ ua nguazir kamɨn ikian kogham. (Ighiam gamua an suiam atugha avughsegha ua ighiam gami.)

⁶ Godɨn gumazamiziba kamaghɨn nɨn ganigh atiatingam. Me nɨn ingarɨva akɨ kamaghɨn mɨkɨmam,

⁷ “Ia gumazir kamɨn gan! Gumazir kam God a geghuv egh deragh an ganan an aghua. A uan dagɨaba ko bizir avɨribagh nɨghnɨgha ghaze, an arazir kuraba an akuraghtɨ a deragh ikiam.”

⁸ Ezɨ kɨ, olivɨn tememɨn mɨn Godɨn Dɨpenimɨn aven tughav ikia deravɨrama aghui. Kɨ nɨghnɨzir gavgavim an apangkuvir arazimɨn ikɨ mamaghɨra ikiam.

⁹ O God, nɨ nan akurazɨ kɨ zurara nɨ mɨnabɨvɨra ikiam. Kɨ gumazamizibar damazibar nɨn ziam fɨ kamagh mɨkɨm suam, “God arazir bar aghuimɨn na gami.”