Onger Akaba 143 - Godɨn Eghaghanim: Akar Gavgavir Dɨkɨrɨzir Ghurim ko Igiam

Gumazir mam uabɨn akurvaghasa God ko mɨgei

Devit ighiar kam osiri.

¹ O Ikiavɨra Itir God, kɨ nɨ ko mɨgeir mɨgɨrɨgɨaba nɨ da baragh. Nɨ arazir aghuibaram amua, bar guizbangɨra mɨgɨa ifarir puvatɨ. Kɨ nɨ ko mɨgeir mɨgɨrɨgɨaba nɨ kuarim atɨgh da baragh.

² Gumazitam bar zuegha nɨn damazimɨn itir puvatɨ. Kamaghɨn, nɨ uan ingangarir gumazim isi kotiam datɨgh a tuisɨghan markɨ.

³ Nan apaniba nan agɨntɨgha bar na abɨra. Egha na isa kalabuziar danganir mɨtatemɨn na atɨzɨ, kɨ fomɨrama oveaghuezibar mɨn iti.

⁴ Kamaghɨn nan nɨghnɨzim ikuvizɨ, nan navim osemegha mamaghɨra iti.

⁵ Kɨ fomɨram otivizir biziba uam a dagh nɨrɨ. Egha nɨ fomɨra ingarizir bizir aghuiba, kɨ uam adagh nɨghnɨsi.

⁶ Kuarim na mɨsɨngizɨ, kɨ dɨpatamara amasa bar ifongezɨ moghɨn, nan duam nɨ ko mɨkɨmasa bar ifonge. (Ighiam gamua an suiam atugha avughsegha ua ighiam gami.)

⁷ O Ikiavɨra Itir God, nan nɨghnɨzir gavgavim iraghu. Nɨ nan dɨmdiam baragh. Nɨ uabɨ nan mongan markɨ, kɨ ti ovegh mangɨ oveaghuezibar nguibamɨn mangɨgham.

⁸ Kɨ nɨghnɨzir gavgavim nɨn iti, nɨ mɨzaraziba vaghvagh apangkuvir ekiar nan itir kam bagh, na mɨkɨmvɨra ikɨ. Kɨ uan navir averiamɨn aven nɨ baghavɨra iti. Kamaghɨn kɨ mangamin tuavim nɨ nan sure damu.

⁹ O Ikiavɨra Itir God, nɨ nan akurvaghasa kɨ nɨ bagha zui, nɨ na modogh. Nɨ nan apanibar dafaribar uam na inigh.

¹⁰ Nɨ nan God, kɨ kamaghsua, nɨ deravɨra nan sure damutɨ, kɨ nɨn ifongiamra gɨn mangam. Nɨn duam deravɨra na damutɨ, kɨ tuavir aghuimɨn mangam.

¹¹ O Ikiavɨra Itir God, nɨ uan ziar ekiam bangɨn, nɨ akam akɨrizɨ moghɨn nɨ uam na inigh. Nɨ arazir aghuibaram ami. Kamaghɨn, nɨ nan osɨmtɨzir na bativibar aven uam na inigh.

¹² Kɨ nɨn ingangarir gumazim, ezɨ nɨ bar nan apangkufi. Kamaghɨn amizɨ, gumazir nan apanim gamiba ko na gasɨghasɨghasava amiba, nɨ me mɨsueghtɨ me bar arɨmɨghiregh.