Onger Akaba 128 - Godɨn Eghaghanim: Akar Gavgavir Dɨkɨrɨzir Ghurim ko Igiam

God gumazamizir an akam baragha an gɨn zuiba, a deragha me gami

Godɨn Dɨpenimɨn ghuavanaga an ziam fer ighiam.

¹ Gumazamizir Ikiavɨra Itir Godɨn atiatia an apengan ikia, an akaba baragha dar gɨn zuiba, me bar akongegh.

² Ingangarir nɨ amibara nɨ dar dagɨaba inigh bizir nɨ ifongezibagh ivezam. Eghtɨ bizir nɨ amiba bar deraghtɨ nɨ bar akuegham.

³ Nɨn amuim, wainɨn ikarɨzimɨn mɨn ava ovɨzir avɨriba iti moghɨn, a borir avɨriba batam. Nɨn boriba bar avɨrasemegh nɨn avir mɨriam, olivɨn temer igiabar mɨn bar an okarigham.

⁴ Bar guizbangɨra, gumazir Ikiavɨra Itir Godɨn atiatia an apengan itim, a kamaghɨrama otogham.

⁵ Ikiavɨra Itir God, uan Dɨpenimɨn aven Saionɨn Nguibamɨn iti, a deragh nɨ damu. Nɨ zurara nguazimɨn itir dughiam, nɨ Jerusalemɨn nguibamɨn itir bizibar gantɨ da deraghvɨrama otiv.

⁶ Kɨ kamaghsua, nɨ dughiar ruarimɨn ikɨ uan igiar boribar gan. Eghtɨ Israelia deraghvɨra ikɨ.