Onger Akaba 32 - Godɨn Eghaghanim: Akar Gavgavir Dɨkɨrɨzir Ghurim ko Igiam

Gumazim uan arazir kurabar gun God mɨgeima, an an arazir kuraba gɨn amada

Me onger akar kam kamaghɨn a dɨbori, Maskil.

¹ Gumazamizir arazir kurabagh amiba, God men arazir kuraba gɨn amadagha da avara, eghtɨ gumazamizir kaba bar akuegham.

² Gumazamizir arazir kurabagh amiba, God men arazir kuram mengvɨra ikian koghtɨ, arazir ifavaritam an ikian kogham, eghtɨ gumazamizir kaba bar akuegham.

³ O God, kɨ uan arazir kurabar gun nɨ mɨkemezir puvatɨgha, dɨmagariba ko aruebar ara kamaghɨra ikia ghua nan aghariba bar nan amɨra.

⁴ Dɨmagariba ko arueba, nɨ ivezir kuram na ganɨngizɨ nan gavgaviba bar gɨfa. Mati aruer ekiam nguazim gaboima a bar mɨsɨngi. (Ighiam gamua an suiam atugha avughsegha ua ighiam gami.)

⁵ Datɨrɨghɨn kɨ uan arazir kuraba bar dar gun Ikiavɨra Itir God mɨkemezɨ, an ada gɨn amadagha gɨfa. Egha kɨ uan arazir kuratam modozir puvatɨ, kɨ bar da aghurigha nɨ mɨkeme. (Ighiam gamua an suiam atugha avughsegha ua ighiam gami.)

⁶ Kamaghɨn dera, nɨn gumazamiziba osɨmtɨziba bativ, egh zurara nɨ ko mɨkɨmtɨ, osɨmtɨzim aperiar ekiamɨn mɨn me avigh mangɨsɨ izɨ, me avigh mangɨghan kogham.

⁷ Nɨrara nan mogomer danganim, kɨ nɨn aven modima osɨmtɨziba na abɨrir puvatɨ. Kɨ osɨmtɨzibar aven itima, nɨ na ekɨarugha nan akurvasi. Kamaghɨn kɨ pamten dia ighiabagh amua nɨn ziam fe. (Ighiam gamua an suiam atugha avughsegha ua ighiam gami.)

⁸ Ikiavɨra Itir God ghaze, Tuavir nɨ mangamim, kɨ nɨn sure damu deragh nɨ gegharaghtɨ, nɨ an mangam. Kɨ deravɨra nɨn sure damu egh nɨn gan nɨ geghuvam.

⁹ Nɨ hoziaba ko donkibar mɨn onganan markɨ, mati me ain ko benir ruaribar men akabagh aghuigha me getuima me izi. Puvatɨghtɨ me izeghan kogham.

¹⁰ Gumazir arazir kurabagh amiba osɨmtɨzir avɨriba bativam. Ezɨ gumazir nɨghnɨzir gavgavim Ikiavɨra Itir Godɨn itiba, me zurara an apangkuvir ekiamɨn aven deragh ikiam.

¹¹ Ia gumazamizir arazir aghuibagh amiba, Ikiavɨra Itir God ia bagh amizir biziba, ia da bagh naviba deragh bar akongegh. Ia Godɨn damazimɨn zuezir gumazamiziba, ia bar pamten dɨm mɨkɨm bar akongegh.