Onger Akaba 20 - Godɨn Eghaghanim: Akar Gavgavir Dɨkɨrɨzir Ghurim ko Igiam

Gumazim uabɨn akuragh mɨdorozim damuasa God ko mɨgei

A gumazir onger akabar faragha zuim gɨnɨghnɨgha an osiri.

¹ Nɨ osɨmtɨzim ikiamin dughiamɨn, Ikiavɨra Itir God nɨn dɨmdiam ikaragh nɨn akurvagham. A en ovavim Jekopɨn God, a nɨ geghuv nɨn ganam.

² A Saionɨn Mɨghsɨamɨn ikia uan Dɨpenimɨn iti, egh a uan akurvazim nɨ bagh anemadagh gavgavim nɨ danɨngam.

³ Ofan nɨ a bagha amiba, a bar dagh nɨghnɨgh, egh nɨn ofan bar isia mɨghɨribagh ifuegham. (Ighiam gamua an suiam atugha avughsegha ua ighiam gami.)

⁴ Nɨ bizir tizim gifuegha navim a bagha nɨ dɨkafi, God a isɨ nɨ danɨngam. Bizir nɨ damuasa nɨghnɨziba, a dar amightɨ da bar otivigham.

⁵ Nɨ uan apanibav sogh me abɨraghtɨ, e bizir kam bagh bar akuegham. E bizir kam gɨnɨghnɨgh uan Godɨn ziam fam. E ghaze, nɨ Ikiavɨra Itir Godɨn azangsɨzir biziba, an ada ikaragh da isɨ nɨ danɨngam.

⁶ Kɨ datɨrɨghɨn fo, Ikiavɨra Itir God, uabɨ uan atrivir a ua baghavɨra mɨsevezir kam, an an akurvasi. A uan Nguibar aghuimɨn ikia, an azangsɨziba barasi. Egha uan gavgavimɨn an akurvazima, a mɨdorozimɨn uan apaniba abɨri.

⁷ Gumazir maba nɨghnɨzir gavgavim uan mɨdorozir karisbar ikia ghaze, da men akurvagham. Ezɨ marazi nɨghnɨzir gavgavim uan hoziabar ikia ghaze, da men akurvagham. Ezɨ eia, e nɨghnɨzir gavgavim uan Ikiavɨra Itir Godɨn ziamɨn ikia kamaghɨn fo, a en akurvagham.

⁸ Gumazamizir kamaghɨn amiba, me asaghpora ira bar puvarɨsi. E puvatɨ. E dɨkavigh tuivigh gavgavigham.

⁹ O Ikiavɨra Itir God, nɨ atrivimɨn akuraghtɨ a uan apaniba abɨnigh. E nɨn deir dughiabar, nɨ en dɨmdiam ikaragh en akuragh.