Onger Akaba 13 - Godɨn Eghaghanim: Akar Gavgavir Dɨkɨrɨzir Ghurim ko Igiam

Gumazim Godɨn akurvazim bagh an azangsɨsi

An onger akar kabar faragha zuir gumazim gɨnɨghnɨgha onger akar kam osiri.

¹ O Ikiavɨra Itir God, nɨ manadɨzoghɨn ua na gɨnɨghnɨgham? Nɨ ti bar na gɨn amadagha ma? Nɨ manadɨzoghɨn uan guam nan akaghtɨma kɨ an ganigham?

² Nɨ manadɨzoghɨn osɨmtɨzir kɨ isir kaba gɨvagham? Dɨmagariba ko aruebar, mɨzazir kaba ti nan ikɨvɨra ikiam, o? Nɨ manadɨzoghɨn nan akuraghtɨ, kɨ ua apanibar apengan ikian kogham?

³ O Ikiavɨra Itir God, nɨ nan God. Nɨ na gɨnɨghnɨgh kɨ nɨ ko mɨgeir mɨgɨrɨgɨaba baragh. Egh gavgavim ua na danightɨ kɨ ovengan kogham.

⁴ Apaniba kamaghɨn mɨkɨman markɨ suam, e anebɨragha gɨfa. Kɨ irɨghamin arazir kam, me an ganigh a bagh bar akueghan markɨ.

⁵ Kɨ nɨghnɨzir gavgavim kamaghɨn ikia ghaze, nɨ nan apangkuvigha ikia kamaghɨra iti. Nɨ nan akurvaghasa kɨ bar ifonge.

⁶ Bar guizbangɨra, Ikiavɨra Itir God bar deravɨra na gami. Kamaghɨn kɨ an ziamɨn onger akabar amuva, ziar ekiam a danɨngam.